Alaksandr Kvaśnieŭski: «Ja chacieŭ by, kab Eŭraźviaz spryjaŭ dyjalohu ŭ Biełarusi»
Były prezydent Polščy Alaksandar Kvaśnieŭski zaklikaŭ Eŭrapiejski źviaz vypracavać «asobnuju i bolš kankretnuju palityku» u dačynieńni da svaich uschodnich susiedziaŭ, bieručy pad uvahu sytuacyju ŭ Biełarusi. U časie kanferencyi «Eŭraźviaz i prablemy blizkaha susiedztva», jakuju arhanizavała fundacyja Alaksandra Kvaśnieŭskaha «Siabry Eŭropy», były prezydent Polščy zajaviŭ, što abjadnanaja Eŭropa patrabuje «efektyŭnaj palityki» u dačynieńni da svaich susiedziaŭ.
«Ja chacieŭ by, kab Eŭraźviaz spryjaŭ dyjalohu ŭ Biełarusi, jaki pryvioŭ by da demakratyčnych pieramienaŭ u hetaj krainie. Ciapier my majem sytuacyju, kali Biełaruś usio macniej izaluje siabie ŭ Eŭropie, u toj čas, jak kantynent naadvarot — intehrujecca», — adznačyŭ Kvaśnieŭski.
Pavodle jahonych słovaŭ, adsutnaść takoj supolnaj palityki ŭ dačynieńni da dziaržavaŭ Uschodniaj Eŭropy «moža pryvieści da nehatyŭnych nastupstvaŭ i zapavolvańnia reformaŭ».
Kvaśnieŭski padkreśliŭ, što jon «zaniepakojeny apošnimi padziejami va Ŭkrainie», a palityka Rasiei ŭ dačynieńni da krainaŭ Centralnaj i Ŭschodniaj Eŭropy «vyklikaje surjoznuju zaniepakojenaść, jość pamyłkovaj i niebiaśpiečnaj», bo nahadvaje «staryja časy — sfery ŭpłyvu i mocny nacisk na partneraŭ».