Ad lipienia «NN» stanie štotydniovaju

Ad lipienia «NN» stanie štotydniovaju

Ad pieršaha lipienia «Naša Niva» budzie vychodzić kožny tydzień. Aformiŭšy padpisku, vy budziecie atrymlivać hazetu nia dva, jak raniej, a čatyry razy na miesiac. Hazeta budzie zastavacca najviarniejšym lusterkam žadańniaŭ i patrebaŭ biełaruskaha narodu.

Usio biełaruskaje pačynałasia z «Našaj Nivy». Ad samaha stvareńnia ŭ 1906 hodzie štotydniovaja hazeta była hałoŭnaj trybunaj palityki, haspadarki, litaratury, navuki. Z «Našaj Nivy» išła daroha Janki Kupały, Jakuba Kołasa, Maksima Bahdanoviča, Źmitra Žyłunoviča, Antona Łuckieviča, Vacłava Łastoŭskaha. Ale hałoŭnaje, jana była hołasam ludziej z usioj Biełarusi i Litvy. Spyniła vychad hazety pieršaja suśvietnaja vajna. U 1920 hodzie vydańnie sprabavali znoŭ raspačać, ale zdoleli vydać tolki dzieviać numaroŭ.

U 1991 hodzie «Naša Niva» była adnoŭlenaja ŭ Vilni, u kałyscy biełaruskaj idei i biełaruskaj sučasnaści. Vy trymajecie ŭ rukach užo sto tryccać pieršy numar hazety. Usie hetyja hady jana žyviłasia j žyviła tym biełaruskim ducham, jaki nia byŭ vykryŭleny j pierakručany savietčynaj i rasiejščynaj, źviazvała razarvanyja nici, tkała novuju asnovu. Jana adrazu stała bolš čym hazetaj — kropkaj pačatku kaardynataŭ, čystym žadańniem, hipertekstam na papiery, žyvym ciełam kultury. Padziei dziesiacihodździa rabili krainu bolš samastojnaju, ale jašče nie zrabili bolš biełaruskaju. Biełaruś mianiałasia, hazeta zastavałasia.

U 1996 hodzie, na dzievianostym hodzie svajho isnavańnia, 1 sakavika, «Naša Niva» pierajechała ŭ Miensk. Tady pačałasia mienskaja viasna zmahańnia za niezaležnaść. My išli poruč z tymi, chto vieryŭ i rabiŭ, i zaŭsiody zajmali jasnuju pazycyju, zychodziačy z nacyjanalnych intaresaŭ Biełarusi i pradstaŭlajučy dumku biełaruskaj intelihiencyi.

Paniadziełak z «Našaj Nivaj» budzie adkryvać kožny tydzień. Pačynajecca novaje biełaruskaje stahodździe.