Kožny hod u Biełarusi rehistrujuć bolš za 50 tysiač novych vypadkaŭ raku, ale śmiarotnaść ad hetaha zachvorvańnia pastupova źnižajecca.
Pra heta, jak pieradaje ahienctva «Minsk-Naviny», paviedamiŭ na pres-kanfierencyi 14 červienia namieśnik dyrektara pa navukovaj rabocie RNPC ankałohii i miedycynskaj radyjałohii imia N.N. Alaksandrava Siarhiej Krasny.
«Šmat u čym nam udałosia dasiahnuć pośpiechaŭ u lačeńni złajakasnych novaŭtvareńniaŭ dziakujučy tamu, što ŭ apošnija hady prajšło poŭnaje pieraŭzbrajeńnie ankałahičnaj słužby, — adznačyŭ Krasny. — Supiersučasnaje abstalavańnie, u tym liku dla pramianiovaj terapii, atrymali ŭ svajo rasparadžeńnie nie tolki naš RNPC, ale i rehijanalnyja. Na jakasna novy ŭzrovień akazańnia miedycynskaj dapamohi ankałahičnym pacyjentam vyvieli i uviedzienyja ŭ stroj Respublikanskaja malekularna-hienietyčnaja łabaratoryja kancerahieniezu i centr pazitronna-emisijnaj tamahrafii».
Pa słovach Krasnaha, dziakujučy daśledavańniam DNK lačeńnie ankapacyjentam padbirajecca indyvidualna. I ŭ kančatkovym vyniku heta maje vielmi vialikaje značeńnie. Važna i toje, što ŭ respublicy pravodzicca skryninh złajakasnych novaŭtvareńniaŭ (raku pradstalovaj załozy, małočnaj załozy, šyjki matki, raku toŭstaj kiški), asnoŭnaja meta jakoha — vyjaŭleńnie zachvorvańniaŭ na rańnich stadyjach.
Taksama pośpiech u lačeńni prynosiać małainvaziŭnyja chirurhičnyja ŭmiašańni pry puchlinach nievialikaha pamieru.
«Heta małatraŭmatyčnyja apieracyi, paśla jakich čałaviek praz tydzień prystupaje da pracy», — rastłumačyŭ Krasny.
Ciapier čytajuć
Čamu YouTube vydaliŭ kanały BiełTA, STB i ANT? Voś što viadoma20
Kamientary