Siarhiej Jorš. Napad na miačet

Napad na miačet

Pozna ŭviečary 9 žniŭnia nieviadomyja ŭčynili akt vandalizmu ŭ słonimskim miačecie

Kala 10 hadzin viečaru chtości pabiŭ vokny miačetu, jaki znachodzicca ŭ Słonimie kala kanału Ahinskaha na adnajmiennaj vulicy. Paśla nieviadomyja sprabavali trapić praz adno z voknaŭ u budynak, ale vandałaŭ spynili kraty. Vyklikanaja susiedziami milicyja złačyncaŭ nie zatrymała, bo jany paśpieli ŭciačy…

Staršynia słonimskaha abjadnańnia musulmanaŭ Sulejman Bajrašeŭski ličyć, što napad byŭ nievypadkovym, bo adbyŭsia jakraz napiaredadni źjezdu tatarskaj moładzi Biełarusi ŭ Słonimie. Miascovyja musulmanie rychtavalisia adznačyć i piacihodździe adnaŭleńnia słonimskaha miačetu. Vidavočna, chtości vyrašyŭ sapsavać im śviatočny nastroj.

S.Bajrašeŭski adznačyŭ i dziŭnyja dziejańni milicyjantaŭ, jakija paśla zdareńnia navat nie apytvali susiedziaŭ. A načalnik słonimskaj milicyi Batura byŭ niezadavoleny tym, što musulmanie napiaredadni razreklamavali svoj źjezd u miascovaj presie dy “zavalili budynak dyvanami”…

Tatary žyvuć u Słonimie ŭžo čatyry stahodździ. Ich staražytny miačet zhareŭ letam 1944 hodu, i na pačatku 1990-ch hadoŭ, kali ŭ horadzie aktyvizavalisia musulmanie, na tym miescy ŭžo stajaŭ pryvatny dom. Tady jany paprasili harvykankam vydzialić pad miačet zaniadbany budynak na vulicy Ahinskaha. Nie dali. Tady musulmanie źviarnulisia ŭ Viarchoŭny Saviet Biełarusi, jaki ŭ červieni 1994 hodu j pieradaŭ im hety budynak. Za tydzień viernyja ŭłasnymi siłami zrabili ramont, i miačet pačaŭ pracavać. Ciapier jany iznoŭ usioj hramadkaj adnaŭlajuć svaju bažnicu.

Siarhiej Jorš