Sasłužyviec zatrymanaha Daniłava: Vydatny, idealny sałdat, a zbroja — dla strajkboła
Žurnalist Biełaruskaj redakcyi Polskaha Radyjo Alaksandr Papko paznaŭ u videarepartažy BT svajho sasłužyŭca Viktara Daniłava. Imia zatrymanaha nazvaŭ dziaržaŭny telekanał ANT u svaim materyjale suprać kolišniaj arhanizacyi «Bieły lehijon».
21 sakavika ŭ Biełarusi byli zatrymanyja amal dva dziasiatki čałaviek, častka jakich u minułym mieła datyčnaść da «Biełaha lehijonu».
«Ja byŭ šakavany hetym videa, — kaža Alaksandr Papko. — Na im moj armiejski tavaryš Vicia Daniłaŭ. My paznajomilisia padčas słužby ŭ rezervie ŭ 72-m abjadnanym navučalnym centry ŭ Piečach. Vicia byŭ namieśnikam kamandzira adnaho sa ŭzvodaŭ. Jon byŭ najlepšym namieśnikam va ŭsioj rocie. Vydatny, idealny sałdat, jakoha słuchalisia ŭsie padnačalenyja i jaki karystaŭsia pavahaj i aŭtarytetam ludziej».
Alaksandr Papko raspaviadaje, što viedaje Daniłava jak čałavieka «vielmi adukavanaha, načytanaha».
«Jon sapraŭdy cikaviŭsia vajskovaj historyjaj, udzielničaŭ u roznych letnikach, — tłumačyć Papko.
Pavodle žurnalista Alaksandra Papko, siužet biełaruskaha telebačańnia — «prykład manipulacyi i prapahandy».
«Pakazali karcinku, na jakoj znachodzicca BTR, žaŭnier, bieł-čyrvona-bieły ściah, što padkreślivajuć prapahandysty. Ale nie pakazana, što hety žaŭnier sa ściaham topča symboliku fašysckaj arhanizacyi Rasiejskaje nacyjanalnaje adzinstva», — tłumačyć jon.
«Tam pakazali, naprykład, patrony. Heta navučalnyja patrony z tak zvanaj «abžymkaj» — niekalkimi pasami pa bakach. Stralać jany nia mohuć, bo porachu ŭ hetych patronach niama.
Jany prystavanyja dla taho, kab navučać navabrancaŭ zaradžać mahaziny aŭtamataŭ, — kaža rezervist Papko. — Hranaty, jakija tam pakazanyja, heta vidavočna mulažy. Što da zbroi, to tut ja ŭžo dakładna skazać nie mahu. Ale vyhladaje, što heta zbroja dla strajkboła. Čałaviek, u jakoha jość sapraŭdnaja zbroja, tak spakojna siabie pavodzić nia budzie».
Pavodle Alaksandra Papko, zatrymanamu Viktaru Daniłavu jašče niama 30 hadoŭ, jon žyvie ŭ Miensku i pracuje ŭ pryvatnaj firmie.
«Nijakim nacystam jon nie źjaŭlajecca, — kaža Alaksandr Papko. — Heta ja adkazna zajaŭlaju».
Ciapier čytajuć
U milicejskim konkursie pryhažości pieramahła amapaŭka, jakaja ŭ 2020 hodie razhaniała pratesty44
Kamientary