Siońnia — adno z samych važnych narodnych śviat: Jurjeŭ dzień, Jurje, ci Jurja viasnovy. Zhodna z ujaŭleńniami našych prodkaŭ, Jurja, apiakun uradlivaści, admykaje ziamlu i tym samym abviaščaje pra nadychod sapraŭdnaj viasny, nahadvaje «Narodnaja Vola».
Kaliści mienavita 6 maja sialanie ŭpieršyniu paśla zimy ŭrańni vyhaniali karoŭ na vypas, a koniej — na načleh. Hety dzień taksama ličycca śviatam pastuchoŭ. A carkva ŭšanoŭvaje vielikamučanika Hieorhija Pieramahanosca — niabiesnaha apiekuna ŭsich voinaŭ.
U niekatorych miascovaściach Biełarusi i dahetul zachavalisia abrady i tradycyi na Jurje.
Jurjeŭ dzień — śviata pastuchoŭ. Šmat dzie ich i zaraz tradycyjna ŭšanoŭvajuć i častujuć u hety dzień.
Žyviole na Jurje taksama nadajuć šmat uvahi. Šmat dzie vyhaniajuć, pakłaŭšy pierad hetym la paroha chlava vielikodnaje jajka, śpiecyjalna dla hetaha prypasienaje. Našy prodki vieryli, što tady ich karovy buduć kruhłymi i poŭnymi. Dzieści žyviołu źlohku paściobvajuć aśviečanymi vierbnymi halinkami, jakija potym utyrkajuć u ścieny chlava. I heta ličyłasia abaronaj ad złych duchaŭ na ceły hod.
Kali ž ludzi chacieli być nastupny hod zdarovymi, mocnymi, poŭnymi sił, dyk kačalisia na Jurje pa ranišniaj rasie. Ličyłasia, što i ad surokaŭ jana dapamahaje. Praŭda, sioleta maj taki, što možna i zachvareć ad takoha «abiarehu».
Jak apiekunu ŭradlivaści, 6 maja Jurju taksama vynosili na paletki karavaj dy inšyja pačastunki. I nie prosta išli, a z peŭnymi abradavymi dziejańniami.
Naprykład, u vioscy Pahost Žytkavickaha rajona zachodziać u žyta, kab pamierać karavajem jaho vyšyniu. Zachodziać praz svojeasablivuju bramku, zroblenuju z ručnika. Jana simvalizuje varoty, što admykaje Jurja.
A voś u vioscy Ivanava Słabada, što ŭ Lelčyckim rajonie na Jurje ŭpryhožvajuć jełku i nosiać jaje pa vioscy.
Što datyčyć narodnych prykmiet, to jany nastupnyja: «Jak na Jurja rasa — chopić koniam aŭsa», «Na Jurja doždž — skacinie lohki hod, a na hrečku — niedarod», «Kali na Jurja maroz, dyk buduć dobryja prosa i avios», «Jak doždž na Jurja, budzie chleb i ŭ durnia»…
Nahadvajem, što ŭ hodzie śviatkujecca dva Jurji — budzie jašče vosieński.
Kamientary
a ŭčora nočču poŭnia i adnačasova miesiacovaje zaćmieńnie
Da my Boha źvieličajem.
Padaj, Boža, da zamkoŭ klučy
Adamknuci syruju ziamlicu
Da na žyta, na pšanicu,
Da na ŭsiakuju pašnicu,
…
A ŭ dziažy padychodnaje,
A ŭ piečy da prypioknaje,
A na stale sytna-spornaje.