Papa pakul nie pryjedzie

Papa pakul nie pryjedzie

Sustrecca z Papam u Krakavie, na jahonaj radzimie, pryjechali dva miljony pilihrymaŭ ź dziasiatkaŭ krainaŭ. Prysutničali prezydenty Polščy, Litvy i Słavaččyny. Jeździli ŭ Krakaŭ i biełaruskija kataliki. Na ich bieł-čyrvona-biełych transparantach byŭ nadpis “Biełaruś čakaje!”. Papa naviedaŭ Litvu, Ukrainu, nieadnarazova Polšču. Tolki Biełaruś pakul abminaje, choć rehularna źviartajecca pa-biełarusku da pilihrymaŭ. Pryčyna prostaja: Papa — kiraŭnik Vatykanu, niezaležnaje dziaržavy, i jahony vizyt moža adbycca tolki na zaprašeńnie kiraŭnika inšaje krainy. Tym bolš niečakanym stałasia paviedamleńnie “Gazet'y Wyborcz'aj”: mitrapalit mienska-mahiloŭski, kardynał Kazimier Śviontak zajaviŭ, što Alaksandar Łukašenka zacikaŭleny ŭ vizycie Jana Paŭła II u Biełaruś.

Presavy sakratar Ministerstva zamiežnych spravaŭ Pavał Łatuška hetuju infarmacyju kateharyčna abvierhnuŭ: “Pieramovy pra mahčymy pryjezd Papy ŭ Biełaruś siońnia nie viaducca i ŭ najbližejšym časie nie planujucca”. Vikarny namieśnik Mienska-Mahiloŭskaj arcydyjacezii biskup Kiryła Klimovič kaža: “Heta była b sensacyja! Katalicki Kaścioł u Biełarusi molicca, kab Papa naviedaŭ Biełaruś. Ale ja sam voś tolki što viarnuŭsia z Krakava, z sustrečy z Papam — pakul što navat havorki takoj nie viałosia”. Nie paćvierdzili infarmacyi polskaha vydańnia i ŭ nuncyjatury apostalskaha pasadu ŭ Biełarusi. Tak što Papa ŭ Biełaruś pakul nia jedzie.

Adnak publikacyja ŭ “Gazetje Wyborcz'aj” nie pustyja plotki. Miensk sapraŭdy moža być “zacikaŭleny” ŭ vizycie, i kardynału Śviontku heta moža być viadoma. Vizyt Śviatoha Ajca staŭsia b symbaličnym dla nacyjanalnaha suverenitetu aktam i, zrazumieła, sapraŭdnym śviatam dla katalikoŭ krainy. Jon zrabiŭ by dla palapšeńnia imidžu Biełarusi ŭ śviecie bolej, čym lubyja dyplamatyčnyja zachady. Inšaja reč, što Miensk nikoli raniej nie dazvalaŭ sabie takoj samastojnaści ŭ zamiežnaj palitycy.

Publikacyju ŭ “Gazetje Wyborcz'aj” paśla pucinskaha “chałodnaha dušu” možna rasceńvać jak čarhovuju napaminku: nikoli nie byvaje zanadta pozna.

Arkadź Šanski