Uładzie i apazycyi treba iści nasustrač
Adhukajučysia na artykuł «Natatki ab pazycyi», chaču skazać, što apazycyja nie zajmajecca vialikaj kolkaściu patrebnych drobnych spraŭ. Akramia taho, apazycyja — jakaja ślapaja naiŭnaść! — spadziajecca, što pry zamienie prezydenta na niekaha inšaha ŭdasca vyrašyć adrazu ŭsie prablemy. Adnak mahčyma zamiena ciapierašniaha prezydenta na pradstaŭnika rasiejskaj aliharchii, jaki pry nieabchodnaści ŭstaluje elementy fašysckaha režymu, budzie niščyć apazycyju fizyčna! Kali ŭ Eŭropie demakratyčny ład, to heta nia značyć, što jon chutka i lohka pryjdzie da nas.
Siońnia apazycyi treba šukać punkty sudakranańnia z prezydentam. Bo i taja, i toj zacikaŭleny, kab da ŭłady nie prarvaŭsia kryminał. I taja, i toj pavinny być zacikaŭleny ŭ vychadzie dziaržaŭnych struktur z eŭrapiejskaj izalacyi.
Bo ž apazycyja da ŭłady ciapier vielmi mocnaja. Jana abjadnoŭvaje tych ludziej, chto lubić Biełaruś. Patencyjał hetaj hrupy nie skarystany. Ale jana źjaŭlajecca tym skalnym hruntam, na jaki možna abapiercisia pry pabudovie ŭłasnaj dziaržavy.
Hetyja ludzi čakajuć ad ułady padtrymki biełaruskaj movy, biełaruskaj kultury, dziaržaŭnych krokaŭ pa raźvićci biełaruskaha piśmienstva, kinematohrafu, biełaruskaha telebačańnia, biełaruskaj adukacyi — krokaŭ pa ŭmacavańni dziaržaŭnaści. Hałoŭnaje dla ich, kab była svaja dziaržava, bo tolki tak nacyja moža zachavacca. Bo na čužym karabli budzie miesca tolki ŭnizie, u trumie, kala samaha dna, dzie šancy na vyžyvańnie najmienšyja.
Niepatryjatyčnaja ž bolšaść, jak pakazali padziei pry razbureńni Savieckaha Sajuzu, nikoli nia budzie abaraniać uładu i dziaržavu, dla takich ludziej maje kaštoŭnaść tolki ich ułasnaje pryvatnaje žyćcio. Jany i siońnia marać niekudy źjechać — ci to ŭ Kanadu, ci ŭ Ńju-Jork. Ich lohka kupić, ci zapałochać, ci zzambavać. Uładu jany prymuć lubuju.
U hroznaj budučyni dziaržaŭnaść mohuć abaranić tolki patryjoty.
Kastuś Travień, Vorša