Fidel: jak ultrarevalucyjaniery ŭrešcie pieratvarajucca ŭ vorahaŭ prahresu i mučycielaŭ narodu
Piša Anatol Sidarevič.
Jany pišuć na ściahach pryhožyja łozunhi: svaboda, roŭnaść, spraviadlivaść. I miljony ludziej, stomlenyja kansiervatyŭnymi ci reakcyjnymi režymami, stomlenyja dyktaturami, im vierać i za imi iduć.
Jany abiacajuć likvidavać palicyju i ŭvieści milicyju, a ŭ vyniku atrymlivajecca palicejskaja dziaržava.
Jany abiacajuć ŭvieści vybarnaść čynoŭnikaŭ, a ŭ vyniku atrymlivajecca ŭsieŭładździe biurakratyi.
Jany abiacajuć uvieści hramadskuju ŭłasnaść na srodki vytvorčaści, a ŭ vyniku źjaŭlajecca novy kłas ułaśnikaŭ, jakija, nie ŭkłaŭšy ŭ nabyćcio i vytvorčaść srodkaŭ vytvorčaści ani šeleha, bieskantrolna rasparadžajucca fabrykami i zavodami, šachtami i kamunikacyjami, kładuć u svaje kišeni bolšuju častku dachodaŭ, atrymanych ad realizacyi vyrablenaj pradukcyi i pasłuh.
Jość zakanamiernaść: ultrarevalucyjaniery ŭ rešcie rešt pieratvarajucca ŭ kontrrevalucyjanieraŭ, u reakcyjanieraŭ, vorahaŭ prahresu.
Zmahajučysia suprać aŭtarytarnych režymaŭ i dyktataraŭ, jany ŭstaloŭvajuć jašče bolš žorstkija aŭtarytarnyja i tatalitarnyja režymy.
Fidel Kastra i ŭznačalenaja im klika nie vyklučeńnie z hetaj schiemy.
Fidel i jaho paplečniki abviaścili Kubu Vostravam Svabody, a jana stała vostravam niesvabody, vostravam palityčnych viaźniaŭ, palityčnych zabojstvaŭ i sudovych raspraŭ ź inšadumcami. I ščaślivyja tyja sotni tysiač kubincaŭ, ščaślivyja dačka, unučka i plamieńniki dyktatara, jakim udałosia ŭciačy u Štaty, na Fłarydu: ich nie katujuć, ich nie morać hoładam pad akampaniemient partyjna-dziaržaŭnaj prapahandy ab ščaślivym žyćci pad kiraŭnictvam bratoŭ Kastra i kamunistyčnaj partyi.
Jany abiacali narodu hramadzianskuju i sacyjalnuju roŭnaść. I vostraŭ niesvabody staŭ vostravam niaroŭnaści, na jakim ułada i ŭłasnaść naležać partyjna-dziaržaŭnaj namienkłatury, na jakim adny majuć svaje zony adpačynku, svaje kramy, restarany dy inšyja dabroty i vyhody, a narod žyvie pavodle normaŭ spažyvańnia, ustanoŭlenych biurakratyjaj. I navat taja dapamoha, jakaja prychodzić prostym kubincam ad rodzičaŭ-emihrantaŭ, nie dazvalaje im narmalna žyć.
Jany abiacali spraviadlivaść. Ale ni pravavaja, ni sacyjalnaja spraviadlivaść niemahčymaja ŭ hramadstvie, u jakim niama svabody i hramadzianskaj roŭnaści.
Jany zaniadbali vialiki ideał Karła Marksa i Frydrycha Enhielsa: na miesca staroha hramadstva ź jaho kłasami i kłasavymi supraćlehłaściami prychodzić asacyjacyja, u jakoj svabodnaje raźvićcio kožnaha źjaŭlajecca ŭmovaj svabodnaha raźvićcia ŭsich. Vyšej za svabodu i svabodnaje raźvićcio kožnaha, svabodnaje raźvićcio ŭsich, vyšej za spraviadlivaść jany pastavili ŭładu dziela ŭłady i atrymańnie vyhodaŭ dziakujučy ŭładzie. Ci možna paśla hetaha nazvać ich marksistami?
* * *
Pytajucca: što možna čakać paśla śmierci Fidela?
Varyjanty dva: zachavańnie ŭłady kampartyi ci jaje likvidacyja.
Zachavać uładu kampartyja moža i na praciahły čas, kali na Kubie jość svoj Den Siaopin, zdolny vypracavać prahramu raźvićcia, i kali partyja zdoleje zachavać adzinstva. I kali kamunistyčnaja partyja — tak, jak kampartyja Kitaja — voźmie sabie za praviła kožnyja 10 hadoŭ mianiać viarchoŭnuju ŭładu.
Pytańnie staić tak: ci zdolnaja kampartyja Kuby da refarmavańnia, da abnaŭleńnia ideałohii? Ci ŭsio ž jana nie paddajecca refarmavańniu, jak KPSS, i raspadziecca?
Pytańnie možna sfarmulavać i tak: ci mocnyja pazicyi ŭ Raula Kastra? Ci razumieje jon, u jakoj jamie apynułasia Kuba? Ci zdolny jon paviarnuć styrno ŭ bok reformaŭ? Ci dazvolić jamu kiraŭnictva kampartyi paviarnuć hetaje styrno?
Kali kampartyja Kuby nie paddajecca refarmavańniu, jak KPSS, tady mahčymy siłavy varyjant źmieny palityčnaha režymu, jaki kałodaj lažyć na šlachu technika-technałahičnaha i ekanamičnaha, sacyjalnaha i pravavoha prahresu. Siłavy varyjant mahčymy pavodle i rasijskaha, i rumynskaha ŭzoraŭ.
Spadziavacca na raptoŭnaje, imhniennaje ŭstalavańnie demakratyčnaha režymu na Kubie nie varta.
Niemałavažny čyńnik — emihracyja. Kali emihrantam budzie abvieščana amnistyja i dazvolena viartańnie, kali tysiačy emihrantaŭ z kapitałami viernucca na Kubu, u krainie, nie vyklučana, ŭźniknie haspadarčaja aliharchija.
Da taho ž, kastryzm (nazaviem tak kubinski varyjant kamunistyčnaha režymu) uźnik nie na pustym miescy. Kastryzm hłyboka siadzić u śviadomaści, mientalnaści miljonaŭ. Mnohija i mnohija kubincy, jak i biełarusy, ci to bajacca svabody, ci to nienavidziać jaje. Dla mnohich i mnohich dyktatura, režym asabistaj ułady — samy prymalny.
Nie vyklučana, što na miescy adnoj dyktatury na Kubie ŭstalujecca druhaja dyktatura. Inšaje pytańnie: jakaja heta budzie dyktatura — dyktatura raźvićcia, jak u Sinhapury, Paŭdniovaj Karei i Kitajskaj Respublicy (Tajvań), ci kansiervatyŭnaja, aliharchičnaja dyktatura, jak u Biełarusi i Rasii.
Kamientary