Kiraŭnik dziaržavy Alaksandr Łukašenka ŭznaharodziŭ dziaržaŭnymi ŭznaharodami šerah vajennasłužačych Słužby biaśpieki Prezidenta, a taksama ŭručyŭ pahony staršamu aficerskamu składu SBP, piša BiełTA.
Uračystaje mierapryjemstva ŭ Pałacy Niezaležnaści adbyłosia napiaredadni 25-hodździa Słužby biaśpieki prezidenta. Alaksandr Łukašenka nazvaŭ hetu datu čarhovaj značnaj viachoj u historyi hetaha padraździaleńnia.
«Čverć stahodździa tamu my stvarali słužbu praktyčna z nula. My nie ŭjaŭlali, jakoj jana pavinna być, nie viedali, čym jana pavinna zajmacca. Upieršyniu ŭ historyi suvierennaj Biełarusi źjaviłasia takoje padraździaleńnie. Nie było asablivych resursaŭ, dy i vopytu. Ale byli ludzi i hłybokija tradycyi toj vialikaj krainy. Farmirujučy padraździaleńnie z novymi kampietencyjami, my adbirali lepšych supracoŭnikaŭ siłavych viedamstvaŭ Biełarusi - prafiesijanałaŭ, patryjotaŭ z vysokim pačućciom abaviazku pierad krainaj i narodam», - padkreśliŭ kiraŭnik dziaržavy.
«My tady stvarali našu Słužbu biaśpieki, možna sumlenna skazać, na abłomkach struktur razburanaj krainy: adpaviednaha padraździaleńnia KDB - hrupy «Alfa», adpaviednaha padraździaleńnia MUS i inšych siłavych struktur», - skazaŭ jon.
Jon adznačyŭ, što siońnia ŭ rasparadžeńni SBP jość samaja sučasnaja zbroja, a supracoŭniki słužby zdolny jakasna vyrašać samyja składanyja zadačy ŭ luboj kropcy Biełarusi, u ekstremalnych situacyjach hatovy dziejničać spakojna, dakładna, zładžana, nieprykmietna, ale efiektyŭna.
«Harantavańnie biaśpieki, abarona nacyjanalnych intaresaŭ krainy i naroda - heta vaša štodzionnaja rabota. Vy štohadzinna i štochvilinna znachodziciesia ŭ bajavym strai i poŭnaj bajavoj hatoŭnaści. Heta ŭ mnohim vyznačaje prestyž našaj suvierennaj dziaržavy. A vydatnuju vyvučku paćviardžajuć vašy pośpiechi na mižnarodnych spabornictvach roznaha ŭzroŭniu. U tym liku i dziakujučy vam siońnia ŭ Biełarusi zachoŭvajecca mir i paradak», - zajaviŭ biełaruski lidar.
Razam z hetym jon zaŭvažyŭ, što na płaniecie nie pa dniach, a litaralna pa hadzinach raście napružanaść, abvastrajecca situacyja pablizu hranic Biełarusi.
«Zamiest pojasa dobrasusiedstva, jaki my prapanujem, vymaŭlovajecca duha niestabilnaści. I ŭ hetaj situacyi vy pavinny zrabić usio, kab navat nie dać padstavy destruktyŭnym siłam razburyć mir, stvorany na hetaj ziamli», - skazaŭ jon.
«U mirny čas vy nie tolki zabiaśpiečvajecie svoj front rabot, ale i demanstrujecie ŭsim, asabliva ŭnutry našaha hramadstva, što mir i spakoj u našaj krainie - reč niaźmiennaja, mir niepachisny. U vypadku, nie daj boh, ahresii suprać našaj dziaržavy, usie my - voiny elitnaha padraździaleńnia, i naša zadača - być napieradzie ŭsich padraździaleńniaŭ, kab abaranić krainu, ajčynu i hramadzian», - zajaviŭ kiraŭnik dziaržavy.
Alaksandr Łukašenka padkreśliŭ, što supracoŭniki SBP pavinny maksimalna vykarystoŭvać svoj intelektualny patencyjał, padličvać mahčymyja varyjanty i dziejničać na apiaredžańnie, być nieadolnaj ścianoj na šlachu luboj pahrozy, abaraniać žyćci ludziej. «Vykonvajučy svoj prafiesijny abaviazak na najvyšejšym uzroŭni, pa fakcie vy zabiaśpiečvajecie nacyjanalnuju biaśpieku Biełarusi i, jak by pafasna heta ni hučała, źjaŭlajeciesia aporaj miru i stabilnaści ŭ našym hramadstvie», - upeŭnieny kiraŭnik dziaržavy.
Jon adznačyŭ, što biełarusy ceniać i pavažajuć usich tych, chto pa zakliku serca spravaj svajho žyćcia vybiraje samaaddanaje słužeńnie Ajčynie. «Vielmi chaču, kab vy byli dastojnyja hetaha davieru! Pierakanany, słovy, raźmieščanyja na advarotnym baku Ściaha Słužby biaśpieki: «Doŭh, Honar, Ajčyna» - nie prosta deviz, a realny aryjencir dla kožnaha z nas», - skazaŭ jon.
Alaksandr Łukašenka padziakavaŭ za słužbu ŭsim dziejučym supracoŭnikam i vieteranam, pažadaŭ mocnaha zdaroŭja, ščaścia i pośpiechaŭ u prafiesijnaj dziejnaści na karyść krainy.
Na zakančeńnie, jašče raz dajučy nakaz udzielnikam mierapryjemstva, kiraŭnik dziaržavy skazaŭ: «Pomnicie, što ŭ vas pavinny zaŭsiody być čystyja ruki, śvietłyja, čystyja tvar i vočy. Tamu što heta nie tolki vašy ruki i vočy. Heta i ruki, i vočy prezidenta, kiraŭnika dziaržavy. Pośpiechaŭ vam!»
Alaksandru Łukašenku taksama byŭ uručany jubilejny miedal «25 hod Słužbie biaśpieki prezidenta Respubliki Biełaruś».
Kamientary