Łukašenka ŭ Alpach

Łukašenka ŭ Alpach

Alaksandar Łukašenka ŭziaŭ tydniovy adpačynak, jaki praciahniecca da 18 sakavika. Dzie i jak jon jaho bavić, spačatku nie paviedamlałasia. Ale prezydencki samalot pabačyŭ u vienskim aeraporcie adzin ź pilotaŭ avijakampanii “Biełavija”. Radyjo “Svaboda” pačało kapać — i źviestki pra toje, što Łukašenka ŭ Aŭstryi, paćvierdziŭ premjer-ministar Hienadź Navicki. Darečy, sam jon u hety čas nie vykonvaje prezydenckich abaviazkaŭ: “Kanstytucyja hetaha nie praduhledžvaje”, — miarkuje jon.

Ciapier asnoŭnyja sprečki iduć vakoł taho, što Łukašenka ŭ Aŭstryi robić i dzie mienavita jon tam adpačyvaje. Aficyjnyja krynicy kažuć, što jon “zajmajecca sportam”. U Aŭstryi šmat darahich harnałyžnych kurortaŭ, na jakich lubiać byvać jak arabskija šejchi, tak i kiraŭniki azijackich krainaŭ SND. Padčas apošniaha samitu lideraŭ SND u Ałmaty Łukašenka vykazvaŭ zacikaŭleńnie hornymi łyžami. Radyjo “Svaboda” vykazvaje padazreńnie, što tajm-aŭt kiraŭnika dziaržavy źviazany ź nieabchodnaściu padlačycca: pavodle adnych čutak, Łukašenku dajmaje chvaroba prastaty, zhodna z druhimi — hałaŭnyja boli. Adnak hetuju infarmacyju nidzie nichto nie paćvierdziŭ.

Niama pakul i adkazu na pytańnie, za svaje hrošy adpačyvaje ŭ Aŭstryi Łukašenka ci za dziaržaŭnyja, a taksama jaki štat achovy i absłuhi znachodzicca ź im u dunajskaj respublicy. Telefony biełaruskaha pasolstva ŭ Vienie maŭčać. Aŭstryjskaje MZS nie ŭpaŭnavažanaje davać kamentary ab pryvatnych vizytach.

Pa našych źviestkach, dziaržaŭnym hazetam uvohule zabaranili pisać na temu hornaha adpačynku Łukašenki, kab nie psavać vobrazu kiraŭnika dziaržavy.

B.T.