Ekanamičnaja chronika
6 kastryčnika 2003 h.
Jak spraviŭsia Sidorski
Za dzieviać miesiacaŭ uradavańnia Siarhieja Sidorskaha zastalisia niavykananymi 5 z 16 asnoŭnych prahnoznych parametraŭ na 2003 h., u tym liku rost vytvorčaści pradukcyi sielskaj haspadarki, charčavańnia, pavieličeńnie realnych hrašovych dachodaŭ nasielnictva. VUP vyras na 106%, ale zapasy hatovaj pradukcyi na składach dasiahnuli 64% abjomu miesiačnaje vytvorčaści, bolej za tracinu pramysłovych pradpryjemstvaŭ zastajucca nierentabelnymi, niahledziačy na dziaržaŭnuju padtrymku i padatkovyja lhoty. 64% sielhaspradpryjemstvaŭ — stratnyja. Tolki dziakujučy prysiadzibnym i fermerskim haspadarkam udałosia dabicca zapavoleńnia źnižeńnia pakaźnikaŭ u ahrarnaj halinie. I heta niahledziačy na 900 młrd rub. sioletnich dziarždatacyjaŭ.
Plany «Biełavii»
U červieni 2004 h. «Biełavija» maje nabyć jašče dva «Boinhi». U 2005-m park papoŭnicca «Embrajeram-145» brazylskaj vytvorčaści (na 50 miescaŭ). Jon pavinien zamianić «Jak-40» i «An-24» dla palotaŭ na Stakholm, Berlin i Varšavu. Nabuduć jaho, vidać, u avijakampanii «Lot» (Polšča), jakaja planuje zamianiać «Embajery» na bolš umiaščalnyja. U 2006 h. «Biełavija» planuje kupić jašče «Boinh» i «Embrajer».
Supersupermarkiet
Novy haradzienski supermarkiet zojmie 6 ha płoščy, daść horadu 7 młn dalaraŭ investycyjaŭ i 400 novych pracoŭnych miescaŭ. Da 1 studzienia 2005 h. jon pavinien pryniać pieršych pakupnikoŭ. Investuje supermarkiet pradpryjemstva «Handaloptyma», jakoje zaadno pabuduje ŭ Horadni dźvie elektryčnyja transfarmatarnyja padstancyi i prakładzie 450 m kanalizacyi.
«Biełnaftachim» manapalizuje rynak
Z 1 listapada pačało dziejničać novaje pałažeńnie ab licenzavańni handlu naftapraduktami. Kab zajmacca aptovym i roźničnym handlem naftapraduktami (benzyn, dyzelnaje paliva, mazut, reaktyŭnaje paliva, aśviatlalnaja haza, piačnoje paliva), treba mieć licenziju ad kancernu «Biełnaftachim». Licenzija vydajecca na piać hadoŭ, jašče na piać jaje možna praciahnuć.
SP, BiełaPAN