Chronika
Administracyjnaja kamisija Leninskaha rajonu Horadni 8 vieraśnia aštrafavała na 5 b.v. aktyvista prafsajuzu REPAM Ivana Romana za raspaŭsiud drukavanych vydańniaŭ biez vychodnych źviestak (prafsajuzny biuleteń «Šabier»). 14 vieraśnia milicyjanty ŭvarvalisia ŭ pracoŭny kabinet deputata PP NS Siarhieja Skrabca ŭ Lidzie, dzie jon vioŭ pryjom vybarcaŭ, i kanfiskavali kala 1000 asobnikaŭ spravazdačy pra deputackuju dziejnaść, kvalifikujučy ich jak vybarčuju ahitacyju. U Viciebsku 15 vieraśnia ŭ siabie doma byŭ zatrymany Ściapan Cišucin : jaho padazravali ŭ nadpisach na ścienach «Nie — referendumu» i «Hałasujcie za Karač». Milicyjanty naładzili ŭ jaho doma pieratrus. Sama deputatka Viciebskaha harsavietu Volha Karač z kastryčnika stanie biespracoŭnaj: jaje zvalniajuć z SŠ №27, bo skančajecca abaviazkovy termin jaje pracaŭładkavańnia jak maładoj specyjalistki. Padčas razdačy biuleteniu «Biełaruś: nieraskrytyja złačynstvy najnoŭšaj historyi» kala Prakuratury Biełarusi 16 vieraśnia byli zatrymany siabar BCHK Hary Pahaniajła i niezarehistravanaj «Viasny» Taciana Reviaka , a taksama reparcior «Interfaksu» Alaksiej Bukčyn — na pravaabaroncaŭ skłali pratakoł za raspaŭsiudžvańnie drukavanych vydańniaŭ biez vychodnych źviestak. Valer Levanieŭski 16 vieraśnia spyniŭ haładoŭku: administracyja Haradzienskaha SIZA vykanała jahonaje patrabavańnie i vydzieliła jamu spalnaje miesca. Na redaktarku haradzienskaj hazety «Birža informacii» Alenu Raŭbieckuju 16 vieraśnia raspačali administracyjnuju spravu za parušeńnie art.5 Zakonu ab druku — «raspaŭsiudžvańnie źviestak, jakija hańbiać honar i hodnaść prezydenta Respubliki Biełarusi». Padčas «Šeścia biazdomnych studentaŭ» u Miensku 16 vieraśnia byli zatrymany Aleś Vasileŭski, Jury Sidun, Siaržuk Siemianiuk ; sudy majuć adbycca 28 vieraśnia — junakoŭ abvinavačvajuć u supracivie supracoŭnikam milicyi pry zatrymańni. Miniust 16 vieraśnia nakiravaŭ u Viarchoŭny Sud pazoŭ pra likvidacyju Biełaruskaha Chielsynskaha kamitetu : padstava — zvarot BCHK nakont pryznańnia referendumu niezakonnym. U Salihorsku padčas akcyi «Chočam viedać praŭdu» 16 vieraśnia byli zatrymany siabar AHP Jaŭhien Vałodźka i siabar PBNF Uładzimier Piatrovič . 17 vieraśnia ŭ sudzie Piatroviča aštrafavali na 20 b.v., Vałodźku — na 150 b.v., u abodvuch u košt štrafu apisali majomaść baćkoŭ. Unačy z 16 na 17 vieraśnia padčas rasklejki samarobnych ulotak suprać referendumu byli zatrymany Alaksiej Čarniajeŭ i Alena Vałyniec-Čarniajeva — na ich skłali pratakoły pavodle art.143 KaAP (antysanitaryja). Tavarystva «Aljans-medyja» (uładalnik Siarhiej Atroščanka) źviarnułasia ŭ Leninski sud Miensku z pazovam da hazety «Narodnaja vola» nakont kampensacyi kala 836 tys. rub. dadatkovych sudovych vydatkaŭ. U Mahilovie 17 vieraśnia padčas raspaŭsiudu hazety «Zubr» byli zatrymany Mikałaj Iljin i Jaŭhien Suvoraŭ . TBM źviarnułasia da ŭpraŭleńnia adukacyi Mienharvykankamu z zaklikam spynić rusifikacyju škoł: u biełaruskamoŭnych 10-ch klasach SŠ №168 pa-rasiejsku stali vykładacca 7 pradmietaŭ z 12, padobnaje ž nazirajecca ŭ biełaruskamoŭnaj himnazii №17. Padčas kancertu Viačasłava Butusava ŭ Miensku ŭ padtrymku biełaruskich muzykaŭ zatrymany aktyvisty «Zubra» Darja Małdavanava, Alaksandar Uško, Mikita Sasim, Maksim Hromaŭ, Taciana Jełavaja , jakija ŭźniali ściahi arhanizacyi, za raspaŭsiudžvańnie hazety «Zubr» zatrymany Alena Korbač, Zinaida Kryvanos, Arciom Sałaŭjoŭ . 17 vieraśnia administracyja RUP «Biełaeranavihacyja» paviedamiła byłomu vice-prezydentu Biełaruskaha prafsajuzu aeradyspetčaraŭ Alehu Dołbiku , što admaŭlajecca praciahvać ź im pracoŭny kantrakt paśla 1 kastryčnika. U Barysavie padčas razdačy hazety «Zubr» zatrymali Alaksandra Kazakova i niepaŭnaletniuju Viktoryju Vajciachovič . Na kałhasnym rynku Lidy 19 vieraśnia padčas raspaŭsiudu ŭlotak i biuleteniu «Priedprinimatiel» zatrymany Źmicier Levanieŭski , Valeraŭ syn. 20 vieraśnia Volha Zavadzkaja padała zajavu ŭ sud Centralnaha rajonu Miensku na Prakuraturu Biełarusi: taja praihnaravała patrabavańnie ŭznavić kryminalnuju spravu pa novaadkrytych akaličnaściach źniknieńnia jejnaha syna paśla zajavy A.Łukašenki na pres-kanferencyi 20 lipienia. Salihorski harvykankam 20 vieraśnia admoviŭ Niezaležnamu prafsajuzu harniakoŭ RUP «VA «Biełaruśkalij» pravodzić 23 vieraśnia pikiet suprać ucisku pravoŭ niezaležnych prafsajuzaŭ. U Viciebsku 20 vieraśnia byli zatrymany siabry KCHP-BNF Uładzimier Pleščanka, Alaksandar Sałaŭjan i Barys Chamajda , jakija ładzili pikiet suprać vybaraŭ i referendumu.
AŠ