Zołatava i Čekina — 12 hadoŭ kałonii. Na prysudzie sudździa Valancina Ziańkievič trymała ich u kajdankach
Siońnia byŭ vyniesieny prysud hałoŭnamu redaktaru Tut.by Marynie Zołatavaj i hiendyrektaru Ludmile Čekinaj.
Čekinaj dali taksama štraf u 37 tysiač rubloŭ (tysiača bazavych vieličyń).
Sud pa spravie Tut.by pačaŭsia 9 studzienia i prachodziŭ u zakrytym režymie. Abvinavačvanymi pa im prachodzili piać byłych rabotnikaŭ TAA «Tut baj miedyja»: dyrektar Ludmiła Čekina, hałoŭny redaktar Maryna Zołatava, redaktar adździeła ekanomiki i palityki Volha Łojka, karespandent Alena Taŭkačova i juryskonsult Kaciaryna Tkačenka.
Pierad sudom Taŭkačova, Łojka i Tkačenka vyjechali za miažu. Ich abviaścili ŭ vyšuk, a kryminalnuju spravu ŭ dačynieńni da ich vydzielili ŭ asobnuju vytvorčaść.
Ludmile Čekinaj byli inkryminavanyja «ŭchileńnie ad vypłaty padatkaŭ, arhanizacyja raspalvańnia sacyjalnaj varožaści i varažniečy, a taksama raspaŭsiud materyjałaŭ z zaklikami da dziejańniaŭ, nakiravanych na pryčynieńnie škody nacyjanalnaj biaśpiecy Biełarusi».
Maryna Zołatava abvinavačvałasia ŭ «dapamozie va ŭchileńni ad vypłaty padatkaŭ, raspalvańni sacyjalnaj varožaści i varažniečy, raspaŭsiudzie materyjałaŭ z zaklikami da dziejańniaŭ, nakiravanych na pryčynieńnie škody nacyjanalnaj biaśpiecy Biełarusi».
Napiaredadni prysudu BT vypuściła prapahandyscki film pra Tut.by. Supracoŭnikaŭ partała abvinavacili ŭ rusafobstvie, nahniatańni situacyi ŭ Biełarusi ŭ časie pratestaŭ, raspalvańni varožaści i ŭchileńni ad vypłaty padatkaŭ. U siužecie vykarystany intervju supracoŭnikaŭ, jakija ŭ toj momant znachodzilisia ŭ niavoli i faktyčna byli zakładnikami. U amal paŭtarahadzinnym videa niama ni słova Ludmiły Čekinaj i tolki adna cytata Maryny Zołatavaj, chutčej za ŭsio vyrazanaja z zapisaŭ śledčych dziejańniaŭ, dzie jana zajaŭlaje, što partał zaŭždy trymaŭsia žurnalisckich standartaŭ.
Zołatava i Čekina pryznanyja palitviaźniami. KDB uklučyŭ ich u śpis «asob, jakija majuć dačynieńnie da terarystyčnaj dziejnaści».
Razhrom Tut.by adbyŭsia ranicaj 18 maja 2021 hoda, kali siłaviki pryjšli dadomu da niekatorych supracoŭnikaŭ kampanii i pradstaŭnikoŭ partniorskich arhanizacyj, a taksama ŭ ofisy ŭ Minsku i abłasnych centrach.
U toj dzień zatrymali 15 čałaviek. Ale z taho času bolšaść fihurantak była vyzvalena z-pad varty.
Sudździoj na pracesie vystupała Valancina Ziańkievič. Rola sudździaŭ na palityčnych pracesach čysta naminalnaja: na tysiačach sudoŭ nie było nivodnaha apraŭdalnaha prysudu. Tym nie mienš, Valancina Ziańkovič zdoleła prajavić siabie: na čas prysudu Zołatavaj i Čekinaj nie źniali z ruk kajdankoŭ.
Kamientary