Prakuratura Minska apratestavała rašeńnie Minharvykankama, jakoje tyčycca arhanizacyi aŭtamabilnych parkovak u dvarach žyłych damoŭ. Ab hetym paviedamlajecca na sajcie niekamiercyjnaj arhanizacyi «Centr ekałahičnych rašeńniaŭ» (CER).
Zhodna z rašeńniem Minharvykankama № 2405 ad 11 žniŭnia 2011 hoda rajonnyja administracyi stalicy pavinny byli pradać terytoryi ŭ dvarach šmatkvaternych žyłych damoŭ «dla ŭstaloŭki na adkrytych placoŭkach pakryćciaŭ dla časovaha raźmiaščeńnia asabistych aŭtamabilaŭ hramadzian». Tak, u hetym hodzie ŭ kožnym rajonie Minska pavinna było źjavicca pa 2 tys. dadatkovych placovak dla aŭtamabilaŭ.
Prakuratura maje prava apratestavać rašeńnie miascovaha vykanaŭčaha i rasparadčaha orhana, kali jano supiarečyć dziejučamu zakanadaŭstvu, cytuje sajt CER słovy kaardynatara pravavoj słužby ekałahičnaha ruchu «Zialonaja sietka» Maryny Dubinaj. Dziejańnie rašeńnia prypyniajecca da razhladu pratestu i budzie admieniena, kali prakurorski pratest budzie zadavoleny.
Jak paviedamlajecca, admiena hetaha rašeńnia staličnych uładaŭ spynić budaŭnictva dadatkovych časovych parkavalnych placovak, «jakija źmiaščajuć ad piaci da piacidziesiaci aŭtamabilaŭ, i stvarajucca pablizu ŭžo isnujučych damoŭ za košt zialonych i piešachodnych zon, dziciačych placovak».
«U rašeńni № 2405 vykarystoŭvajecca termin «placoŭki dla časovaha raźmiaščeńnia aŭtamabilaŭ «, jaki nie maje zakanadaŭčaha zamacavańnia, — pryvodziacca słovy supracoŭnika enierhietyčnaj prahramy CER Paŭła Harbunova. — Heta dazvalaje budavać takija parkoŭki biez naležnaha ŭzhadnieńnia z orhanami, jakija ažyćciaŭlajuć dziaržaŭny sanitarny nahlad, orhanami nahladu za budaŭnictvam, orhanami, jakija adkazvajuć za biaśpieku ruchu. Vynikam stała toje, što ŭ Miensku ŭ šerahu vypadkaŭ stali źjaŭlacca parkoŭki, raźmieščanyja zanadta blizka da damoŭ, dziciačych placovak, takija, zajezd na jakija ažyćciaŭlajecca pa chodnikach. Akramia taho, stvareńnie takich parkovak faktyčna pravodziłasia biez hramadskaha abmierkavańnia z usimi žycharami dvara, abmiarkoŭvałasia tolki z zacikaŭlenymi aŭtaŭładalnikami. Heta sparadžała kanflikty pamiž žycharami».
«Admiena rašeńnia № 2405 viernie situacyju ŭ pravavoje rečyšča. U takim vypadku budaŭnictva parkovak pavinna budzie prachodzić u abaviazkovym paradku tolki ŭ miežach dobraŭparadkavańnia, a značyć, pry abaviazkovym hramadskim abmierkavańni z udziełam usich žycharoŭ dvara, z raspracoŭkaj paŭnavartasnaj ŭzhodnienaj dakumientacyi, pravierkaj jaje na adpaviednaść ŭsim ustalavanym narmatyvam», — havorycca na sajcie Centra ekałahičnych rašeńniaŭ.
Kamientary