Historyja čatyrochhadovaj Lizy i jašče dvuch dziaciej, jakija zahinuli ŭ časie rakietnaha ŭdaru pa Vińnicy
Na travie pierad raźbitymi, abharełymi reštkami ŭniviermaha «Jubilejny» lažyć na baku, zapeckany kryvioju, ružovy vazok. Jon naležaŭ maleńkaj dziaŭčyncy pa imieni Liza. Čatyrochhadovaje dzicia było adnym z troch, jakija zahinuli ŭ čaćvier, kali rasijskija rakiety ŭdaryli pa centry Vińnicy, piša Bi-bi-si.
Maci Lizy, Iryna Dźmitryjeva, była ciažka ranienaja ŭ vyniku napadu.
Viadoma, što 23 čałavieki zahinuli, jašče vosiem ličacca źnikłymi bieź viestak. Dziasiatki znachodziacca ŭ špitalach.
Niezadoŭha da rakietnaha ŭdaru Iryna vykłała videa ŭ internet. Byŭ cudoŭny soniečny dzień, i maleńkaja Liza ŭśmichałasia, pinajučy pierad saboj svoj ružovy vazok, pakul jany razmaŭlali pra pachod da łahapieda.
«Liza była vielmi viasiołaja, jana lubiła prychodzić da nas. Jana była vielmi dobrym dziciom. Dla jaje maci jana była sensam žyćcia. Jana jaje šalona lubiła. Ja navat nie ŭjaŭlaju, jakaja heta trahiedyja dla siamji», — raspaviała Valeryja Karol.
Jana kiruje centram LogoClub, dzie Liza ranicaj, jak i bolšaść dzion, była na zaniatkach.
Čatyrochhadovaja dziaŭčynka mieła sindrom Daŭna. Akaŭnt jaje maci ŭ instahramie napoŭnieny fotazdymkami z žyćcia dziaŭčynki.
LogoClub, u jaki zajšła Liza, znachodzicca ŭsiaho ŭ kvartale ad płoščy Pieramohi, kudy trapili rakiety, i supracoŭniki adviali ŭsich dziaciej u schovišča, kali prahučała sirena ab tryvozie.
Ale, jak i mnohija, Liza i jaje maci ŭsio jašče byli na vulicy.
Kali pačałasia vajna, jany viarnulisia z Kijeva ŭ Vińnicu dziela biaśpieki, bo heta daloka ad linii frontu. Ale va Ukrainie bolš niama biaśpiečnych miescaŭ.
«Iryna adkryta kazała pra toje, što ŭ Lizy sindrom Daŭna. Jana chacieła, kab ludzi viedali, što niama čaho saromiecca, što takija dzieci ničym nie adroźnivajucca ad nas, jany vielmi dobryja», — kaža Valeryja.
U vyniku ataki taksama zahinuli dvoje chłopčykaŭ.
Razam z maci Viktoryjaj zahinuŭ siamihadovy Maksim Žaryj. Ukrainskaja palicyja paviedamiła, što jon byŭ na pryjomie ŭ miedcentry na pieršym paviersie centra «Jubilejny».
Ad samoj kliniki nie zastałosia ničoha, akramia sčarniełych ad ahniu ścien.
Imia vaśmihadovaha chłopčyka, jaki zahinuŭ, pakul nie nazyvajecca. Jon čakaŭ dziadźku ŭ pryparkavanaj pobač mašynie i apynuŭsia ŭ pastcy mocnaha ahniu. Karkasy mnohich zharełych aŭtamabilaŭ dahetul raskidanyja na miescy prylotu rakiety.
Ministerstva abarony Rasiei śćviardžała, što «vysokadakładnyja» rakiety byli nakiravanyja na Dom aficeraŭ, bo tam nibyta prachodziła sustreča ŭkrainskich vajskoŭcaŭ i zamiežnych čynoŭnikaŭ, dzie abmiarkoŭvalisia pastaŭki zbroi.
Nasamreč heta prosta kancertnaja placoŭka, i tam pavinien byŭ adbycca vystup śpiavački Roxolana ŭviečary 14 lipienia. Adzin z muzykaŭ, jaki byŭ unutry budynka, paźniej pamior u balnicy, inšyja atrymali ranieńni na vulicy.
Pavodle aficyjnych źviestak z pačatku vajny va Ukrainie zahinuli 352 dziciaci, jašče sotni byli paranienyja.
Ciapier čytajuć
Babaryka paśla sustrečy z Pratasievičam trapiŭ u ŠIZA1
Kamientary