Vybary patanuli ŭ falsyfikacyjach

Vybary patanuli ŭ falsyfikacyjach,
zajaŭlajuć u štabie bajkotu

Centravybarkam paśla praciahłych vahańniaŭ usio ž abvieściŭ ab tatalnym udziele biełarusaŭ u vybarach. Aficyjnyja źviestki na 23 hadziny vyhladali nastupnym čynam: Bieraściejskaja vobł. — 61%, Viciebskaja — 61%, Homielskaja — 64%, Horadzienskaja — 67%, Mahiloŭskaja — 62%, Mienskaja — 62% — apošniaja ličba biez uliku stalicy, dzie na 18 hadzinaŭ da urnaŭ pryjšło 38,8% vybarcaŭ, a na 20 hadzinaŭ źviestak nie było. Napeŭna, Centravybarkam vahaŭsia, pastavić 51 ci 52%. Ahułam ža vybary pavodle papiarednich źviestak adbylisia ŭ 96 z 110 akruhaŭ.

Bajkot adnaznačna byŭ padtrymany ŭ vialikich haradach. Vidavočna pravalilisia vybary ŭ Miensku, nie zvažajučy na toje, što a 15 hadzinie ŭ kamisii pastupiŭ zahad iści z urnami “ŭ masy”. U štabie bajkotu nam skazali, što da damoŭ 109 i 111 na pr.Skaryny padhaniali navat aŭtobusy, kab zavabić ludziej u kabinki. Asnoŭnyja metady falsyfikacyi raniejšyja, zajavili ŭ štabie bajkotu na pres-kanferencyi ŭnačy ź niadzieli na paniadziełak: zanižeńnie ahulnaje kolkaści vybarcaŭ, źjaŭleńnie “miortvych dušaŭ”, spekulacyja vynikami daterminovaha hałasavańnia dy elementarnaja padtasoŭka.

U Bychaŭskim rajonie, jak paviedamili ŭ Centralnaj kaardynacyjnaj radzie dla nazirańnia za vybarami, zafiksavana rekordnaje źjaŭleńnie vybarcaŭ — 99,4%!U Stolinskim rajonie, zvažyŭšy na słabuju aktyŭnaść vybarcaŭ, pavodle kamandy z centru, aperatyŭna vyjechali “hrupy zabieśpiačeńnia vojevyjaŭleńnia narodu”. Pa Staŭpieckim rajonie jeździli niejkija ludzi dy prasili babulek pastavić svoj podpis u vybarčym rejestry: biuleteniaŭ na vočy tam nichto nia bačyŭ.

Apazycyja zajaŭlaje, što realna da urnaŭ pryjšło 45%, u haradach z nasielnictvam ad 50 000 čałaviek — krychu bolej za 35%. Ułady śviatkujuć pieramohu svaich kandydataŭ.

Vyhladaje, što i bajkot udaŭsia, i pałatu pryznačyli.

A.P.