Śviatłana Kurs. Skončyła viek

Skončyła viek

31 śniežnia 2000 h. skanała Viera Cierlukievič. Jana nie stupiła razam z nami ŭ Treciaje Tysiačahodździe, adnak na svaje chaŭtury sabrała mnostva lu-dziej.

2 studzienia trunu ź ciełam pryvieźli da padjezdu doma na Rozačcy, dzie j adbyłosia adpiavańnie j raźvitańnie. Jaje maleńkaja kvatera nie ŭmiaściła b i dziasiataj častki jaje siabroŭ. Schudnieły, zžaŭcieły tvar spn.Viery byŭ zakinuty ŭ nieba. Jaje ź ciažkaściu možna było paznać. Rak straŭnika źjeŭ za try miesiacy… Siabry dastavali joj narkotyki, z-za jakich u apošnija dni jana ŭžo nikoha nie paznavała.

Adpiavaŭ a.Leanid Akałovič, psalmy j “Mahutny Boža” śpiavaŭ chor pad kiraŭnictvam Alaksieja Haliča. Kvietki, śviečki, sum.

Raźvitalnyja słovy skazali Mikoła Ancypovič, Vincuk Viačorka, Valancin Hołubieŭ, Jury Chadyka, Aleś Čacholski.

Jašče ŭ lutym 2000 h. spn.Viera padała ŭ sud na Zimoŭskaha za abrazu honaru j hodnaści tysiačaŭ udzielnikaŭ Maršu Svabody, enerhična ŭdzielničała ŭ pracesie, adnak sud vyrašyŭ, što “admarozak” – prosta epitet, całkam dapuščalny dla biełaruskaj žurnalistyki.

Viera Cierlukievič pachodziła sa źniščanaj Čarnobylem vioski Vysoki Borak Krasnapolskaha rajonu. Siabry kažuć, jana jeździła na viaskovyja mohiłki štohod. Na chaŭturach siabry zadumalisia, što ž zahubiła Vieru ŭ 59 hadoŭ? Čarnobyl? Praca na traktarnym zavodzie? Padzieńnie z kranu j kalectva? Strajki, haładoŭki, turma, štrafy, zmahańnie z majoram Hirelem i inšymi milicyjantami? Žyćcio jaje nie było lohkim. I da pieramohi zdarovaha rozumu ŭ Biełarusi jana nie dažyła.

Chaj ža z vyšyni naziraje za našym zmahańniem i pieramohami. My budziem pamiatać jaje — biasstrašnuju Vieru.

Śviatłana Kurs