BIBLIJATEKA

---

 BIBLIJATEKA

---

Apošnija knihi staroha tysiačahodździa

Biełaruskija vydaŭcy imknulisia vydać da kanca staroha tysiačahodździa jak maha bolej knih, kab sustreć novy viek biez starych zabaviazańniaŭ pierad knihalubami. Inakš ciažka vytłumačyć amal biaskoncuju płyń novych vydańniaŭ, što apošnimi tydniami paliłasia ŭ mienskija kniharni – štodnia na palicach źjaŭlajucca adna-try novyja knihi. Heta ciešyć. Viadoma, siarod zhadanych tutaka knih vy znojdziecie zusim vam niepatrebnyja. Ale i jany — biełaruskija.

Čytajcie. Vybirajcie. Šukajcie ŭ kniharniach – i nabyvajcie.

Peryjadyčnyja vydańni pieražyvajuć u nas nie najlepšuju paru. Niedziaržaŭnyja zadychajucca ad niastačy hrošaj, dziaržaŭnyja — ad unutranaj cenzury.

Arche: Słoŭnik Svabody. № 7 (12), 2000. – Miensk, 2000. – 208 s. – Nakład 1500 as. ISSN 1392-9682

Hety numar časapisu — vynik prajektu Radyjo Svaboda, na chvalach jakoha štodnia ciaham 1999 h. hučeła prahrama «Słova dnia». Pieršym prahučeła słova «Boh», apošnim – «Słova», ahułam słoŭ 365 – kolki dzion u hodzie. U prajekcie ŭziali ŭdzieł 36 aŭtaraŭ, spasiarod jakich R.Baradulin, U.Arłoŭ, Z.Bartosik, Ju.Bušlakoŭ, Z.Paźniak, S.Sokałaŭ-Vojuš, A.Łukašuk, S.Šupa.

U niekatorych kniharniach źjaviŭsia ŭ prodažy taksama vośmy numar Arche – čarhovy analityčna-krytyčny ahlad “Skaryna” z artykułami Sakrata Janoviča, Andreja Jekadumava, Jurasia Łaŭryka, Ludmiły Rubleŭskaj, Ryčarda Pajpsa, Siarhieja Astraŭcova, Jurja Andruchoviča, Alesia Arkuša, Nadziei Sadzikavaj, Antonija Zapałoty. Temy numaru – Vasil Bykaŭ, stalicy i pravincyi, moda na “lićvinizm”, pahrozy Rasiei, kult miortvych u sučasnaj Biełarusi.

Viciebski sšytak: Histaryčny navukova-papularny časapis. № 4, 2000. – Viciebsk, 2000. – 224 s.: ił. – Nakład 250 as.

Časapis vychodzić z 1995 h. Vyjšli čatyry numary. U hetym numary Ł.Chmialnickaja daśleduje žyćciapis i radavod Alaksieja Sapunova, jaki, aproč vyvučeńnia biełaruskaje daŭniny, byŭ jašče j deputatam III Dziaržaŭnaje Dumy Rasiejskaj Imperyi. Pra kolišnija šlachieckija siadziby Viciebščyny piša A.Chviedaruk. Zdraŭniova Repina – abjekt zacikaŭleńnia V.Šyšanava, jaki na fonie starych fatazdymkaŭ z budzionnaha žyćcia Zdraŭniova raskazvaje pra los siamji Repinych u Savieckaj Biełarusi. Hetaksama ŭ časapisie znojdziecie matarjały da žyćciapisu mastaka A.Minina.

Kantakty j dyjalohi: Biuleteń «Mižnarodnaj asacyjacyi biełarusistaŭ» dy «Biełaruskaha tavarystva družby j kulturnaje suviazi z zamiežnymi krainami». № 11-12 (59-60). – Miensk, 2000. – 64 s.: ił. – Nakład 299 as.

Siarod matarjałaŭ numaru – narys U.Hałuzy «Čatyry stahodździ ŭdziełu biełaruskaje dyjaspary ŭ farmavańni socyjumu Sibiry», tekst H.Kisialova «Francišak Skaryna j Aŭchim Laleviel». Aproč taho, chronika biełarusaznaŭčaha žyćcia j recenzii na novyja knihi.

Spadčyna. № 4 (141), 2000. – Miensk, 2000. – 224 s.: ił. – Nakład 1548 as. ISSN 0236-1019

Nie pakińcie pa-za ŭvahaju radyjnych prahram Jurki Vićbiča «Naša spadčyna pramaŭlaje», pakładzienych na papieru i ŭpieršyniu nadrukavanych u hetym numary «Spadčyny». Kaštuje 950 r.

Frahmenty filazofii, kulturalohii, litaratury: Eŭropa j jaje Inšyja. № 3-4 (9), 2000. – Miensk, 2000. – 304 s. ISSN 1648-0651

Epocha: Listapad 2000 h. – Miensk, 2000. – 82 s.: ił.

Samy cikavy matarjał numaru – narys pra pažary «Pa načoch na papiališčy vyli sabaki».

 

Nadoječy vyjšła kolki kaniečna patrebnych i hruntoŭnych mastactvaznaŭčych knih.

V.Šmataŭ. Mastactva biełaruskich staradrukaŭ (XVI – XVIII st.). – Miensk: Technalohija, 2000. – 131 s.: (20) ark.ił. – Nakład 370 as. ISBN 985-6234-93-Ch

Viktar Šmataŭ – znaŭca biełaruskaje hraviury Siaredniaviečča. Kniha padsumoŭvaje daśledavańni mastackaj azdoby biełaruskich staradrukaŭ. Jahonaja papiaredniaja kniha pra knižnuju hraviuru adrazu pa vyjści ŭ siaredzinie 1980-ch stałasia redkaściu. Zvažajučy na nakład, varta paśpiašacca z nabyćciom hetaha falijantu – kaštuje 11,5 t.r. i pradajecca tolki ŭ kniharni “Techna” ŭ Akademii mastactvaŭ.

Tkactva: Zbornik matarjałaŭ pa biełaruskim narodnym tkactvie / Układ. V.Łabačeŭskaja. – Miensk: Biełaruski instytut prablem kultury, 1999. – 100 s.: ił. – Nakład 500 as. ISBN 985-6138-04-3

U knizie sabrany artykuły navukovaha, histaryčnaha j metadyčna-praktyčnaha charaktaru. Meta knihi – pryciahnieńnie da vyvučeńnia j źbieražeńnia hetaha tradycyjnaha vidu narodnaje tvorčaści jak maha šyrejšaha koła ludziej.

 

Kulturalahičnyja prablemy razhladajucca ŭ pracach, pryśviečanych vusnaj narodnaj tvorčaści j pytańniam suśvietnaje kultury.

Biełaruskija zahadki: Daśledavańnie žanru. – Miensk: Biełaruski knihazbor, 2000. – 80 s. – Nakład 150 as. ISBN 985-6038-01-1

Kompleksna razhladajucca biełaruskija zahadki jak žanar narodnaje tvorčaści: funkcyjanalnyja admietnaści, klasyfikacyja, hukapis, hramatyka zahadak, ichnaja suviaź ź inšymi žanrami falkloru.

M.Krukoŭski. Filazofija kultury: Uvodziny ŭ tearetyčnuju kulturalohiju: Navuč. dapamožnik. – Miensk: Universyteckaje, 2000. – 192 s. – Nakład 1000 as. ISBN 985-09-0363-9

Raskryvajucca asnoŭnyja prablemy tearetyčnaje kulturalohii. Dla studentaŭ filazafičnych i kulturalahičnych specyjalnaściaŭ VNU. Cana – 2,2 t.r.

A.Aksamitaŭ. Prykazki j prymaŭki: Tłumačalny słoŭnik biełaruskich prykazak i prymavak z archivaŭ, katedralnych zboraŭ, redkich vydańniaŭ XIX i XX st. – Miensk: Biełaruskaja navuka, 2000. – 320 s. – Nakład 1000 as. ISBN 985-08-0315-0

Skarby narodnaje tvorčaści rassypany nia tolki pa vioskach dy chutaroch, ale j lažać pad pyłam archiŭnych schoviščaŭ i biblijatek. Strusiŭšy pył z papak dy falijantaŭ vilenskich, londanskich, mienskich, krakaŭskich i pieciarburskich archivaŭ, A.Aksamitaŭ vybraŭ najcikaviejšyja ŭzory biełaruskich prykazak i prymavak z rukapisnych pomnikaŭ minułych stahodździaŭ. Balšynia prykładaŭ pachodzić z abšaraŭ Zachodniaje j Centralnaje Biełarusi dy Paleśsia.

 

Biełaruskija historyki praciahvajuć zajmacca aśvietnaj pracaj.

Baćkaŭščyna: Zbornik histaryčnaje litaratury: Dla siaredniaha j starejšaha školnaha vieku / Układ., pradmova S.Paniźnika; mastak A.Zvanaroŭ. – Miensk: Junactva, 2000. – 382 s.: (8) ark.ił. – Nakład 5000 as. ISBN 985-05-0353-3

Jak vyjaŭlajecca chryścijanski śvietahlad u tvorčaści biełaruskich piśmieńnikaŭ ad staražytnaści da našaha času – najlepiej adlustravana ŭ pryśviečanym hetaj temie zborniku histaryčnaje litaratury “Baćkaŭščyna”.

Historyja Biełarusi ad staražytnaści da XXI st.: Karotki narys. – Miensk: Lekcyja, 2000. – 80 s. – Nakład 400 as. ISBN 985-6305-21-7

Koratka razhladajucca najvažniejšyja padziei, što adbyvalisia na našych ziemlach z dahistaryčnych časoŭ dasiońnia.

Historyja Biełarusi: Navučalny dapamožnik. U 2-ch častkach. Č.1. Ad staražytnych časoŭ – da lutaha 1917 h./ A.Novik, H.Marcul, I.Kačałaŭ dy inš.; Pad red. A.Novika, H.Marcula; 2-je vyd., pierapracavanaje j dapoŭnienaje. – Miensk: Universyteckaje, 2000. – 416 s.: ił. – Nakład 6000 as. ISBN 985-09-0351-1

Niepiśmiennaje i tendencyjnaje vydańnie.

A.Višnieŭski, I.Višnieŭskaja. Historyja dziaržavy j prava Biełarusi. – Miensk: Fiłserva-plus, 2000. – 134 s. – Nakład 1000 as. ISBN 985-6489-17-7

Koratka pra najhałaŭniejšyja etapy raźvićcia jurydyčnaje navuki ŭ našym krai. Dla studentaŭ.

A.Kłyška. Francysk Skaryna, albo Jak da nas pryjšła kniha / 2-je vyd. – Miensk: Połymia, 2000. – 96 s.: ił. – Nakład 7000 as. ISBN 985-07-0315-6

A.Kłyška napisaŭ knihu, kab raskazać dzietkam, jak da nas pryjšła kniha dy chto jaje prynios. Cana 300 r.

Christianstvo v Biełarusi: Istorija i sovriemiennosť/ T.Korotkaja, A.Osipov, V.Tiepłova. – Miensk: Moładzievaje nav. tav-va, 2000. – 72 s. – Nakład 3000 as. ISBN 985-6609-14-3

 

Niečakana mnoha ŭ śniežni, paraŭnalna ź inšymi miesiacami, źjaviłasia knih z krajaznaŭstva. Ciešać hetkimi kaladnymi padarunkami nia tolki mienskija vydaviectvy, ale j varšaŭskija kalehi.

Viciebščyna: Nazovy nasielenych punktaŭ pavodle lehiendaŭ i padańniaŭ/ Składańnie, zapis i aprac. A.Nienadaŭca. – Miensk: Biełaruś, 2000. – 475 s.: ił. – (Moj rodny kut). – Nakład 2000 as. ISBN 985-010107-5

A.Karlukievič. I viekaviečny tolki kraj. – Miensk: Połymia, 2000. – 384 s.: ił. – Nakład 2000 as. ISBN 985-07-0200-1

Redaktar «Čyrvonaje źmieny» raskazvaje pra ŭradžencaŭ Biełarusi, jakija svaimi spravami j talentami ŭsłavili Baćkaŭščynu i inšyja krai. Cana 700 r.

A.Karlukievič. Ihumienski blaknot: Krajaznaŭčyja zamaloŭki. – Miensk: Biełaruski knihazbor, 2000. – 80 s. – Nakład 350 as. ISBN 985-6318-89-0

Aleś Karlukievič daśleduje historyju jahonaje rodnaje Ihumienščyny.

A.Sieržputoŭski. Kazki j apaviadańni biełarusaŭ Słuckaha pavietu/ Mastak V.Miščanka. – Miensk: Universyteckaje, 2000. – 270 s. – (Poviaź viakoŭ). – Nakład 2400 as. ISBN 985-09-0361-9

Heta pieradruk tekstaŭ adnajmiennaje knihi, što była vydadziena Instytutam biełaruskaje kultury ŭ 1926 h. u Leninhradzie. Cana 850 r.

V.Tumaš. Kultura ziamli Astravieckaj: Asoby j tvory: Bijahrafičny daviednik. – Miensk: Biełaruski knihazbor, 2000. – 24 s.: ił. – Nakład 500 as. ISBN 985-6638-02-Ch

Źmieščany bijahrafii j partrety najsłavuciejšych ludziej uskrajku biełaruskaje Vilenščyny.

H.Enhielkinh, H.Ruščyk. Paleśsie: Fatazdymki 20-ch i 30-ch hadoŭ / Pad red. H.Vaščanki, U.Niaklajeva; Pier. z polskaje V.Viareniča i N.Vaščanki. – Varšava: Argraf, 1999. – 256 s.: ił. ISBN 83-85938-58-3

Albom 200 z hakam fatazdymkaŭ ź mižvajennaha času pra pobyt nasielnikaŭ Paleśsia ŭpieršyniu vyjšaŭ kolki hadoŭ tamu pa-polsku, a ciapier – u pierakładzie na biełaruskuju. Kniha padrychtavana Instytutam mastactva Polskaj akademii navuk supolna z Katedraju biełaruskaje kultury Biełastockaha ŭniversytetu. Kaštuje 11 t.r.

U.Cejkin. Raduha: Krajaznaŭčy narys. – Miensk: Piejto, 2000. – 40 s. – (“Viedać svoj kraj Biełaruś”). – Nakład 500 as. ISBN 985-6024-28-5

Što my viedajem pra vietkaŭskuju viosku Raduhu? Z hetaj brašurki my daznajemsia pra žyćcio zabytaha Boham kutka čarnobylskaje Biełarusi.

U.Łukša. Staražytny Połacak. – Miensk: Biełaruski knihazbor, 2000. – 32 s.: ił. – Nakład 550 as. ISBN 985-6318-93-9

Vialejski mastak Uładzimier Łukša sabraŭ i vydaŭ albomam svaje zamaloŭki baćki biełaruskich haradoŭ, azdoblenyja vieršami pałačanina Navuma Halpiaroviča.

Chryścijanskija chramy Biełarusi na fatazdymkach Jana Bałzukieviča: Pačatak XX st. / Układ. A.Kułahin, U.Hierasimovič; Pa-bieł. j pa-anh. – Miensk: Uradžaj, 2000. – Nakład 2000 as. ISBN 985-04-0048-Ch

U hetym vydańni sabrana 165 fatazdymkaŭ Jana Bałzukieviča, na jakich adlustravany katalickija j pravasłaŭnyja bažnicy kraju, pałova ź jakich užo nie isnuje. Kaštuje kniha ŭsiaho 1 t.r. z hakam i nieŭzabavie stanie biblijahrafičnaju redkaściu.

Šlacham Vajniłoviča: Da 90-hodździa kaścioła śviatych Symona j Aleny/ Układ. U.Zavalniuk. – Miensk: Biełaruski knihazbor, 2000. – 160 s. – Nakład 500 as. ISBN 985-6638-03-8

Edvard Vajniłovič viadomy jak fundatar mienskaha Čyrvonaha kaścioła, a hetaksama jak adzin z najaktyŭniejšych biełaruskich palitykaŭ 1-je pałovy XX st., prychilnik ščylnaha źviazu z Polščaju. Kniha azdoblena hrafičnymi malunkami miaścin, źviazanych z žyćciom i čynnaściaj E.Vajniłoviča aŭtarstva mastaka Ŭładzimiera Łukšy. U dadatku ŭ knizie źmieščana pjesa «Chram», stvoranaja ŭ duchoŭnym teatry «Anioł».

D.Vaŝukuvna-Kamieniecka. Briest – horod niezabyvajemyj. – Bieraście: Vyd-va S.Łaŭrova, 1999. – 284 s. ISBN 985-6371-56-2

Kniha prasiaknuta «kresovaściaj» – Bieraście, jak i ŭsia mižvajennaja Zachodniaja Biełaruś, razhladajecca vyłučna jak spradviečna polskija abšary. Kniha vydadziena dziakujučy ksiandzu Źbihnievu Karolaku.

A.Fiedoruk. Starinnyje usad́by Minskoho kraja. – Miensk: Palifakt – Lekcyja, 2000. – 416 s.: ił. – (“Starinnyje usad́by Biełarusi”). – Nakład 500 as. ISBN 985-6107-24-5

Vydaviectvy “Palifakt” i “Lekcyja” z dapamohaju fundušu litaratara j biznesoŭca z Dudutak A.Budzinasa raspačali vydańnie seryi knih “Daŭnija siadziby Biełarusi”. Aŭtar – A.Chviedaruk – najlepšy znaŭca pryvatnych siadzib i pałacaŭ kraju. Pieršaja kniha seryi pryśviečana siadzibnamu dojlidztvu Mienščyny. Poruč z najbujniejšymi pałacava-parkavymi ansamblami ŭ Snovie, Vałožynie, Ravanavičach, Niaśvižy havorycca pra małaviadomyja siadziby, daŭnija parki. Vykanana navukova-mastackaja rekanstrukcyja planaŭ 40 siadzib, u tym i słavutaje Radziviłavaje Alby. Aryhinalnyja malunki, dakumentalnyja fatahrafii. Kaštuje hetki falijant 40 t.r.

 

Śniežań staŭsia «zornym» miesiacam historyka j litaratara Ŭładzimiera Arłova. Boh padaryŭ U.Arłovu ažno čatyry knihi, što adnačasna vyjšli ŭ vydaviectvach Biełastoku, Vilni j Miensku.

U.Arłoŭ. Adkul naš rod: Apaviadańni z historyi Biełarusi dla małodšych školnikaŭ; pradmova R.Baradulina; mastak V.Staščaniuk/ 2-je vyd., dapoŭnienaje. – Vilnia: Naša Budučynia, 2000. – 127 s.: ił. – Nakład 5000 as. ISBN 9986-9228-9-5

Pieršaje vydańnie hetaje knihi dla dziaciej pra historyju Biełarusi źjaviłasia ŭ mienskim vydaviectvie «Baćkaŭščyna» ŭ 1996 h. jak «litaraturna-mastackaje vydańnie». Hetaje, druhoje, vydańnie maje «navukova-papularny», značna dapoŭnieny źmiest. Kniha pavialičana na 21 staronku. U adroźnieńnie ad pieršaha vydańnia, usie ilustracyi kalarovyja. Źjavilisia novyja raździeły pra Smalenskaje kniastva, Vialikaha hietmana Jana Karola Chadkieviča, vynachodnika Kazimiera Siemianoviča, Bahuševiča, Bahdanoviča, biełaruskaje Adradžeńnie, BNR. Źnik raździeł pra Kryčaŭskaje paŭstańnie siaredziny XVII st. Pradmovu da pieršaha vydańnia napisaŭ historyk Pavał Łojka, da novaha – Ryhor Baradulin.

U.Arłoŭ, H.Sahanovič. Dziesiać viakoŭ biełaruskaj historyi (862 – 1918). Padziei. Daty. Ilustracyi; 2-je vyd. – Vilnia: Naša Budučynia, 2000. – 223 s.: ił. – Nakład 5000 as. ISBN 9986-9219-8-8

Hetaja kniha była pradadziena za paŭtara miesiaca na pačatku 2000 hodu ŭ liku 5 tys. asobnikaŭ. Možna mierkavać, što hetkaja sama dola čakaje j novy nakład knihi papularyzatara historyi U.Arłova j znaŭcy Siaredniaviečča H.Sahanoviča.

Eŭfrasińnia Połackaja/ Aŭtar-układ. U.Arłoŭ; mast. U.Fanduleŭ. – Miensk: Połymia, 2000. – 272 s. – Nakład 2000 as. ISBN 985-07-0198-6

Na pačatku 1990-ch U.Arłoŭ vydaŭ dźvie amal stereatypnyja knihi pra słavutuju pałačanku – chryścijanskuju aśvietnicu Eŭfrasińniu Połackuju. Hetaje vydańnie ŭdakładniena novymi źviestkami. Pry kancy knihi źmieščany žyćciapis śviatoje dy vieršy biełaruskich paetaŭ, pryśviečanyja apiakuncy našaje ziamli. Kniha vydatna azdoblena j kaštuje ŭsiaho 750 r.

Uładzimier Arłou. Requiem dla piły motorowej/ Wybór i posłowie Jan Maksymiuk. – Áĺëŕńňîę: Związek Białoruski w Rzeczpospolitej Polskiej, 2000. – 260 ń. – (Seria wydawnicza «Biaźmiežža»).

U zbornik uvajšli pierakładzienyja ŭ polskuju movu apoviedy U.Arłova apošniaha dziesiacihodździa.

 

Daviednickaja litaratura zaŭsiody była zapatrabavanaja. Hetym miesiacam vyjšła dźvie knihi, što, možna mierkavać, nieŭzabavie nie zalažacca na palicach kniharniaŭ.

Russko-sierbskij razhovornik/ Rusko-srpski priručnik za konverzaciju/ Avtor-sost. Ł.Vorobiej. – Miensk: Biełaruski knihazbor, 2000. – 440 s. – Nakład 1000 as. ISBN 985-6318-90-4

Źmiaščaje bolš jak 5 tysiač słoŭ i vyrazaŭ. Pryznačany pieradusim turystam, jakija naviedvajuć Serbiju.

Słoŭnik asabovych imionaŭ: Biełaruska-rasiejski j rasiejska-biełaruski / układ. U.Saroka; nav.red. M.Kryŭko. – Miensk: Tesej, 2000. – 280 s. – Nakład 1000 as. ISBN 985-6454-80-8

Upieršyniu ŭ niezaležnaj Biełarusi vychodzić hetki daviednik. (Papiaredni «Słoŭnik asabovych ułasnych imion» byŭ vydadzieny ŭ 1966 h.) Aŭtar nie adyšoŭ ad niekatorych “kanservatyŭnych” pryncypaŭ savieckaha movaznaŭstva. Za raŭnapraŭnyja razhladajucca, napr., jak formy “Jaŭhien” dy “Anton”, hetak i “Jaŭhieni” dy “Antoni”. “Vincuk” razhladajecca jak hutarkovy varyjant imia “Vincent”. Aŭtar knihi pajšoŭ šlacham pieradavańnia niekatorych biełaruskich imion pa-rasiejsku z zachavańniem ichnaje aŭtentyčnaje formy, prykładam: “Źmicier – Źmitier”. Kaštuje 2,5 t.r.

Chto jość chto siarod biełarusaŭ śvietu: Encyklapedyčny daviednik. Č.1. Biełarusy i ŭradžency Biełarusi ŭ pamiežnych krainach / Red. kalehija: A.Maldzis dy inš. – Miensk: Encyklapedyks, 2000. – 300 s. – Nakład 1000 as. ISBN 985-6599-17-2

Matarjał daviednika zhrupavany ŭ čatyroch raździełach: ahulnyja artykuły, biełaruskija arhanizacyi, peryjadyčnyja vydańni, persanalii. U raździeł “Persanalii” łučyli jak dziejačy biełaruskaje dyjaspary, hetak i ŭradžency kraju – biełarusy, rasiejcy, palaki, litoŭcy, žydy, tatary. U chranalahičnym planie ŭvaha ŭ daviedniku zasiarodžana na biełaruskaj dyjaspary XX st., u raździeł “Persanalii” łučyli hetaksama matarjały ChVI – XIX st.

 

Navinki movaznaŭstva pryznačany pieradusim specyjalistam.

I.Čarota. Biełaruskaja mova j carkva. – Miensk: Śviata-Pietra-Paŭłaŭski sabor, 2000. – 176 s. – Nakład 250 as. ISBN 985-6594-02-2

Słavianafił I.Čarota sprabuje akreślić charaktar dačynieńniaŭ pravasłaŭnaje carkvy j biełaruskaje movy. Razhladajucca pytańni historyi j teoryi pierakładu Śviatoha Piśma na biełaruskuju movu. Kniha pradajecca ŭ hałoŭnym korpusie Akademii navuk.

Biełaruskaja linhvistyka: Vypusk 49 / Instytut movaznaŭstva imia Ja.Kołasa NAN Biełarusi; red.kalehija: A.Padłužny (adkazny redaktar) dy inš. – Miensk: Biełaruskaja navuka, 2000. – 95 s. – Nakład 300 as. ISBN 985-08-0311-8

Nie zvažajučy na “dubovuju” movu A.Padłužnaha dy častki jahonych kaleh, u vypuskach “Biełaruskaje linhvistyki” možna zaŭsiody znajści karysnyja źviestki z historyi j ciapierščyny biełaruskaje movy – ad analizu staražytnych tekstaŭ da natatak z kultury movy j dyjalektalohii.

 

Amal štomiesiaca źjaŭlajecca niejkaja novaja kniha ź litaraturaznaŭstva.

Ł.Uładykoŭskaja-Kanaplanik. Akvareli lubovi: Kancepcyja nacyjanalnaha śvietapohladu ŭ tvorčaści Janki Łučyny. – Miensk: Encyklapedyks, 2000. – 126 s. – Nakład 200 as. ISBN 985-6599-18-0

Historyja biełaruskaje litaratury: XX stahodździe (20–50-ja): Padručnik/ U.Hniłamiodaŭ, V.Kazłova, M.Łazaruk dy inš.; Pad ahulnaju red. A.Siemianoviča/ 2-je vyd., dapracavanaje j dapoŭnienaje. – Miensk: Vyšejšaja škoła, 2000. – 511 s. – Nakład 6000 as. ISBN 985-06-0492-1

Pieršaje vydańnie knihi vyjšła ŭ 1981 h. z nazovam «Historyja biełaruskaje savieckaje litaratury». Novaje vydańnie pryncypova roźnicca ad papiaredniaha – u im źjavilisia niekali zabaronienyja imiony dy dapisany artykuły pra inšych aŭtaraŭ – toje, što raniej zamoŭčvałasia ci niedahavorvałasia. Kaštuje 1900 t.r.

Uładzimier Karatkievič i jahonaja tvorčaść u eŭrapiejskim kulturnym kantekście: Navuk. zbornik / Red. kalehija: A.Maldzis (hałoŭny redaktar) dy inš. – Miensk: Biełaruski knihazbor, 2000. – 272 s. – (Biełarusika = Albaruthenica, kn.16). – Nakład 300 as. ISBN 985-6318-94-7

Jašče dahetul nam nieviadomaja pałova tvoraŭ U.Karatkieviča – tamu jašče doŭha vychad hetkich zbornikaŭ budzie ciešyć lubcoŭ jahonaj tvorčaści.

Chrestamatyja pa historyi biełaruskaha teatru j dramaturhii. U 3 t. T. 3. 60-ja hady XX st. – 2000 h./ Biełaruski ŭniversytet kultury; układ., red. tekstu, aŭtar ustupnaha artykułu j kament. A.Sabaleŭski; 2-je vyd., pašyranaje i ŭdakładnienaje. – Miensk: Biełaruskaja navuka, 2000. – 478 s. – Nakład 100 as. ISBN 985-08-0359-7

 

U halinie mastackaj litaratury hety miesiac paciešyŭ nas pieravažna klasykaj.

U.Karatkievič. Byŭ. Jość. Budu: Kniha paezii / Pradmova R.Baradulina; 3-je vyd. – Miensk: Mastackaja litaratura, 2000. – 157 s.: (8) ark.ił. – Nakład 3500 as. ISBN 985-02-0088-Ch

Heta ŭžo treciaje vydańnie Karatkievičavaha bestseleru.

A.Razanaŭ. Hlina. Kamień. Žaleza. – Biełastok, 2000. – 96 s. – (Biblijateka Bieł. lit. abjadnańnia “Biełavieža”, kn. 34)

Dyrektar vydaviectva “Mastackaja litaratura” Hieorhi Marčuk, jakoha hazeta “Biełorusskaja niva” razhladaje jak adzinaha kandydata ad… nie, nie ad biełaruskaj apazycyi na Prezydenta, a ad biełaruskaj litaratury na Nobeleŭskuju premiju, zmusiŭ byŭ Alesia Razanava ścisnuć svaje tvory ŭ adzin tomik zamiest planavanych da vydańnia dvuch. A.Razanaŭ vydajecca ciapier u Polščy. Jahony novy zbornik usiaho za 500 r. jašče možna prydbać u staličnaj “Kniharni piśmieńnika”.

R.Baradulin. Zorka spahady: Ramansy. – Miensk: Kovčieh, 2000. – 36 s. – Nakład 500 as. ISBN 985-6056-32-2

Kniha paezii R.Baradulina vyjšła razam z adnajmiennaju kasetaju balad na słovy narodnaha pieśniara ŭ vykanańni Alesia Kamockaha.

S.Zakońnikaŭ. Listam daroha zapała…: Vybranaje. – Miensk: Mastackaja litaratura, 2000. – 278 s.: ił. – Nakład 1200 as. ISBN 985-02-0228-2

Pradmova da knihi była napisana jašče Pimienam Pančankam, pamiorłym u 1995 h. Tutaka vieršy S.Zakońnikava apošnich 30 hadoŭ.

H.Buraŭkin. Pamiž zorkaj i śviečkaj: Vieršy. – Miensk: Baćkaŭščyna, 2000. – 160 s. – Nakład 3000 as. ISBN 985-6026-15-6

Jak zastacca asobaju ŭ hetym žorstkim śviecie, jak nia zdradzić sabie j abaranić hodnaść svaju j svajho narodu – asnoŭnaja tema paezii H.Buraŭkina 1995–97 hh. Cana – 1 t.r.

R.Tarmoła-Mirski. Pryčaście: Paezija. – Miensk: Mastackaja litaratura, 2000. – 288 s. – Nakład 1200 as. ISBN 985-02-0356-0

A.Volski. Śled zaviruchi: Vieršy apošnich hadoŭ. – Miensk: Biełaruski knihazbor, 2000. – 88 s. – Nakład 500 as. ISBN 985-6638-04-6

Apošnija vieršy apošniaha tysiačahodździa doryć čytaču Artur Volski.

A.Piśmiankoŭ. Ja nie pamru, pakul lublu: Vybranaje. – Miensk: Mastackaja litaratura, 2000. – 319 s. – (“Biełaruskaja paezija XX st.”) – Nakład 2000 as. ISBN 985-02-0072-3

U knihu, što vyjšła ŭ prestyžnaj seryi “Biełaruskaja paezija XX stahodździa”, uvajšli vieršy sa zbornikaŭ “Bieły kamień”, “Čytaju zory”, “Planida”.

 

Prozy žyćcia ŭ pieršyja dni śniežnia było mienš, nie zvažajučy na zusim nie paetyčnaje nadvorje.

U.Lipski. Aŭciukoŭcy: Apovieści pra Kalinak dy Kałaskoŭ, jakija harujuć i žartujuć; 2-je vyd., dapoŭnienaje. – Miensk: Bieł. vyd. tav-va “Chata”, 2000. – 308 s.: ił. – Nakład 5000 as. ISBN 985-6007-71-4

Admysłova dla niedaśviedčanych žarty, dościpy j humareski ź lehiendarnaje vioski sabraŭ, apracavaŭ dy vydaŭ dziciačy piśmieńnik U.Lipski, a pradajuć knihu za 1,5 t.r.

T.Bondar. Boh zusim pobač. Staronki ź dziońnika. – Miensk: VP «Łotać», 2000. – 288 s. – Nakład 300 as. ISBN 985-6307-41-4

Redaktarka «Vsiemirnoj litieratury» raskazvaje pra sustrečy z Najvyšejšym – pra duchoŭnaść u biezduchoŭnym śviecie.

Ja.Maŭr. U krainie rajskaj ptuški: Apovieści, apaviadańni: Dla siaredniaha j starejšaha školnaha vieku / Mastak U.Aniśka. – Miensk: Junactva, 2000. – 382 s.: ił. – Nakład 4000 as. ISBN 985-05-0495-5

Tvory Ja.Maŭra z kanca 1920-ch vychodziać šmattysiačnymi nakładami j nie zaležvajucca doŭha na palicach. U novaje vydańnie ŭvajšli klasyčnyja “Syn vady”, “Čałaviek idzie”, “Paleskija rabinzony” dy inšyja apovieści. Kaštuje 500 r. z hakam.

V.Hurski. Chmary nad Mienščynaj. Partyzanskija zhadki. – Miensk: Biellitfond, 2000. – 380 s. – Nakład 100 as. ISBN 985-6576-10-5

Stary biełaruski partyzan zhadvaje pra słaŭnyja hady svaje maładości.

 

Z ahulnaha šerahu knih vypadaje chiba tolki samadruk Aleha Manajeva, vypuščany dziela siabie, siabroŭ i viečnaści.

O.Manajev. Stanovlenije hraždanskoho obŝiestva v niezavisimoj Biełarusi: Sociołohičieskije opyty: 1991 – 2000. – Miensk: Fiłserva-plus, 2000. – 626 s. – Nakład 1000 as. ISBN 985-6489-02-4

 

Asobna varta taksama vyłučyć knižycu, što vyjšła sioleta najbolšym nakładam – 200 tys. asobnikaŭ, a pračytanaja budzie, napeŭna, najmienšaj kolkaściu ludziej.

Usieahulnaja deklaracyja pravoŭ čałavieka. Deklaracyja ab pravie j abaviazku pryvatnych asob, hrup i orhanaŭ hramadztva zaachvočvać dy abaraniać ahulnapryznanyja pravy čałavieka j asnoŭnyja svabody: Vytvorča-praktyčnaje vydańnie; Pa-biełarusku j pa-rasiejsku. – Miensk: Pradstaŭnictva Arhanizacyi Zadzinočanych Nacyj u Respublicy Biełarusi, 2000. – 32 + 32 s. – Nakład 200000 as. ISBN 1-58712-034-8

 

Hetyja knihi nie apošnija ŭ 2000 h. Ja maju na ŭvazie, što vydaŭcy, jak zaŭsiody, zapoźniacca, i niešta, padrychtavanaje sioleta, zastaniecca naleta. Biełaruskaja kniha žyćmie i ŭ trecim tysiačahodździ – razam z movaju j krainaju.

Viktar Muchin