Prakuror zapatrabavaŭ dla žurnalista Aleha Hruździłoviča paŭtara hoda kałonii
U sudzie Savieckaha rajona Minska siońnia razhladali spravu byłoha žurnalista «Radyjo Svaboda» Aleha Hruździłoviča. Jaho zatrymali 23 śniežnia, i z taho času žurnalist znachodzicca za kratami. Na pasiadžeńnie nie puścili šerah svajakoŭ i siabroŭ žurnalista, chacia zała była paŭpustaja. Adnak na sud zmahła trapić žonka Hruździłoviča Marjana, ale joj zabaranili zdymać, razmaŭlać z mužam, navat abmianiacca žestami. Spravu razhladaŭ sudździa Siarhiej Šaciła.
«Ja daloka siadzieła, kiepska bačyła Aleha. Kali ja pamachała Alehu, to milicyjant adrazu zabaraniŭ nam abmieńvacca žestami, nie dazvoliŭ mnie skazać jamu i słova», — raskazała Marjana.
Hruździłoviču inkryminujuć «arhanizacyju i padrychtoŭku dziejańniaŭ, jakija hruba parušajuć hramadski paradak, albo aktyŭny ŭdzieł u ich». Jon nibyta braŭ udzieł u niesankcyjanavanaj akcyi ŭ toj momant, kali jaho pazbavili akredytacyi MZS.
Paciarpiełym bokam u spravie vystupiŭ «Minsktrans», jaki zajaviŭ, što Aleh nibyta nanios im škodu u troch epizodach: padčas akcyj 16 žniŭnia, 11 i 18 kastryčnika 2020 hoda, bo ŭ Minsku byŭ spynieny ruch.
Palitviaźniu vystavili isk na 56 tysiač rubloŭ.
Hruździłoviča dapytali pa kožnym epizodzie: dzie žurnalist znachodziŭsia i što rabiŭ u daty, vystaŭlenyja ŭ abvinavačańni. Aleh adkazaŭ, što 16 žniŭnia 2020 hoda mieŭ akredytacyju MZS Biełarusi ŭ jakaści karespandenta «Radyjo Svaboda» i byŭ u kamizelcy z nadpisam «Presa», a 11 i 18 kastryčnika pracavaŭ jak pazaštatny žurnalist «Narodnaj voli», vykonvaŭ svaju pracu.
Śviedkam na pracesie vystupiŭ redaktar «Narodnaj voli» Iosif Siaredzič, jaki raskazaŭ sudu, što Aleh vykonvaŭ redakcyjnaje zadańnie pa aśviatleńni padziej.
Siaredzič taksama pazityŭna acaniŭ Aleha jak žurnalista i čałavieka, jakoha jon viedaje 40 hadoŭ. Akredytacyja Hruździłoviča da kanca žniŭnia paćviardžajecca daviedkaj MZS Biełarusi.
«Aleh trymajecca hodna, choć fizična i stomleny niavolaj. Znachodzić siły paśmiejvacca i z sumy isku, i naohuł sa sproby zrabić jaho ledź nie hałoŭnym pa barykadach», — paviedamiŭ siabra Aleha.
U sprečkach prakuror zapatrabavaŭ pryznać žurnalista vinavatym i pakarać jaho na 1,5 hoda pazbaŭleńnia voli ŭ kałonii ahulnaha režymu.
Prysud budzie ahučany ŭ čaćvier, 3 sakavika, u 12.00.
Kamientary