Moda na pacyfizm
U subotu ŭziaŭ piva i pajšoŭ da berlinskaj siadziby Chryścijanska-demakratyčnaha sajuzu, dzie pacyfisty ładzili svoj tusač. Išoŭ na akcyju jak na sustreču z starymi karašami.
Dumaŭ pabačyć usich hanarovych siabroŭ berlinskaha levaha klubu: saŭkoŭ z PDS — partyi naščadkaŭ Chonekiera, fanatykaŭ dvuch varožych trackisckich ordenaŭ, jakija nie padzialili tearetyčnaj spadčynu Lava Davidaviča, kurdzkich maaistaŭ z bubnami, bahatych levych intelektuałaŭ i, narešcie, hurtok ahresiŭnych pankaŭ z sabakami-vehietaryjancami.
Dabraŭšysia da miesca zboru, zaŭvažyŭ, što ŭ našaj piasočnicy źjavilisia novyja tvary. Tynejdžery. Mora padletkaŭ. Heta była niejkaja novaja levaja šyza, jakoj ja jašče nikoli nia bačyŭ.
Adna z udzielnic dema trymaje plakat: «Bambić dziela miru — toje samaje, što trachacca dziela samotnaści». Palityzavanuju Łalitu zavuć Hanna, joj 14 hadoŭ. Kaža, što ŭznačalvaje školny kamitet suprać vajny, jaki siońnia dziejničaje pry kožnaj škole. Kolki ich? Tolki ŭ Berlinie kala 70000 čałaviek. Čaho žadaje — kab nie było vajny. Vajna — heta drenna. Kapitalizm — heta drenna. Sacyjalizm — hut.
Z razmovy tak i nie dapior, čaho patrabuje Hanna: miks pamiž Tałstojem i Karłam Marksam.
Ale chiba heta hałoŭnaje? Hałoŭnaje, što być siońnia na Zachadzie pacyfistam — heta kruta. Kruta nasić majku z Če Hievaram i značkam Handzi, niahledziačy na toje, što ŭ svoj čas kanhres Kaminternu zasudziŭ Handzi jak drobnaburžuaznaha chałuja. Kruta chadzić na pacyfisckija dema i bajkatavać «Makdonaldzy». A chto tak nia robić, toj adstojny łoch, u jakoha vidavočna buduć prablemy z pošukam seksualnaha partnera.
Takija ž «naiŭnyja pałajučyja vočy», jak u Hanny, apošnim razam ja bačyŭ u 1997-m na siadzibie MF. Sieviaryniec maryŭ stvaryć z padletkaŭ moładzievuju subkulturu.
U Berlinie ja bačyŭ maru Sieviarynca: 20000 tynejdžeraŭ biehli, jak pa Tyrhartenie, ravučy «Nie vajnie!», «Śvietu mir!», «Chaj budzie sonca!». Krutoje vidovišča!
Navat kali Buš budzie kožny tydzień skidać pa adnamu dyktataru, heta nie pierakanaje Hannu i jaje siabroŭ kinuć biehać na demanstracyi. Heta kštałtu pryncypu samaidentyfikacyi. Za apošnija paŭhodu na Zachadzie naradziłasia novaja moładzievaja subkultura — pacyfisty. Jana maje struktury, materyjalnyja mahčymaści (majka «No war» kaštuje 20 eŭra, kali biareš try — čaćviertaja biaspłatna) i padletkavy kuraž, kab daminavać na hlabalnym rynku moładzievaj mody. Jana daść nastupnuju hieneracyju palityčnych aktyvistaŭ, u tym liku i ŭ Biełarusi.
Vielmi važnym dniom dla farmavańnia mitaŭ novaj subkultury stanie 1 traŭnia, kali bolšaść z hetych tynejdžeraŭ pieršy raz u svaim žyćci vyjduć na Pieršamaj. Pieršamaj na Zachadzie — dzień rytualizavanaj ahresii suprać palicyi. Prykolna było b daviedacca, što skaža Hanna pra prablemy miru i vajny, zapuściŭšy «kaktejl Mołatava» ŭ palicejski branievičok.
Lolik Uškin