«Źnievažalnikaŭ» usio bolš
20 traŭnia sud Maskoŭskaha rajonu Miensku daŭ štrafu hałoŭnamu redaktaru hazety «Navinki» Paŭluku Kanavalčyku. Jaho abvinavacili ŭ «raspaŭsiudzie jaŭna chłuślivych źviestak, jakija źnievažali honar i hodnaść prezydenta Respubliki Biełarusi». Kolkaść spravaŭ pa faktach «źniavahi» kiraŭnika dziaržavy dasiahnuła dvuch dziasiatkaŭ. Nivodzin z abvinavačvanych nie apraŭdany.
P.Kanavalčyk byŭ pryciahnuty da administracyjnaj adkaznaści pa art. 172-1 č.10 za ananimny artykuł «Druhaja Biełaruskaja Kanatatyŭnaja Revalucyja», nadrukavany ŭ siomym sioletnim numary hazety ŭ sakaviku. Prezydenckija honar i hodnaść, na dumku prakuratury, abražaŭ źmieščany ilustracyjny materyjał — dva adnolkavyja staryja pieradvybarnyja plakaty Łukašenki z roznymi kamentarami da ich. Naprykład, z takim: «Šyroka rasstaŭlenyja palcy — symbal biaźlitasnaha zabojcy palityčnych apanentaŭ»…
Cikava, što materyjały na Kanavalčyka pastupili ŭ Maskoŭski sud ad namieśnika hieneralnaha prakurora (hałoŭny redaktar «Navinak» užo davaŭ tłumačeńni ŭ hienprakuratury). A sam sud prajšoŭ za hadzinu ŭ budynku… rajadździełu milicyi. «Kab zručna było razhladać spravy, pasadzili sudździu tut», — patłumačyŭ sytuacyju adzin ź milicyjantaŭ. Sudździa Maksim Falko zaciahnuŭ pačatak pracesu (nijak nia moh znajści sakratara), a paśla nie puściŭ na pasiedžańnie žurnalistaŭ. U vyniku ŭsie chadajnictvy abarony (advakatam Kanavalčyka byŭ Pavał Sapiełka, jaki zusim niadaŭna baraniŭ u sudzie Aksanu Novikavu) byli adchilenyja. Sudździa nie dazvoliŭ pravieści ekspertyzu «kramolnych» materyjałaŭ hazety, spasłaŭšysia na toje, što «skančajecca termin pryciahnieńnia da administracyjnaj adkaznaści», i navat nie patłumačyŭ, za jakuju ź dźviuch ilustracyj byŭ pakarany Paŭluk. Tak heta i zastałosia tajamnicaj.
U vyniku hałoŭny redaktar «Navinak» musić spłacić dziaržavie štraf u 1 miljon 400 tys. rubloŭ. Hrošy buduć vyličacca ź nievialičkaha zarobku P.Kanavalčyka, i asudžany miarkuje raściahnuć spahnańnie štrafu na 4—5 hadoŭ.
Pravaabarončy centar «Viasna» padličyŭ: pa kryminalnych spravach «za abrazu honaru i hodnaści» prezydenta ŭ 2001—2003 h. prachodziła 19 čałaviek (žurnalisty, palityki i moładzievyja aktyvisty). Jany prachodzili pa artykułach KK 367 («Źniavaha prezydenta») i 368 («Abraza prezydenta»). Da «chimii» prysudzili žurnalistaŭ-pahoniaŭcaŭ Mikołu Markieviča i Paŭła Mažejku, redaktara «Rabočaha» Viktara Ivaškieviča. Piaciora škłoŭskich zubroŭcaŭ — Michaś Kisialoŭ, Maksim Patupčyk, Aleś Paŭłovič, Dzianis Sienakosaŭ i Źmicier Šałaškaŭ — za pieradvybarny performans z vusataj maskaj zapłacili štrafam i adličeńniem z navučalnych ustanovaŭ. Aktyvistka AHP z Rečycy Natalla Brel, što pieradała Łukašenku dosyć dvuchsensoŭnyja suveniry, pierad pahrozaj aryštu ŭciakła ŭ Belhiju. Kryminalnyja spravy ŭzbudžalisia suprać žurnalistki Aleny Pankratavaj, palityka Anatola Labiedźki — za artykuł u «Narodnaj voli». Apošni vypadak — Aksana Novikava, asudžanaja na dva hady ŭmoŭna. Nie apraŭdali nivodnaha. «Sprava Kanavalčyka», nie kryminalnaja — administracyjnaja, vyhladaje jak papiaredžańnie satyryčnaj hazecie, ź jakoj ułada pakul nia choča sudzicca.
Aleh Tačony