Rasijanin, jaki ŭ pjanym stanie sprabavaŭ uciačy na «BMV» ad DAI, aštrafavany na 13 młn
Rasijanin, jaki ŭ stanie apjanieńnia sprabavaŭ uciačy na «BMV-Ch5» ad naradaŭ Dziaržaŭtainśpiekcyi ŭ Hrodnie 5 lutaha, aštrafavany na 13 miljonaŭ rubloŭ. Jon pazbaŭleny prava kiravańnia transpartnymi srodkami na čatyry hady. Pra heta paviedamlaje ŭpraŭleńnie DAI UUS Hrodzienskaha abłvykankama.
Sudovy razbor prajšoŭ u abłasnym centry 6 lutaha.
Nahadajem, na trajektoryju ruchu aŭtamabila «BMV-Ch5» z rasijskimi rehistracyjnymi znakami dniom 5 lutaha narad bataljona darožna-patrulnaj słužby źviarnuŭ uvahu na praśpiekcie Janki Kupały. Sihnał inśpiektara vadziciel pazadarožnika praihnaravaŭ. Adarvaŭšysia na vialikuju adlehłaść, paimčaŭsia ŭ bok vulicy Pieramohi. Ihnarujučy praviły darožnaha ruchu, lichač źbiraŭsia vyjechać za haradskuju miažu. Dziakujučy ŭzhodnienym dziejańniam supracoŭnikaŭ DAI, na vulicy Padolnaj, dzie druhi narad svaim aŭtamabilem zabłakiravaŭ prajezd, jaho zatrymali.
Akramia 24-hadovaha vadziciela ŭ aŭtamabili znachodzilisia pasažyry (dźvie dziaŭčyny i brat parušalnika). Pavodle słoŭ zatrymanaha, u Hrodna jon pryjechaŭ z Kalininhrada pa pracy. Noč pravioŭ u znajomych, dzie piŭ harełku. Pračnuŭšysia ranicaj, pachmialiŭsia i vyrašyŭ raźvieźci sabutelnic pa damach.
Miedycynski ahlad pakazaŭ najaŭnaść u arhaniźmie vadziciela 1,97 pramile ałkaholu. Pavodle słoŭ parušalnika, prava kiravańnia ŭ Rasii jaho pazbavili kala troch hadoŭ tamu. Nakładzienuju za dapuščanyja ŭ Hrodnie parušeńni sumu štrafaŭ jon zapłaciŭ.
Kamientary