Naviny

---

 Naviny

 

Nie stralajcie ŭ Pucina!

Viartajemsia my ŭčora z žonkaju z carkvy sa śviačonaju viarboju, a ŭ nas pad dźviaryma staić milicyjant. I z čym, dumajecie, zajaviŭsia? Kaža, siońnia ni ŭ jakim razie nie vysoŭvajciesia na balkon. — Što takoje? — A Vy nia znajecie? Pucin pryjaždžaje, budzie kvietki da Pieramohi ŭskładać. — Dy ad našaha domu da płoščy Pieramohi 400 metraŭ budzie! — A ŭsio adno zahadana na balkony nikoha nie puskać.

Voś ža žonka ceły dzień bajałasia da vakon padychodzić — čort tych rasiejcaŭ viedaje!

Barys Tumar

 

Kaledž imia Kita

Baranavicki niedziaržaŭny ekanomika-jurydyčny kaledž źviarnuŭsia da Barysa Kita z prapanovaj nadać Kaledžu jahonaje imia. Dniami pryjšoŭ adkaz z Frankfurtu: sp.Kit daŭ zhodu.

Rusłan Raviaka, Baranavičy

 

Adzin dzień u kreśle

Mienavita stolki času pravioŭ u kreśle načalnika sielhasupraŭleńnia ŭ Astraŭcy staršynia kałhasu «Śvitanak» Mastoŭskaha rajonu Mikałaj Žyvuška. Pryjechaŭ, pabačyŭ stan rečaŭ u kałhasach, dzie, darečy, u niekatorych užo pačali darazać žyviołu, i źjechaŭ na raniejšaje miesca pracy. A za biudžetnyja hrošy jamu ŭžo byli padrychtavali katedž.

Marjan Vianhroŭski, Astraviec

 

Biaspłatny subotnik

15 i 22 krasavika pracoŭnyja, školniki, studenty adpracoŭvajuć subotnik. Adpaviednyja rasparadžeńni vydali ŭsie kiraŭniki vykankamaŭ. Pavodle hetych rasparadžeńniaŭ, jość usienarodnaja prośba papracavać biaspłatna. A zaroblenyja hrošy kudy-niebudź pieraličyć. Voś vertykal i vykonvaje zahad narodu. U Mahilovie hrošy ź jaho nakirujuć na adnaŭleńnie haradzkoj bolnicy. Usio b dobra, kab nia peŭnyja akaličnaści. Pa-pieršaje, nichto nia viedaje, kolki nasamreč budzie zaroblena, pa-druhoje, nichto nie kantraluje, kudy nasamreč nakirujuć srodki.

 

Sudy ŭ Babrujsku

U Babrujsku 28-hadovamu nastaŭniku historyi Alesiu Čyhiru sudździa Savaściančyk vyniesła papiaredžańnie: 25 sakavika, u Dzień Voli, Aleś pryjšoŭ na płošču Pieramohi z dvuchhadovaj dačkoj, jakaja niesła ŭ rukach bieł-čyrvona-bieły ściažok. Na płoščy ŭ toj dzień sabrałasia kala 300 čałaviek. Jany tolki i rabili, što špacyravali pa płoščy i razmaŭlali adzin z adnym. Ničoha nie rabiŭ admietnaha i Aleś: nie vystupaŭ, nie razhortvaŭ plakataŭ. I ŭsio ž jaho zatrymała milicyja i abvinavaciła ŭ niezakonnym mitynhavańni. Hałoŭnym ža dokazam viny była maleńkaja dačka z histaryčnym biełaruskim ściažkom u rukach. Usiaho 25 sakavika ŭ Babrujsku było zatrymana 14 čałaviek, 8 ź jakich — školniki. Sudy praciahvajucca.

Symon Hłazštejn, Mahiloŭ

 

Dva miljony i 10 dzion u kałhasie

Ašmianskija mytniki, kali atrymlivali zarobak, nie daličylisia dva miljony rubloŭ kožny. Im patłumačyli, što hrošy pojduć na padtrymku kałhasaŭ. Ale na hetym usio nia skončyłasia. U dadatak kožny mytnik pavinien adpracavać na kałhasnych paletkach pa dziesiać dzion.

Marjan Vianhroŭski, Astraviec

 

Lapi, ale nia śpi

U čaćvier 13 krasavika la Akademii milicyi byli zatrymanyja maładafrontaŭcy Aleh Bazaraŭ, Maksim Rudziankoŭ i Alaksiej Šprykaŭ. Jany byli schoplenyja niejkimi nie našmat starejšymi za ich viernapaddanymi «błakitnymi chłopčykami» j abvinavačanyja ŭ rasklejvańni nalepak «Čarnobylski šlach— 2000. My — narod» (hł. na s.4).

Milicyjanty zmusili chłapcoŭ pakazać miesca, dzie jany ŭziali nalepki. Napałochanyja chłopcy pryviali «achoŭnikaŭ paradku» ŭ siadzibu BNF, dzie tymčasam adbyvałasia pasiedžańnie Ŭpravy moładzievaj arhanizacyi Frontu. Maładziony ŭ formie nachabna patrabavali pakazać im miesca, dzie lažać nalepki. Naturalna, što hetkaha miesca im nichto nie pakazaŭ, dyj nalepak u siadzibie BNF, jasnaja reč, nie akazałasia. Tady adzin z «błakitnych», napeŭna, najdaścipniejšy, paprasiŭ nalepak «dla siabie». Urešcie, praź piatnaccać chvilin milicyjanty pakinuli pamiaškańnie na Varvašeni 8, zabraŭšy ŭ Savieckuju rajonnuju ŭpravu nutranych spraŭ (hetak ciapier mianujecca kolišni RAUS) schoplenych maładafrontaŭcaŭ. Tudy sama pajechała j delehacyja na čale z Paŭłam Sieviaryncam vyzvalać achviary.

Anekdatyčnaść sytuacyi ŭ nieaściarožnaści zatrymanych, uziatych prosta miž siadzibaju Frontu j Akademijaj milicyi.

Viktar Muchin

 

Universytetaŭ, jak hrazi

U Mahilovie źjaviŭsia dniami šče adzin universytet. Status taki nadali Mahiloŭskamu mašynabudaŭničamu instytutu. Jak žartujuć śmiechačy, chutka pa kolkaści ŭniversytetaŭ na dušu nasielnictva Mahiloŭščyna apiaredzić najbujnyja stalicy Eŭropy. A što vy dumali? Ciapier u vobłaści až 5 universytetaŭ. Adnak skazać, što z taje nahody pabolšała adukavanych i piśmiennych ludziej, pakul ciažka. Mašynabudaŭničy instytut apošnim časam treśli skandały, źviazanyja sa šmatlikimi złoŭžyvańniami kolišniaha kiraŭnictva. Kiraŭnictva źmianili. Skandały zamiali. A instytut zrabili ŭniversytetam. Pryčym miarkujecca, što ŭ budučym jon stanie biełaruska-rasiejskim. Nu, badaj, z takim uzroŭniem adukacyi biełaruska-niamieckim nia stanieš.

 

Biez padłohi, biez špaleraŭ

Budaŭniki pieražyvajuć surjoznuju kryzu vytvorčaści. Aficyjnaja statystyka, praŭda, paviedamlaje inšaje: maŭlaŭ, pakazčyki pieršaha kvartału hetaha hodu vyšejšyja za letašnija na 190%. Ale jany dasiahnuty praz zakančeńnie budoŭlaŭ ź minułaha hodu. A novaje, jak i ŭ staryja časy, usio ŭzvodzicca pavodle pryncypu «aby fundament byŭ». Pra vastryniu kryzy śviedčyć, naprykład, taja akaličnaść, što ŭpieršyniu budaŭnikam aficyjna dazvolena zdavać damy ź niedarobkami. U pryvatnaści, tynkavać i padłahi maścić ciapier nie abaviazkova. Kaniečnie, chaj dziadźka darablaje.

Symon Hłazštejn, Mahiloŭ

 

Prybrali vakoł Kałožy

U tamtuju subotu ŭ Horadni aktyvisty Maładoha Frontu, Maładoj Hramady i Aljansu Vitaŭta Vialikaha praviali subotnik, čyściačy ad śmiećcia terytoryi kala Kałoskaj carkvy. Moładź planuje pravodzić takija akcyi kožnuju pieršuju subotu miesiaca, — paviedamlaje Biełaruskaja Asacyjacyja Resursavych Centraŭ. Chto choča, moža daznavacca ŭ siadzibie BNF.

B.T.

 

Sama adna

12 krasavika na płošču Niezaležnaści ź bieł-čyrvona-biełym ściaham u rukach vyjšła Nina Bahinskaja. Za ruku jana trymała svajho ŭnuka.

Milicyjanty zatrymali jaje i zavieźli ŭ pastarunak, dzie jana zajaviła, što takim čynam nahadała hramadzianam Biełarusi pra źbićcio deputataŭ ad BNF u krasaviku 1995 hodu ŭ zali Viarchoŭnaha Savietu. Milicyjanty skłali na Bahinskuju pratakoł ab parušeńni zakonu pra šeści i mitynhi. U chutkim časie jaje majuć sudzić. Ci buduć sudzić jaje małoha ŭnuka, pakul nieviadoma.

Pravaabarončy centar «Viasna-96»

 

Mera Paŭłava pryznali vinavatym

12 krasavika skončyŭsia sud pa skarzie sp.Mieziaka na niezakonnyja dziejańni Baranavickaha harvykankamu. U.Miaziak padaŭ zajaŭku na praviadzieńnie 15 sakavika pikietu da Dnia Kanstytucyi. Vykankam daŭ zhodu na pikiet, ale nie 15 sakavika, a 22-ha. Adkaz byŭ padpisany tady jahonym staršyniom M.Paŭłavym. Tym samym Paŭłaŭ parušyŭ zakon ab schodach: možna pamianiać miesca praviadzieńnia akcyi, ale nia formu i nia dzień. Tamu sud častkova zadavoliŭ skarhu V.Mieziaka i rašyŭ, što M.Paŭłavym parušany zakon. Sud abaviazaŭ harvykankam kampensavać usie materyjalnyja straty zajaŭnika. A voś vybačeńniaŭ ad vykankamu sud nie vymahaje: niama ŭ nas takoha zakonu, kab ułada pierad ludźmi vybačałasia za pamyłki.

Biełaruski Hielsynski Kamitet

 

Za nacystaŭ voźmucca ŭłady

U Horadni pradstaŭniki demakratyčnych arhanizacyjaŭ paru razoŭ padavali zajavy ŭ prakuraturu, kab uzbudzili kryminalnuju spravu suprać RNIE, što jana bje šyby ŭ siadzibie Narodnaha Frontu i zaśmiečvaje horad nacyskaj symbolikaj. Narešcie pačaŭsia razhlad zajavaŭ.

B.T.

 

12 dzietak zahinuła na Viciebščynie

Za try pieršyja miesiacy hodu na Viciebščynie adbyłosia 352 pažary. U połymi zahinuŭ 71 čałaviek, ź ich 12 dzietak. Proci minułaha hodu namnoha bolš: za ŭvieś minuły hod pažary ŭkrali ŭ nas 181 žyćcio, ź ich 13 dziciačych. Viadoma, najbolš pažaraŭ uzimku, kali ŭ hrubkach palicca.

Andrej Alaksandraŭ, Navapołacak