Tydzień našaha žyćcia
Biełaruskija tenisisty ŭ čarhovy raz nahadali nam usim, što vola harady biare.
Biełaruskija liceisty praciahvajuć vučycca samastojna, zatoje pa-biełarusku. Užo niama sumnievaŭ, što hety navučalny hod jany davučacca. Budučynia ž Liceju zaležyć ad taho, ci ŭdasca ŭ červieni narmalna zrabić novy, čarhovy nabor. Licej patrabuje stałaj uvahi i padtrymki niezaležnaha hramadztva.
U Rasiei zarehistravanyja siem kandydataŭ u prezydenty. Dziŭnaja kampanija idzie! Usie bjuć siabie ŭ hrudzi jak sapraŭdnyja apazycyjanery, ale pry hetym nivodzin nie navažvajecca zajavić: Pucin nia zdolny dać rady teroru, jon zahruz u Čačenii, jon vinavaty ŭ raźviazvańni vajny, jakuju treba nieadkładna spynić, — choć takich dumak trymajecca značnaja častka vybarcaŭ. Pra toje, čamu takaja biaźvietranaść u palityčnaj atmasfery, trochi havorać źviestki pra dachody rasiejskaha palityčnaha isteblišmentu na staroncy 7.
Pradstaŭniki namenklatury, što pierajšła ŭ apazycyju, utvaryli novy hramadzki ruch. Jon nazyvajecca «Za pieramieny». Novaha ŭ im toje, što 147 zasnavalnikaŭ ruchu adrazu ž vyłučyli svajho kandydata na vybary-2006 — niaŭdačnika kampanii'2001 Alaksandra Jarašuka. Sychodzić z «Maładoha frontu» Sieviaryniec — pra heta na staroncy 5.
Siarod našaniŭskich materyjałaŭ minułaha numaru palemiku vyklikała dumka ci, dakładniej, hipoteza, punkciram abaznačanaja ŭ kaloncy Vacłava Zajakocia. Voś jana: hramadzkim dziejačam varta całkam admovicca ad palityčnaj dziejnaści dziela zachavańnia mahčymaści kulturnaj, arhaničnaj pracy, raz užo aŭtarytarnaja ŭłada dazvalaje rabić usio, akramia taho, što nie kranaje samoj ułady naŭprost. Što j kazać, paraženskaje mierkavańnie, niešta nakštałt filazofii «Tyhodnika Paŭšechnaha» i Koła «Znak» u časy Hamułki. Pačytajcie, što adkazvaje Zajakociu Ŭładzimier Kołas.
Andrej Dyńko