Z usioj krainy
№ 25 (182), 19 — 26 červienia 2000 h.
Z usioj krainy
I ŭ Pinsku — ladovy pałac
Budavać ladovy pałac vyrašyli na pasiedžańni rady dyrektaraŭ Nacyjanalnaha banku Biełarusi ŭ ramkach rekanstrukcyi bankaŭskaha kaledžu ŭ Pinsku. Planujecca, što ladovy pałac stanie častkaj vialikaha spartkompleksu, jaki pabuduje Nacbank na bazie kaledžu. Užo vyznačanaje miesca budoŭli — planujecca źnieści častku damoŭ na nabiarežnaj Piny ŭ histaryčnym centry horadu. Na stvareńnie prajektu pojdzie, kažuć, niedzie z hod, budoŭla zojmie jašče dva hady.
Alaksiej Dzikavicki, Pinsk
Chlebny bunt u Klimavičach
212 žycharoŭ Klimavičaŭ na pačatku červienia padpisali zvarot da staršyni Mahiloŭskaha abłvykankamu M.Dražyna z prašeńniem «vyrašyć pytańnie ab źnižeńni cenaŭ na chleb i bułki» ŭ Klimavickim rajonie. Bo sapraŭdy, čamu amal usio ŭ kramach Klimavičaŭ daražejšaje, čym u susiednich rajonach? My što, bahaciejšyja? Ci mo chto ličyć, što kožny klimaviec maje kran ź miacovaj vinakurni i z taho — šalonyja hrošy? «U Mahilovie chleb tańniejšy na 40%, u Miensku — na 50%, u susiednim Kryčavie — na 35%», — pišuć žychary Klimavičaŭ. Dy pry tym jakaść taho chlebčyka aby-jakaja. U kaho jość mahčymaść, nabyvaje chleb u Kryčavie, Mahilovie, Horkach, Amścisłavie. Darečy, u apošni horad muku zavoziać byccam by z Klimavickaha kambinatu chlebapraduktaŭ. I tym bolšaje nieŭrazumieńnie vyklikała tłumačeńnie ekanamista chlebazavodu na miascovym radyjo: maŭlaŭ, bolšy košt chleba vyklikany vialikimi enerhavydatkami na zavodzie. Ci dastaŭka muki za 70 km u Mści-słaŭ robić vydatki nižejšymi?
M.Špakaŭ, Klimavičy
Padnožny korm mścisłaŭcaŭ
Kožny bačyŭ žyviołu, jakaja paśvicca na łuzie. Chodziać sabie karoŭki, ščypluć pylnuju traŭku, ciešacca soniejkam… Žycharam uschodniaj Mahiloŭščyny taksama dazvalajuć karmić siabie «padnožnym» kormam. Achvotnyja da bulby dy cybuli mścisłaŭcy, naprykład, mohuć atrymać działačku ziamli ŭ horadzie ci za jaho miežami dla zadavalnieńnia svaich fizijalahičnych patrebaŭ (nataleńnia hoładu). Na siońnia supolnaja płošča tolki tych sielhasnadziełaŭ, što znachodziacca na terytoryi horadu, składaje 172 hiektary. Značyć, pieravažnaja bolšaść mścisłaŭcaŭ charčam zabiaśpiečvajuć siabie sami.
Kasiŭ Jaś kraj haścinca
Stała ŭžo dobraj tradycyjaj kožnaje leta haniać rabotnikaŭ usich pradpryjemstvaŭ i ŭstanovaŭ Čerykava i inšych haradoŭ uschodu Mahiloŭščyny z kosami ŭ rukach na łuhi i ŭzbočyny daroh. Robicca heta z metaj «akazańnia peŭnaj dapamohi viaskoŭcam», a taksama na dabro samich žycharoŭ haradoŭ. Miarkujcie sami, haradžanie, što za zimu nasiedzielisia za stałami j kamputarami, nastajalisia za stankami j kanvejerami, namachalisia dubinałami i aperacyjnymi skalpelami, zaraz znoŭ mohuć razvalochacca, pamachać kosami i hrabielkami. Specrašeńniem Čerykaŭskaha rajvykankamu «da kožnaj arhanizacyi, ustanovy, pradpryjemstva rajonu daviedziena kankretnaje zadańnie pa narychtoŭcy kormu dla hramadzkaj žyviołahadoŭli z raźliku 100 kh siena albo 400 kh zialonaj masy na adnaho pracujučaha».
Andrej Kuźmin, Kryčaŭ
Bieraściejščyna samaja mataryzavanaja
Pa kolkaści aŭtatranspartu siarod vobłaściaŭ Biełarusi lideram Bieraściejščyna. Na pačatak hodu tam było 360 tysiač mašyn i matacykletaŭ, a ŭ Miensku — 298 tys. Praŭda, kali na Bieraściejščynie šmat matacykletaŭ, dyk aŭtamabilaŭ usio ž najbolš u mienčukoŭ (19,2% ad ahułu ŭ Biełarusi), dalej pa mašynach idzie Bieraściejskaja vobłaść (16,1%), paśla Mienščyna j Homielščyna (pa 13,8%), Viciebščyna (13,5%), najmienšaja pa kolkaści žycharoŭ vobłaść Biełarusi, Haradzienskaja — 12,7% i zaŭždy adstajučaja Mahiloŭščyna (10,9%).
BARS
Tralejbusam da Ryhi
Biełaruski zavod «Biełkamunmaš» pieramoh u tendery na pastaŭku ŭ Ryhu 10 padvojnych tralejbusaŭ. U tendery taksama brali ŭdzieł kampanii z Čechii, Polščy j Rasiei. Ale našy «traliki» akazalisia najtańniejšyja.
Telefon padaražeŭ na 15%
Ciapier mižharodnaja razmova pa Biełarusi kaštuje 9,4 rubli za chvilinu, pa horadzie z chatniaha telefonu — 1,72 rubli. Košt telefonnaj mahnitnaj kartki na 120 chvilin vyras da 765 rubloŭ. Za chvilinu razmovy pa mabilnym telefonie ciapier tre budzie płacić 76 rubloŭ.
Miž tym padličyli, što ŭsiaho za pieršy tydzień ceny ŭ krainie vyraśli na 3,2%. Značyć nieŭzabavie dalar, što ŭžo doŭha trymajecca, skoknie. Z pačatku ž 2000 hodu spažyvieckija ceny ŭ Biełarusi ŭzrasli na 49,6%. Letaś za toj samy čas ceny ŭzraśli na 79,5% (u tym za pieršy tydzień červienia — na 3,3%).
B.T.
Carkva na praspekcie Revalucyi
U Barysavie z błasłavieńnia Fiłareta vyrašyli ŭźvieści jašče adnu pravasłaŭnuju carkvu — ŭ honar žaŭnieraŭ, što zahinuli pad čas vojnaŭ, u jakich udziel-ničała Rasieja. Pad budaŭnictva carkvy haradzkija ŭłady adviali plac na pr.Revalucyi, toj samaj revalucyi, jakaja hetyja cerkvy j razburała.
Siaržuk Sałaš, Barysaŭ
Moŭnaja prablema
Studenta V kursu hieahrafičnaha fakultetu BDU, lidera Maładoha Frontu Paŭła Sieviarynca, jaki sioleta musiŭ skončyć navučańnie na specyjalnaści «hiealohija», 15 červienia nie dapuścili da abarony svajoj dyplomnaj pracy «Burštyn Biełarusi». Dekan fakultetu, Ivan Pirožnik, nie dazvoliŭ abaraniać dyplom, napisany biełaruskaj movaj u klasyčnym (taraškievickim) pravapisie.
Usie specyjalisty-hieolahi, jakija ŭvachodzili ŭ kamisiju, u tym liku i akademik R.Harecki, dyplom da abarony byli dapuskali. Jašče śviežaja historyja z hazetaj «Naša Niva», jakaja vyjhrała sud u Dziaržkamdruku za prava vydavacca klasyčnym pravapisam. Ale Ministerstva adukacyi — inšaja parafija. Ciapier Paŭłu Sieviaryncu, jaki maje amal usie vydatnyja ekzamenacyjnyja adznaki za 5 hadoŭ navučańnia, pahražaje adličeńnie z universytetu.
B.T.
Pačalisia letniki
Asacyjacyja demakratyčnych nastaŭnikaŭ «Sonca maładzikovaje» z Žodzina, jakaja dziejničaje ŭ miežach tamtejšaha adździaleńnia TBM-TBŠ, praviała 18-19 červienia skaŭcka-falklorny letnik dla žodzinskaj i barysaŭskaj moładzi. U pieršy dzień adbylisia skaŭckija spabornictvy ŭ lesie, na druhi dzień falklornyja kalektyvy restaŭravali śviata «Troica» pavodle staradaŭniaha zvyčaju na placoŭcy školnaha letniku.
BARS