Novyja knihi, dasłanyja ŭ redakcyju
№ 10 (219), 5 — 12 sakavika 2001 h.
Novyja knihi, dasłanyja ŭ redakcyju
Ahlad-chronika parušeńniaŭ pravoŭ čałavieka ŭ Biełarusi ŭ 2000 h. – Miensk: HA “Pravaabarončy centar “Viasna”, 2001. – 180 s.
Heta ŭžo treci vypusk štohadovaha “Ahladu-chroniki”. U joj tryma movami – biełaruskaju, anhielskaju j rasiejskaju –pieraličvajucca ŭsie parušeńni pravoŭ čałavieka ŭ našaj krainie za 2000 hod. U paraŭnańni ź minułymi vypuskami “Ahladu”, sioletni našmat taŭściejšy.
R.Baradulin. Bosaja zorka / Mastak H.Hrak; fota S.Šaprana. – Miensk: HA “Biełaruskaje tavarystva “Kniha”, 2000. – 177 s.: ił. – Nakład 1000 as. ISBN 985-6605-04-0
Novaja kniha liryki narodnaha pieśniara nadrukavanaja minijaturnym vydańniem. Kaštuje 2,5 t.r.
A.Kułahin. Pravasłaŭnyja chramy na Biełarusi: Encyklapedyčny daviednik / Mastak I.Boki. – Miensk: Biełaruskaja encyklapedyja, 2001. – 328 s.: ił. – Nakład 3000 as. ISBN 985-11-0140-7
Vyjšła śledam za “Katalickimi chramami na Biełarusi”, što źjavilisia naprykancy minułaha hodu. Kaštuje 3 t.r.
Chryścijanskija chramy Biełarusi na fatazdymkach Jana Bałzunkieviča: Pačatak XX st. / Układ. A.Kułahin, U.Harasimovič. – 2-je vyd. – Miensk: Uradžaj, 2001. – Nakład 2100 as. ISBN 985-04-0399-3
Hetaja kniha, vielmi papularnaja siarod zamiežnych turystaŭ i amataraŭ biełaruskaje daŭniny, vydadzienaja paŭtorna j kaštuje pad 5 t.r.
M.Ułaščyk. Vybranaje / Układ. A.Kaŭka j A.Ułaščyk; Navuk. red. H.Kisialoŭ i V.Skałaban; Pradm. i kament. A.Kaŭki; Pakaz. imion N.Mazoŭki. – Miensk: Biełaruski knihazbor, 2001. – 608 s. (8) s.: ił. – (“Biełaruski knihazbor”; histaryčna-litaraturnyja pomniki). – Nakład 3200 as. ISBN 985-6638-08-9
Mikałaj Ułaščyk (1906–1986) – historyk, byŭ represavany jak “nacdem” i źviedaŭ usie kruhi hułahaŭskaha piekła. Pa vajnie žyŭ i pracavaŭ u Maskvie. U knizie źmieščany histaryčna-krajaznaŭčy narys pra rodnuju Ŭłaščykavu viosku Vickaŭščynu, uvodziny da manahrafii “Narysy z archieahrafii j krynicaznaŭstva historyi Biełarusi feŭdalnaha peryjadu”, recenzii na vyznačalnyja navukovyja pracy z historyi Biełarusi, vydadzienyja ŭ siaredzinie XX st., “Natatki pra badziańni ŭ 1924–1929 hadoch”, aŭtabijahrafičnyja zapisy M.Ułaščyka. Kaštuje kniha pad 3 t.r.
Kalektyŭ aŭt. Druvinhaŭ śvietaciam. – Miensk: 2000.
Nieviadomyja aŭtary robiać sprobu adšukać vytoki našaha narodu ŭ jahonaj dachryścijanskaj minuŭščynie. Pra nabyćcio knihi možna daviedacca praz adrasy: 220050, Miensk, a/s 342 abo: gega@europe.com
V.Dadzijomava. Narysy historyi muzyčnaje kultury Biełarusi: Navučalny dapamožnik. – Miensk: Biełaruskaja dziaržaŭnaja akademija muzyki, 2000. – 256 s. – Nakład 500 as. ISBN 5-7815-0299-8
Kniha, pryśviečanaja muzyčnaj kultury Biełarusi ad Ch da XIX st., stałasia vynikam šmathadovaje pracy aŭtarki ŭ archivach Biełarusi, Ukrainy, Rasiei, Polščy, Niamieččyny j Belhii. Dziakujučy rupnaści Volhi Dadzijomavaj, Biełarusi viernutyja imiony słavutych kampazytaraŭ Michała Kazimiera Ahinskaha, Michała Kleafasa Ahinskaha, Macieja Radziviła, Lavona Sitanskaha, Vosipa Kazłoŭskaha, Stanisłava Maniuški, vyjaŭlena mnostva dahetul nieviadomych pomnikaŭ muzyčnaje kultury. Knihu možna nabyć u mienskaj siadzibie BNF “Adradžeńnie”.
V.Panucevič. Śviaty Jazafat, archijapiskap połacki / Aprac. i ŭkład. M.Baŭtovič. – Połacak: Safija, 2000. – 274 s. – Nakład 1000 as. ISBN 985-6448-11-5
U knizie, napisanaj biełaruskim emihracyjnym historykam Vacłavam Panucevičam, raspaviadajecca pra žyćcio, dziejnaść i kananizacyju arcybiskupa Jazafata Kunceviča (1580–1623).U dadatku – kolki cikavych dakumentaŭ. Knihu možna nabyć u mienskaj siadzibie BNF “Adradžeńnie”.