Ja chaču stać prezydentam
Ofis pradprymalnickaj arhanizacyi «Perspektyva» mieścicca ŭ damku ŭ centry Miensku na vulicy Zacharava. Dom ablapili šmatlikija ofisy nievialikich pryvatnych firmačak (arenda nieruchomaści, cyrulnia, ramont, aŭdyt), supracoŭniki jakich achvotna pakazvajuć mnie ofis Anatola Šumčanki. Custrakaje sam haspadar, karžakavaty chłapiec hadoŭ 30 u «chamieleonistych» akularach. Zaciemnieny ofis, kvietki na stale. Na ścianie — partret samoha spn.Anatola. Haspadar prapanuje sieści.
«NN»: Vy nie havorycie pa-biełarusku?
Anatol Šumčanka: Ja nia ŭmieju dobra havaryć pa-biełarusku: u škole nie było pastajannaha nastaŭnika. Tamu nia budu kryŭdzić movy kiepskim hučańniem.
«NN»: Heta ŭ Miensku tak movu vykładali?
A.Š.: Tak. Ja naradziŭsia ŭ Miensku 29 hod tamu, vyras i vučyŭsia taksama tut. U 15 hod zastaŭsia biaz baćki. Jon byŭ pieradavy rabočy, nieadnarazova drukavaŭsia ŭ «Sovietskoj Biełoruśsii» na pieršych pałosach, adnojčy atrymaŭ hanarovuju hramatu CK KPSS. Taki jon byŭ. A maci pracavała na «Intehrale».
«NN»: I jak u takoj kamunistyčnaj siamji moh vyraści biznesoviec?
A.Š.: Ja b skazaŭ «vyras by, kab nie…». Kali b ja byŭ biznesoviec, ja b nie zajmaŭsia toj dziejnaściu, jakoj ciapier zajmajusia. U našaj krainie niama biznesoŭcaŭ uvohule, bo zajmacca biznesam aznačaje być volnym u svaim myśleńni j dziejańniach. Jość lokai, jakija absłuhoŭvajuć ciapierašni režym ź jaho dazvołu. I jość tyja, kamu zaminajuć raźvicca ŭ biznesmena. Ludzi pavinny vykazvać svoj pratest suprać ucisku praz parlament i inšyja palityčnyja struktury. Ciapier takoj mahčymaści niama. Takim čynam, ja chacieŭ stać biznesmenam, ale ciapierašni prezydent nia daŭ mnie hetaha zrabić. Maja zadača — praź źmienu ŭłady kanstytucyjnym šlacham vypravić svoj los i palepšyć žyćciovy stan. Pradprymalniki źjaŭlajucca bazaj dla hetaj źmieny.
«NN»: Meta Vašaha žyćcia — stać biznesoŭcam. Kali Vy ŭžo nie zachacieli absłuhoŭvać režym u abmien na dazvoł mieć biznes, čamu Vy nia źjechali tudy, dzie biznes rabić možna?
A.Š.: Nie chaču. Ja siabie adčuvaju całkam kamfortna tolki ŭ Biełarusi. Ni pry jakich abstavinach nikudy nie pajedu. Bolš za toje, u mianie pastaŭlena meta i ja źbirajusia jaje realizavać, kali daść Boh. Praz 6 hod ja zdoleju ŭpieršyniu zajavić pra svaje plany.
«NN»: Chočacie stać našym prezydentam?
A.Š.: Absalutna dakładna. Kali, naturalna, sytuacyja nia źmienicca. Mnoju ruchaje imknieńnie ŭładkavać ułasnaje žyćcio, žyćcio maje siamji, pastajannuju płyń finansaŭ, mieć svabodu vykazvańniaŭ i ŭčynkaŭ. Kali b u mianie ŭsio heta było, ja b nie zajmaŭsia hramadzkaj dziejnaściu. Pakul hetaha nia budzie, ja budu pracavać na źmieny. Kali dla hetaha treba budzie stać prezydentam, ja stanu. Ja ž baču, kolki razumnych ludziej navokał. Treba, kab im dali šaniec realizavać svaje zdolnaści. Kali niechta źjavicca da mianie — dobra. Kali ž u 2006 h. nia vyjdzie, to ŭ 2011-m, kali mnie budzie 36 hod, u nas usio ŭdasca.
«NN»: A kali daviadziecca sieści na nary, a nie na pasad? Užo Levanieŭski tam.
Poŭny varyjant artukułu čytajcie ŭ hazecie "Naša Niva"
Hutaryła Śviatłana Kurs