Niamiecki terminał dla pryjomu zvadkavanaha pryrodnaha hazu ŭžo pracuje, jaho pabudavali ŭ rekordnyja terminy
3 studzienia na novy niamiecki terminał pa pryjomie ZPH u partovym horadzie Vilhielmshafen, što na Paŭnočnym mory, prybyło sudna Maria Energy sa zvadkavanym hazam z ZŠA. Terminał źbiralisia budavać piać hadoŭ, ale ŭ situacyi, kali pačaŭsia kanflikt z Rasijaj, spravilisia mienš čym za hod.
Fota: Michael Sohn / AP
Pa infarmacyi kampanii Uniper SE, apieratara terminała ŭ Vilhielmshafienie, tankier Maria Energy moža za raz pieravozić kala 170 tys. kubamietraŭ ZPH, što dastatkova dla zabieśpiačeńnia elektraenierhijaj kala 50 tys. niamieckich chatnich haspadarak na praciahu adnaho hoda.
«Vykarystańnie ZPH u jakaści nadziejnaj krynicy enierhii maje vyrašalnaje značeńnie dla enierhabiaśpieki Hiermanii i Jeŭropy», — skazaŭ Niek den Chołander, kamiercyjny dyrektar Uniper SE.
Sam niamiecki terminał ZPH u Vilhielmshafienie byŭ aficyjna adkryty letaś 17 śniežnia i pabudavany mienš čym za hod pry raniej zajaŭlenych terminach na jaho ŭźviadzieńnie ŭ 5 hadoŭ, što źjaŭlajecca absalutnym rekordam.
Heta pry tym, što zvyčajna bujnyja budaŭničyja prajekty ŭ Hiermanii prasoŭvajucca vielmi pavolna (naprykład, u 2020 hodzie Bierlin adkryŭ novy aeraport sa spaźnieńniem na dzieviać hadoŭ).
«Hety terminał — sapraŭdnaja honka z časam. Heta bitva», — padkreśliŭ kiraŭnik prajekta Franc-Jozef Kisinh.
Terminał zdolny prymać u siabie nie bolš za dva hazavyja tankiery adnačasova i zaklikany vyvodzić pryrodny haz z vadkaha stanu ŭ narmalny dla jaho nastupnaj realizacyi (astudžeńnie pryrodnaha hazu da minus 162°S pieratvaraje jaho ŭ vadkaść, jakuju zručna dastaŭlać marskim šlacham na vialikija adlehłaści).
«Jak stratehičnyja partniory, my spadziajomsia zabiaśpiečyć doŭhaterminovuju biaśpieku enierhazabieśpiačeńnia našych sajuźnikaŭ za košt bieśpierapynnaj pastaŭki čystaha i nadziejnaha ZPH z ZŠA», — skazaŭ Majk Sabiel, vykanaŭčy dyrektar Venture Global, čyja kampanija i adpraviła tankier z hazam u Hiermaniju.
Terminał u Vilhielmshafienie źjaŭlajecca adnym ź niekalkich takich abjektaŭ, jakija rychtujucca ŭ Hiermanii dla praduchileńnia niedachopu enierhii va ŭmovach vajennaha ŭvarvańnia Rasii va Ukrainu. Rasija, jakaja da pačatku vajny zadavalniała niamiecki hazavy popyt bolš čym napałovu, spyniła pastaŭki ŭ minułym hodzie, što, na dumku Bierlina, źjaŭlajecca pomstaj za jaho padtrymku Ukrainy.
Pakolki niamieckija pramysłovaść i chatnija haspadarki mocna zaležać ad pryrodnaha hazu, Hiermanija imknułasia atrymać jaho ad inšych eksparcioraŭ i pabudavać svaje ŭłasnyja abjekty dla impartu ZPH, kab całkam zamianić pastaŭki rasijskaha hazu — i heta ŭ jaje atrymałasia.
Ahienctva Deutsche Welle, sa spasyłkaj na infarmacyju Fiederalnaha ministerstva ekanomiki i abarony klimatu Hiermanii, paviedamiła, što kraina ŭ pieryjad ź lutaha 2022 hoda pa studzień 2023-ha zmahła całkam admovicca ad rasijskich pastavak pryrodnaha hazu, nafty i kamiennaha vuhalu. Na ciapierašni momant impartnyja pakazčyki hetych vidaŭ paliva z Rasii roŭnyja nulu.
Bolš za toje, pavodle źviestak tarhoŭ na 4 studzienia, ceny na haz u Jeŭropie apuścilisia nižej za 750 dalaraŭ za tysiaču kubamietraŭ upieršyniu z 2 listapada 2021 hoda.
Kamientary