Cimašenka maje namier pierahledzieć hazavyja pahadnieńni z Rasiejaj

Premjer-ministarka Ŭkrainy Julija Cimašenka maje namier inicyjavać pieramovy z Rasiejaj u hazavaj sfery. Takuju zajavu jana zrabiła žurnalistam u aŭtorak, 18 śniežnia, adkazvajučy na pytańni paśla zakančeńnia pracy parlamentu.

«My budziem inicyjavać sustreču z našymi rasiejskimi kalehami, kab vyśvietlić usie pytańni, datyčnyja pastavak hazu na Ukrainu i jahonaha tranzytu», — paviedamiła jana.

Novaja premjerka zajaviła, što Ukraina zastajecca nadziejnaj tranzytnaj dziaržavaj. Pavodle jaje «dla krainaŭ ES Ukraina budzie nadziejnym partneram». «My nie sarviem anivodnaha abjomu, anivodnaha terminu», — padkreśliła Ju. Cimašenka.

«Usie hazavyja pytańni buduć detalova razabranyja, praanalizavanyja ŭsie pahadnieńni, jakija byli zakrytymi», — adznačyła Ju. Cimašenka. «Maja pazicyja zastajecca niaźmiennaj: pasiarednikaŭ na hazavym rynku być nie pavinna», — adznačyła hłava ŭradu. Zhodna ź joj, z adnaho boku jość «Naftohaz Ukrainy», z druhoj — AAT «Hazprom», i jość urady abiedźviuch krainaŭ, tamu pasiarednikaŭ tut być nie pavinna.

Raniej lider BIUT užo nie adnojčy zajaŭlała, što maje namier prybrać kampaniju RosUkrEnergo jak pasiarednika pry prodažy rasiejskaha hazu Ukrainie. Pry hetym Ju. Cimašenka spasyłałasia na mierkavańnie staršyni rady dyrektaraŭ «Hazpromu» Dźmitryja Miadźviedzieva, jaki jašče na pačatku kastryčnika hetaha hodu vykazaŭ hatoŭnaść prybrać RosUkrEnergo z adnosinaŭ pamiž Ukrainaj i RF. Vinu za toje, što heta da hetaj pary nia zroblena, palityk uskłała na eks-premjera Viktara Janukoviča.

Ju. Cimašenka padkreśliła, što za «pravał enerhietyčnaj palityki i spryjańnie karupcyi ŭ enerhietycy hetaj kamandzie daviadziecca adkazvać». RosUkrEnergo jana nazvała «placoŭkaj dla raźmierkavańnia chabaru» i zvyšprybytkaŭ.

Ciapier pastaŭščykom usiaho hazu na Ukrainu źjaŭlajecca švajcarski trejder RosUkrEnergo (50 % -- u «Hazpromu», 50 % -- u Centragas Holding AG).

Nahadajem, što novy kantrakt na pastaŭki rasiejskaha hazu va Ŭkrainu byŭ padpisany 4 śniežnia pamiž kiraŭnikom «Hazpromu» Alaksiejem Mileram i ministram paliva i enerhietyki Ukrainy Jurjem Bojkam. Zhodna ź im, «Hazprom» padniaŭ canu na haz dla Kijeva na 2008 h. z 130 da 179,5 dalara za 1 tys. kub. m. (ź Biełarusi patrabuciu tolki 119).

Raniej, u kastryčniku-listapadzie cana na pastaŭlany va Ŭkrainu haz abmiarkoŭvałasia na ŭzroŭni 160 dał. za 1 tys. kub. m. Takuju canu jak prymalnuju nazyvała Ŭkraina. Adnak 27 listapada stał viadoma, što Turkmenija značna padniała canu na haz, što zakuplaje i paśla pierapradaje «Hazprom».

Zhodna z novymi damoŭlenaściami, «Hazprom» budzie kuplać u Turkmienii haz u pieršym paŭhodździ 2008h. pa $130 za 1 tys. kub. m, u druhim -- pa $150 za 1 tys. kub. m zamiest $100 za 1 tys. kub. m u ramkach padpisanych raniej kantraktaŭ. Pavyšeńnie zakupačnaj cany turkmenskaha hazu dla «Hazpromu» mieła vynikam pavyšeńnie cany dla Ŭkrainy.

• 0
• 0
• 0
• 0
• 0
• 0
• 0
• 0