Śpis 100 samych bahatych ludziej Polščy

Śpis 100 samych bahatych ludziej Polščy

Polski tydniovik “Wprost” składaje rejtynh “100 samych zamožnych ludziej Polščy” štohod. U sioletnim — značnyja źmieny. Sapraŭdnych miljarderaŭ — “dalaravych” abo “eŭra” — ciapier u Polščy tolki dva. Bahaćcie jašče šaścioch vyličvajecca ŭ miljardach, ale złotych. Jak viadoma, kurs dalara da złotaha — 1:3,5. Miljaneraŭ ža ŭ Polščy, jak na krainu ź siarednim zarobkam 500—600 dalaraŭ, davoli šmat. Dakładnuju ličbu nazvać nielha, ale možna ŭjavić, kolki ich, kali pieršuju sotniu bahatyroŭ zamykaje ŭładalnik 72,5 młn. złotych (pryblizna 20 młn. dalaraŭ).

Dva “sapraŭdnyja” miljardery ŭžo šmat hadoŭ nie źnikajuć z rejtynhu. Heta 54-hadovy Jan Kulčyk (1-je miesca) i 64-hadovy Alaksandar Hudzavaty.

Kulčyk, jaki maje 12 młrd. złotych (kala 3 młrd. dalaraŭ), — biznesoviec u trecim pakaleńni. Rod Kulčykaŭ pieražyŭ dźvie eksprapryjacyi polskaj narodnaj ułady. Nie čakajučy treciaj, Janaŭ baćka vyjechaŭ u Niamieččynu, dzie zakłaŭ padvaliny synavaha bahaćcia. Syn udała vykarystaŭ baćkaŭ kapitał u Polščy paśla 1989 h., investujučy ŭ telekamunikacyi, strachavy biznes, płatnyja aŭtastrady i h.d. Siońnia ŭłasnaść Jana Kulčyka składaje 1/50 VUP krainy. Pavodle rejtynhu časopisu “Eurobusiness”, jon znachodzicca na 64-m miescy ŭ śpisie samych bahatych eŭrapiejcaŭ. Siarod najbahaciejšych ludziej śvietu Kulčyk zajmaje 138-je miesca.

U adroźnieńnie ad Kulčyka, Alaksandar Hudzavaty byŭ mocna źviazany z savieckaj systemaj. Svoj kapitał jon pačaŭ źbirać jašče ŭ časy PNR, kali pracavaŭ u roznych dziaržstrukturach, źviazanych z zamiežnym handlem. U 1971—77 h. jon pradstaŭlaŭ u Maskvie pradpryjemstva zamiežnaha handlu “Textilimpex”. U postsavieckija časy Hudzavaty, vykarystoŭvajučy staryja suviazi, zasnavaŭ i ŭznačaliŭ firmu “Bartimpex”, što pakłała pačatak jahonaj finansavaj imperyi. Firma vyrasła na barternym abmienie z “Hazpramam” — polskija tavary na rasiejski haz. Siońnia siamja Hudzavatych maje pad 5 młrd. złotych (1 młrd. 250 młn. dalaraŭ).

Na trecim miescy — typovy “pradukt novych časoŭ i novych mahčymaściaŭ” Zyhmunt Sołaž-Žak-małodšy. Jamu 47 hadoŭ, i hrošaj u jaho trochi mienš — 2,8 młrd. złotych (700 młn. dalaraŭ). Krynicy pačatkovaha kapitału hetaha medyjamahnata hublajucca ŭ ružovym tumanie postsacyjalistyčnaha chaosu. Pieršaja jahonaja firma dastaŭlała pasyłki ź Niamieččyny ŭ Polšču, a vialikija hrošy, pavodle aficyjnaj versii, Sołaž-Žak zarabiŭ na imparcie tannych uschodnieniamieckich i rumynskich aŭtamašynaŭ. Zaroblenaje investavaŭ u ŚMI, a sapraŭdnaja karjera medyjamahnata pačałasia paśla taho, jak u 1994 h. Nacrada pa telebačańni i radyjoviaščańni dazvoliła jamu stvaryć pieršy ahulnanacyjanalny kamercyjny telekanał “Polsat”.

U śpisie niamała pradstaŭnikoŭ medyja-biznesu. Naprykład, zasnavalnik adnoj ź pieršych polskich pryvatnych sietak radyjostancyjaŭ RMF-FM Stanisłaŭ Tyčynski, jaki zarabiŭ na tym 250 młn. złotych (62,5 młn. dalaraŭ). Jość siarod polskich bahatyroŭ i ŭłaśniki, a časam i žurnalisty drukavanych vydańniaŭ. Fundatar, akcyjaner i hałoŭny redaktar časopisu “Wprost” Marak Krul zarabiŭ na svaim Vydaviecka-reklamnym ahienctvie 191 młn. złotych (47,75 młn. dalaraŭ). Niekalki miljaneraŭ vyjšli ź firmy “Agora”, jakaja vypuskaje “Gazet'u Wyborcz'u”. Heta Piotar Niamčycki, vice-kiraŭnik firmy, — 125 młn. złotych (31,25 młn. dalaraŭ), Vanda Rapačynskaja, staršynia praŭleńnia firmy, — 88 młn. złotych (22 młn. dalaraŭ), Hielena Łučyva, namieśnik hałoŭnoha redaktara hazety, — 85 młn. złotych (21,25 młn. dalaraŭ). U hetym śpisie niama hałoŭnaha redaktara Adama Michnika: kali “Agora” vyjšła na suśvietnyja finansavyja rynki, toj admoviŭsia ad naležnaj jamu častki akcyjaŭ (na sumu bolš čym 30 młn. dalaraŭ).

Siarod “sotni samych zamožnych” — 18 asobaŭ, maładziejšych za 41 hod. Kali pahladzieć, chto na čym zabahacieŭ, dyk pabačym usie haliny ekanomiki: ad enerhietyki i praduktaŭ charčavańnia da ŭkaranieńnia novych technalohijaŭ. Niama ŭ śpisie artystaŭ dy intelektuałaŭ. Kali starejšaje pakaleńnie zarablała, investujučy ŭ kolišniuju dziaržaŭnuju majomaść, karystajučysia peŭnymi suviaziami, moładź bahacieła na dziejnaści, źviazanaj z novymi technalohijami.

Jazapat Zmysła