Volevyjaŭleńnie
«U Rasiei ŭ najbližejšy čas nia budzie nijakaha referendumu», — pramoviŭ Alaksandar Viešniakoŭ. Na rasiejskaj televizii poŭnaj chadoj razhortvajecca kampanija ŭłasnych vybaraŭ — dumskich i prezydenckich. Močać u prybiralniach kamunistaŭ, terarystaŭ i liberałaŭ; dla pratestnaha elektaratu pijarać Žyrynoŭskaha; astatnim treba soty raz davieści, što Pucin — adziny kandydat. Rasieja zaniataja. Biełaruś maje čas da nastupnaje viasny.
U Piciery, siarod imperskaje fejeryi, natoŭpu zamiežnych haściej i zaklikaŭ «Rasieju — u Eŭropu!» (paśla jakich pamiatlivaha eŭrapiejca prabirajuć dryžyki), Alaksandar Ryhoravič, napeŭna, usio adbumvaŭ, jak by pravieści jaki-niebudź kanstytucyjny referendum tolki ŭ Biełarusi.
Čynoŭniki na miescach nibyta ŭžo atrymali rasparadžeńnie nia brać adpačynku ŭ žniŭni—vieraśni; pačałasia planavaja začystka treciaha sektaru j presy; hramadzkija nastroi zandujucca rehularnymi praciokami infarmacyi, a analityki pradkazvajuć farmuloŭki pytańniaŭ i vyniki hałasavańnia.
Hulnia dosyć ryzykoŭnaja: pratestnyja nastroi ŭ hramadztvie vielmi vysokija, jak u 1994-m, i chopić niespadziavanaje detanacyi, kab sytuacyja vybuchnuła. Klučavaja pieravaha režymu — u jaho niama ni arhanizacyjnaj, ni persanalnaj alternatyvy. Jakraz u hetym momancie i zaklučajecca pahroza čarhovaje «elehantnaje pieramohi».
Referendum pavinien pieratvarycca ŭ biełaruskaje volevyjaŭleńnie — dziela hetaha pratestnyja nastroi musić realizavać nacyjanalny ruch. Pa-pieršaje, treba abjadnać pierad referendumam najbolšuju kolkaść mienavita niezaležnych siłaŭ; pa-druhoje, jasna zajavić pra svaje ambicyi — uziać uładu ŭ krainie paśla Łukašenki; pa-treciaje, vyłučyć lideraŭ i, narešcie, arhanizavać kampaniju maštabnaje ahitacyi j adkrytaha supracivu dla mabilizacyi hihanckaha patencyjału niezadavolenaści. Kali referendum budzie mieć prarasiejski źmiest — źviazać Łukašenku z Rasiejaj i atakavać ich abaich. Kali Łukašenka vyrašyć pahulać u intehracyju z Eŭraźviazam, zajavić: «My sami hatovyja zrabić Eŭropu ŭ Biełarusi!» — i budavać alternatyvu na maksymalnych eŭranastrojach. Zadača nacyjanalnaha ruchu na takim referendumie — vyjści ź jaho adzinym, mocnym, z rejtynham nia mieniej za 30% i statusam novaj apazycyi.
Momant sacyjalny: Rasieja na hod praktyčna vyklučanaja ź biełaruskich pracesaŭ. Ameryka j Eŭropa tolki j čakajuć, kab zrabić staŭku na alternatyvu. A narod hatovy iści za tym, chto maje volu j vieru. Za lideram.
Biełaruskija palityki buduć mieć padčas referendumu cudoŭny šaniec. Chvala volevyjaŭleńnia moža raskrucić realnaha nacyjanalnaha kandydata ŭ prezydenty ŭ 110 razoŭ lepš, čym lubaja pałatkavaja akruha.
Pytańnie tolki ŭ adnym — ci chopić na heta ŭ niekaha ź ciapierašnich lideraŭ asabistaje voli.
Pavał Sieviaryniec