Ideałahičnaja mietadyčka pieraličvaje IT-kampanii, jakimi abaviazkova hanarycca. Ale jość niuans — usie jany ŭciakli ź Biełarusi
U sučasnaj Biełarusi zastajecca takaja źjava, jak «adzinyja dni infarmavańnia» — heta kali ideołaham na miescach davodziać tezisy, jakija tyja potym pavinny retranślavać na pracoŭnyja kalektyvy. Trahikamičny momant jość u materyjałach za lipień.
«Biełaruś uvachodzić u pieralik suśvietnych lidaraŭ pa eksparcie IT-pasłuh na dušu nasielnictva, a mabilnyja dadatki, stvoranyja rezidentami PVT, vykarystoŭvajuć bolš za miljard ludziej bolš jak u 190 krainach śvietu. Siarod ich — Viber, MSQRD, MAPS.ME, Flo i mnohija inšyja», — voś što patrabavałasia viedać i pašyrać biełaruskim ideołaham u lipieni. Heta cytata z materyjałaŭ dla «Adzinaha dnia infarmavańnia».
Ale bolšaść pieraličanych brendaŭ źjechali ź Biełarusi. Tak, jašče ŭ žniŭni 2020-ha Viber abviaściŭ, što spyniaje inviestycyi ŭ Biełaruś i zakryvaje ofis.
«Toje rašeńnie, jakoje my pryniali, było dziela biaśpieki našych supracoŭnikaŭ. Tamu što dvoje našych supracoŭnikaŭ byli aryštavanyja. Aryštavany taksama byŭ baćka adnaho z supracoŭnikaŭ. Usie troje apynulisia pad aryštami bieź vidavočnych pryčyn. […] Adzin znachodziŭsia pobač ź miescam, dzie aryštoŭvali inšych, druhi byŭ naziralnikam na vybarčym učastku. Jon zadaŭ niekalki pytańniaŭ, i praz 20 chvilin jaho aryštavali. U hetym strachu niemahčyma pryniać pravilnaje rašeńnie. […] Viber zakranuła hetaja žorstkaść, my achviara hetaha hvałtu», — kazaŭ u intervju Forbes hiendyrektar Rakuten Viber Džamieł Ahaŭa.
Stvaralnik MAPS.ME Juryj Mielničak taksama ŭžo daŭno nie źjaŭlajecca ŭ Biełarusi, pradaŭšy dom pad Łahojskam i evakujavaŭšy supracoŭnikaŭ.
U 2020-m jon absalutna prazrysta vykazaŭsia pra režym.
«Bandyty ŭ maskach i AMAP na vulicach našych haradoŭ źbivajuć biazzbrojnych ludziej: našych siabroŭ i kaleh, mirnych pratestoŭcaŭ, padletkaŭ i piensijanieraŭ. […] Narmalnaja reakcyja na hvałt — bi abo biažy.
Biełarusy abrali svaim prezidentam Śviatłanu Cichanoŭskuju. Pamahatyja dyktatury skrali našy hałasy i sprabujuć zabrać našy hramadzianskija pravy. Milicyja zamiest taho, kab abaraniać ludziej, ich žorstka źbivaje. KDB i SK zamiest abarony intaresaŭ svajho naroda i pošuku złačyncaŭ ładziać palityčnyja represii» — napisaŭ Juryj Mielničak u svaim fejsbuku.
Kampanija-stvaralnik Flo pakrysie pieraviezła svoj ofis i supracoŭnikaŭ u Vilniu i dziejničaje ŭ Jeŭrasajuzie.
Nieviadoma, ci trapiŭ praz heta choć adzin ź ideołahaŭ u niajomkuju situacyju.
Ciapier čytajuć
Čamu YouTube vydaliŭ kanały BiełTA, STB i ANT? Voś što viadoma11
Kamientary