Rasijskaja hramadskaja dziajačka Maryja Hajdar i rasijski žurnalist, były hałoŭny redaktar Forbes-Ukraina Uładzimir Fiadoryn atrymali ŭkrainskaje hramadzianstva.
Prezident Ukrainy Piatro Parašenka padpisaŭ adpaviedny ŭkaz i ŭručyŭ im pašparty hramadzian Ukrainy, paviedamlaje pres-słužba prezidenta.
«Vaš prykład pierakanaŭča demanstruje, što maŭčać nielha, treba žyć u zhodzie sa svaim sumleńniem», — skazaŭ prezident Ukrainy novym suajčyńnikam. Padčas uručeńnia pašpartoŭ Parašenka skazaŭ, što mnohija rasiejcy, jakija razumiejuć realnaje stanovišča rečaŭ, robiać vybar: «albo ty zastaješsia sa svabodnym śvietam, demakratyjaj i robiš usio, kab zabiaśpiečyć pieramohu svabody i demakratyi, albo maŭčyš — i pry hetaj maŭklivaj zhodzie čyniacca vielmi ciažkija złačynstvy».
Parašenka taksama zajaviŭ, što maksimum, što jany mohuć siońnia zrabić dla Rasii, — «heta zabiaśpiečyć pośpiech Ukrainy».
Tolki pry hetych umovach možna budzie adnavić adnosiny pamiž svabodnaj Ukrainaj i svabodnaj Rasijaj, ličyć Parašenka.
Prezident padziakavaŭ Maryi Hajdar, Uładzimiru Fiadorynu i ŭsim rasiejcam, jakija znachodziać u sabie mužnaść vykazvać niazhodu ź dziejańniami kirujučaha ŭ Rasii režymu, za ich aktyŭnuju śmiełuju hramadzianskuju pazicyju.
Prezident pažadaŭ novym hramadzianam Ukrainy nie hublać suviazi z Rasijaj. «Vaša niezaanhažavanaja pazicyja, mierkavańnie i infarmacyja z Ukrainy jak alternatyva kramloŭskaj prapahandzie vielmi važnaja dla miljonaŭ rasiejcaŭ», — skazaŭ Parašenka.
Uładzimir Fiadoryn pra svajo novaje hramadzianstva skazaŭ: «Heta vialiki honar i znak vialikaha davieru z boku naroda Ukrainy i prezidenta Ukrainy, i, mahčyma, samaje adkaznaje rašeńnie ŭ maim žyćci».
Jon nazvaŭ Ukrainu fłahmanam svabody i narmalizacyi na postsavieckaj prastory, «jaki daje nadzieju narodam byłoha SSSR stać siabrami suśvietnaj siamji volnych narodaŭ», cytuje žurnalista pres-słužba prezidenta.
Pa słovach Fiadoryna, dla jaho važny niepasredny ŭdzieł u hetym pracesie.
I Maryja Hajdar, jakaja ŭ Rasii była aktyŭnym udzielnikam hramadskaha i apazicyjnaha ruchu, zajaviła, što dla jaje hramadzianstva Ukrainy — vielmi znakavy vybar:
«Ja tut u ciažki dla Ukrainy čas dla taho, kab padzialić los ukrainskaha naroda. U nas ahulny vorah — aŭtarytarny režym, jaki zabivaje ludziej jak u Rasii, tak i tut», — zajaviła jana.
Hajdar taksama zapeŭniła, što zrobić usio mahčymaje, «kab hetaha voraha pieramahčy i pakazać inšy šlach — šlach svabody i demakratyi, pavahi, partniorstva i dobrasusiedstva».
Jana paprasiła prabačeńnia za toje, što adbyvajecca ciapier u Rasii, i vykazała nadzieju, što «Ukraina ŭbačyć, što rasiejcy — heta nie tolki vajna, ahresija i nianaviść».
Kamientary