Kalonka redaktara
Hetaja ŭłada zahinie ad farmalizmu
19 traŭnia BT zalivałasia ŭra-patryjatyčnymi repartažami ab pryjomie novych siabroŭ u pijanerskija arhanizacyi. Bahata kazali pra «historyju», «tradycyi». Maŭčali pra raznaradki z adździełaŭ adukacyi.
Raniej u pijanery prymali na dzień naradžeńnia Lenina. Hodnaje alternatyvy Illiču ciapier niama. I tamu nie zusim jasna, navošta hena pijaneryja. Nad prablemaj zapaŭnieńnia idealahičnaha vakuumu bjecca ŭsia ŭładnaja vertykal. Pakul biespaśpiachova. Čarhovym śviedčańniem tamu — vystup Jurja Sivakova pierad studentami Akademii fizvychavańnia. Ministar pieramiažaŭ cytavańnie Buračka z panehirykami «bratniaj Rasiei».
Adzinaja ŭciamnaja ideja, jakuju zdoleli zhieneravać łukašysty, była ahučanaja ministram adukacyi Bryhadzinym u časie rektarskaje narady ŭ Horadni: meta idealahičnaha vychavańnia moładzi — «pavaha da dziaržaŭnaj ułady». Fajny hrunt dla abjadnańnia nacyi — nacyi ŭładapasłuchmianych. «Z daŭnych-davion, darahija dzietki, hałoŭnaj kaštoŭnaściu biełaruskaha narodu była lajalnaść da ŭłady...»
Ź inšaha boku, hajek taksama zanadta nie zakruciš. Łukašenka — asoba kultavaja, adnak ułasnaha kultu asoby ŭžo nia stvoryć. Klimat nia toj. Dźmuć mocnyja zachodnija viatry, Eŭraźviaz, jak toj cmok z kazki, pralizvaje adny žaleznyja dźviery za druhimi.
«Kali nia možaš mianie lubić, choć by rabi vyhlad», — voś i ŭsia ŭładnaja idealohija. Nie vidać blasku ŭ vačoch novapryznačanych «važatych», až da hałoŭnaha pijanera krainy Alaksandra Babickaha. Pijanerskaja arhanizacyja dy BPSM hadujuć kanfarmistaŭ. Jak u časy Brežnieva—Mašerava, ad farmalizmu i kanfarmizmu dranćviejuć adzin za adnym čelesy aŭtarytarnaha cieła: i palityčnaja elita, i kałhasny ład, i navat junaja pijaneryja.
Andrej Skurko