Čaho možna čakać ad novaj IT-roty?

Upieršyniu pra stvareńnie śpiecyjalizavanaj roty pa infarmacyjnaj biaśpiecy zajaviŭ ministr abarony Raŭkoŭ sioleta 25 lutaha. Adkazvajučy na pytańnie karespandenta ANT, ci płanujecca ŭ Biełarusi stvarać vojski infarmacyjnych apieracyj, jak heta zroblena ŭ Rasii, Raŭkoŭ skazaŭ, što biełaruskaje vajskovaje viedamstva ščylna zajmajecca infarmacyjnaj biaśpiekaj, kibierbiaśpiekaj, u Biełarusi jość adpaviednyja struktury, «plus my ŭ hetym hodzie farmirujem śpiecyjalizavanuju rotu, jakaja budzie zajmacca hetym pytańniem». Mety i zadačy nazvanaj roty nie abviaščalisia, ale z kantekstu skazanych ministram abarony słoŭ možna było zrabić vysnovu: rota budzie zajmacca pytańniami infarmacyjnaj biaśpieki, dakładniej, infarmacyjna-techničnaj biaśpieki.

Na dniach znoŭ źjaviłasia infarmacyja pra farmiravańnie takoj roty (charakterna, na nastupny pracoŭny dzień paśla abvinavačvańnia z boku ZŠA ŭ dačynieńni da 12 rasijan, jakich padazrajuć va ŭmiašańni z dapamohaj infarmacyjnych technałohij u amierykanskija vybary). Ale na hety raz stvarajemaja rota była nazvanaja rotaj infarmacyjnych technałohij (IT-rota). U paviedamleńni Ministerstva abarony adznačajecca, što padraździaleńnie budzie ŭkamplektavana vajskoŭcami terminovaj vajennaj słužby ź liku hramadzian, jakija dabilisia najbolšych pośpiechaŭ u halinie infarmacyjnych technałohij, jak praviła, majuć vyšejšuju prafiesijnuju adukacyju pa śpiecyjalnaściach, jakija cikaviać Ministerstva abarony, i jakija vyjavili žadańnie prachodzić vajskovuju słužbu ŭ dadzienaj rocie. Kožnamu śpiecyjalistu roty infarmacyjnych technałohij budzie dadzieny navukovy kiraŭnik, vajskoŭcy buduć vykonvać kankretnyja navukova-prykładnyja zadačy ŭ intaresach vajskovaha viedamstva, a taksama praciahnuć svoj udzieł va ŭžo pačatych navukovych prahramach. Dziejnaść roty budzie arhanizavana na bazie Vajskovaj akademii Respubliki Biełaruś (pieršapačatkova razhladaŭsia NDI Uzbrojenych Sił). Pryviedzienaja infarmacyja śviedčyć pra toje, što rota budzie ŭjaŭlać saboj anałah stvoranych piać hadoŭ tamu ŭ Rasii navukovych rot. Takija roty sfarmavanyja praktyčna dla kožnaha vidu ŭzbrojenych sił Rasii pry vajskova-navukovych (adukacyjnych) centrach i kamplektujucca z vypusknikoŭ VNU pryrodaznaŭčanavukovych i techničnych śpiecyjalnaściaŭ, za jakim zamacoŭvajecca navukovy kiraŭnik.

Dziejnaść navukovych rot uzbrojenych sił Rasii šmat u čym źviazana ź infarmacyjnymi technałohijami. Naprykład, asnoŭnyja navukova-prykładnyja zadačy 5 navukovaj roty (Suchaputnych vojskaŭ Rasii) adnosiacca da vobłaści aŭtamatyzacyi zboru i analizu dadzienych, raspracoŭki sistem dapamohi pryniaćcia rašeńniaŭ, stvareńnia baz danych i 3D-madelavańnia. Što tyčycca zadač IT-roty biełaruskich US, to ŭskosna pra ich zhadvaŭ u intervju načalnik vajskovaj akademii, a taksama šerah zadač možna zrazumieć pa dakumiencie, jaki źmiaščaje prykłady prajektaŭ. U pryvatnaści heta takija zadačy, jak prajektavańnie i stvareńnie baz danych, raspracoŭka mabilnych prahram pad Android i iOS, matematyčnaje i kampjutarnaje madelavańnie viadzieńnia bajavych dziejańniaŭ i inšyja. Možna skazać, što ahučanyja zadačy nie šmat u čym adroźnivajucca ad zadač, anałahičnych pryviedzienaj vyšej navukovaj roty US Rasii.

Nieabchodnaja kvalifikacyja da vajskoŭcaŭ roty ŭ pryncypie dazvalaje chutka pieraaryjentavać jaje dziejnaść z prykładnoj navukovaj na rašeńnie śpiecyjalnych zadač Uzbrojenych Sił. Tak, mabilnyja prahramy možna raspracoŭvać jak prosta dla techničnych pytańniaŭ abo papularyzacyi US (naprykład, tematyčnyja hulni), tak i dla viadzieńnia raźviedki i kiravańnia masami. Prykładami apošnich źjaŭlajucca zbor vialikich mas ludziej u zadadzienym miescy ŭ patrebny čas z dapamohaj hulni Pokemon-Go, vyznačeńnie kaardynataŭ vajskovych abjektaŭ na asnovie fitnies-prahramy Strava, pieradača supierniku kaardynataŭ ahniavych pazicyj ukrainskich padraździaleńniaŭ, jakija vykarystoŭvajuć rasijskija mabilnyja prahramy dla stralby artyleryi.

Padraździaleńnie takoha rodu ŭ kolkaści 60 čałaviek pry dapaŭnieńni jaho peŭnymi śpiecyjalistami humanitarnaha profilu całkam zdolna pravodzić maštabnyja infarmacyjnyja apieracyi, ale naŭrad ci varta čakać padobnaha ŭ najbližejšy čas. Pa-pieršaje, bolšaja častka nahruzki chutčej za ŭsio budzie prychodzicca na raspracoŭku śpiecyjalizavanaha prahramnaha zabieśpiačeńnia, a nie na sietkavaje ŭździejańnie. Pa-druhoje, na pieršym časie pryciahnieńnie IT-śpiecyjalistaŭ, jakija ŭ bolšaści svajoj pracujuć na aŭtsorsinhu krain NATA, dla ŭździejańnia na apošnija taksama sumnieŭna. Ale, tym nie mienš, resurs (reziervovy) uzbrojenych sił dla praviadzieńnia dosyć maštabnych infarmacyjnych apieracyj budzie stvorany.

Navukovyja i navukova-vytvorčyja roty uzbrojenych sił Rasii šmat u čym dziejničajuć u intaresach vajskova-pramysłovaha kompleksu. Sa słoŭ načalnika Vajskovaj akademii Biełarusi Lisoŭskaha vynikaje, što vajskoŭcy biełaruskaj IT-roty taksama mohuć pryciahvacca nie tolki dla zabieśpiačeńnia intaresaŭ Ministerstva abarony, ale i dziaržaŭnaha VPK. Navukova-daśledčyja padraździaleńni VS, da jakich pa sutnaści budzie adnosicca i IT-rota, vykonvajuć navukova-daśledčyja i vopytna-kanstruktarskija pracy jak na zamovu Ministerstva abarony, tak i ŭ ramkach haspadarčych damoŭ z pradpryjemstvami vajskova-pramysłovaha kompleksu. Za heta navukovyja supracoŭniki US atrymlivajuć adpaviednaje finansavańnie (hrašovaje zabieśpiačeńnie, zarabotnuju płatu). I tut uźnikaje šerah prablemnych pytańniaŭ. Pa-pieršaje, pryzvanyja na vajskovuju słužbu śpiecyjalisty buduć atrymlivać minimalnaje hrašovaje zabieśpiačeńnie, što nijak nie zaležyć ad abjomu i jakaści vykonvajemych rabot. Kali biaspłatnuju pracu ŭ intaresach Uzbrojenych Sił niejak zrazumieć možna, to biaspłatnaja praca pa sutnaści ŭ intaresach pradpryjemstvaŭ, miakka kažučy, nie spraviadlivaja. Častkova situacyju možna vyrašyć pierachodam pryzvanych vajskoŭcaŭ na kantrakt. Dla vypusknikoŭ VNU, raźmierkavanych na pradpryjemstvy ź nizkim zarobkam, pieraraźmierkavacca na kantrakt va US mahčyma i dobry varyjant, ale dla supracoŭnikaŭ PVT — naŭrad ci (nie tyja zarpłaty). Pa-druhoje, mohuć uźniknuć pytańni ź intelektualnaj ułasnaściu (praściej kažučy raspracoŭku sałdat mohuć prysvoić navukovyja kiraŭniki ci pradpryjemstvy-zakazčyki).

Šmat u čym dziejnaść roty budzie vyznačacca prafiesijanalizmam i navukovaj kvalifikacyjaj jaje kiraŭnictva. Prablemnymi momantami tut mohuć być vykarystańnie pryzvanych śpiecyjalistaŭ asabliva dla praviadzieńnia dysiertacyjnych daśledavańniaŭ navukovych kiraŭnikoŭ, vykanańnie zaviedama niepierśpiektyŭnych daśledavańniaŭ i raspracovak (u tym liku pastaŭlenych pradpryjemstvami), adryŭ dziejnaści roty ad rašeńnia zadač infarmacyjnych apieracyj.

Siarod prablem, jakija adznačajuć niepasredna vajskoŭcy navukovych rot Rasii, varta vyłučyć nastupnyja:

— u pieršy čas paśla stvareńnia roty šmat času sychodziła na ŭładkavańnie kazarmy i pracoŭnych miescaŭ;

— suadnosiny fizičnaj pracy pa typu «pryniasi-pieraciahni» da asnoŭnaj dziejnaści składali ŭ zhadanaj 5-j navukovaj rocie 30:70;

— zakupka dadatkovaha abstalavańnia abo zamiena biahučaha zajmaje praciahły čas z pryčyny nieabchodnaści ŭzhadnieńnia i nierehularnaści finansavańnia;

— vyrašeńniu asnoŭnych zadač pieraškadžajuć inšyja raboty: stvareńnie spravazdač, dakumientacyi, prezientacyj, kancylarskija pracy i inš. Z upeŭnienaściu možna skazać, što takija prablemy paŭstanuć i ŭ biełaruskaj IT-rocie.

Možna mierkavać, što IT-rota budzie vykarystana i dla padboru dadatkovych kadraŭ dla dziejučych padraździaleńniaŭ infarmacyjnaj biaśpieki, naprykład, Hałoŭnaha centra zabieśpiačeńnia biaśpieki infarmacyjnych technałohij Uzbrojenych Sił. Taksama rota moža stać kuźniaj pierśpiektyŭnych navukovych i piedahahičnych kadraŭ dla Vajskovaj akademii i NDI Uzbrojenych Sił. U rasijskich rotach dla hetaha słužbu ŭ navukovych rotach pradstaŭlajuć jak alternatyvu aśpirantury — paśla zaviaršeńnia słužby vajskoŭcy majuć mahčymaść abaranić dysiertacyju na asnovie armiejskich daśledavańniaŭ. Na dadzieny momant u Biełarusi zabiaśpiečyć za pieryjad słužby ŭ rocie alternatyvu navučańnia ŭ aśpirantury prablematyčna, ale jak alternatyvu mahistratury (z dadatkovaj vučebnaj nahruzkaj) — mahčyma.

U cełym stvareńnie roty infarmacyjnych technałohij — stanoŭčaje, choć i zapoźnienaje, pačynańnie kiraŭnictva Uzbrojenych Sił Biełarusi. Resurs stvarajecca vielmi dobry, ale jak jaho vykarystajuć — pakaža čas.

• 0
• 0
• 0
• 0
• 0
• 0
• 0
• 0