Na novaj ratušy stary hierb
27 žniŭnia na naviutkaj mienskaj ratušy, pastaŭlenaj ciaham hetaha hodu, ustalavali vyjavu staraśvieckaha hierbu miesta — Panny Maryi z aniołami. U pachmurnym imžystym pavietry daloka raźlahalisia dziełavityja rasiejskija maciuki. Kalarovy hierb, aščadna ŭhornuty ŭ celafan, uźniali ŭharu prosta padjomnym kranam. Rabočyja, u davoli čystych firmovych specoŭkach, pazujučy pierad fatakamerami, bieražliva pieradali jaho z ruk na ruki da ratušovaje viežy.
Vyhladaje, što staršynia Mienharvykankamu Paŭłaŭ dy staršynia Mienskaha savietu Papkoŭski vyrašyli nieadkładna farsiravać vykanańnie svaich abiacanak. Mienavita jany letaś 13 vieraśnia pakłali pad zakładny kamień novaje ratušy kapsułu ź listom da naščadkaŭ. Pavodle roznych źviestak, fasad hetaha budynku maje być prezentavany ci to 1-ha, ci to 13 vieraśnia, roŭna praz hod ad pačatku budoŭli. A tamu ani chałodny žnivieński doždž, ani apošnija dziańki letnich vakacyjaŭ tut nie pieraškoda.
Hetaja padzieja znakavaja ŭ śviatle ciapierašnich pošukaŭ dziaržaŭnaje idealohii. Budynak ratušy, jak znak eŭrapiejskaści j tutejšych demakratyčnych instytucyjaŭ samakiravańnia, byŭ źniesieny na asabisty zahad cara Mikałaja I, kab zhadak nie było «o byłych volnostiach i litovskom pravie». I voś, źniščany ŭ 1857 h., symbal honaru j słavy miesta znoŭ paŭstaŭ tamsama, dzie j stajaŭ ažno ad XVI st. Viarnuŭsia na svajo pačesnaje miesca j paŭtysiačahadovaje daŭniny hierb. Taki Biełaruś u Eŭropu?
Tamu chvalujučaja vałtuźnia j niazłobnyja maciuki mienskaha načalstva dy prostych rabotnikaŭ nie dratujuć. Pazieryć na epachalny momant historyi Miensku nabrałasia śviet narodu. A z hanku klubu «Admirał» ekskursavod užo badziora rapartavaŭ kupcy rasiejskich turystaŭ, što ratušu źnieśli ichnyja prodki, a ciapierašnija biełaruskija ŭłady bahata robiać dla ŭznaŭleńnia nacyjanalnaje spadčyny. Vyhlad u rasiejcaŭ byŭ ahałomšany. Vurčeli budaŭničyja mašyny. Išoŭ doždž. Zichcieŭ na ratušnaj viežy hierb Miensku.
Siarhiej Chareŭski