Zahinuŭ biełarus, jaki vajavaŭ va Ukrainie na baku Rasii. Pra jaho raniej užo nie raz pisali
6 žniŭnia praŭładnyja telehram-kanały paviedamili pra hibiel va Ukrainie 47-hadovaha Siarhieja Łanavienki. Jon vajavaŭ na Danbasie ŭ farmavańniach samaabvieščanaj «DNR».
Siarhiej Łanavienka — davoli viadomy piersanaž, pra ŭdzieł jakoha ŭ vajnie na baku prarasijskich siłaŭ stała viadoma hod tamu, prytym z prapahandysckich krynic. 19 lipienia 2022 hoda ŭradženca Asipovičaŭ pakazali pa telekanale «Biełaruś 1». Heta vyklikała cikavaść da jahonaj asoby z boku niezaležnych biełaruskich ŚMI, u tym liku źviazvałasia ź im i «Naša Niva».
Kali žurnalist «Našaj Nivy» źviazaŭsia z Łanavienkam praz telefon, toj raskazaŭ, što znachodzicca na Danbasie z kanca lutaha. Spačatku, maŭlaŭ, dapamahaŭ uciekačam z Maryupala, a potym uziaŭ u ruki zbroju. Vajavaŭ u składzie «narodnaj milicyi DNR» u rajonie Aŭdziejeŭki, ale nie tolki tam.
Łanavienka śćviardžaŭ, što na jaho rukach niama kryvi nievinavatych ludziej, a vajuje jon, maŭlaŭ, ź idejnych mierkavańniaŭ. Jaho zarobak nibyta ŭ razy mienšy, čym u rasijskaj armii, dzie atrymlivajuć pa 200 tysiač rubloŭ na miesiac.
Łanavienka — były desantnik, udzielnik pikietaŭ u padtrymku «Ruskaha śvietu». Paśla zajmaŭsia ramontam aŭto.
U 2015 Hodzie Siarhiej Łanavienka pryciahvaŭsia da adkaznaści za hvałt u dačynieńni da inśpiektara DPS.
A ŭ 2018 hodzie jon patrapiŭ u inšuju hučnuju historyju. Tady Łanavienku źbili la staličnaha handlovaha centra «Moma» (stancyja mietro «Mahiloŭskaja») — za majku «DNR». Za hetuju bojku adnamu ź minčukoŭ prysudzili 1,5 hoda papraŭčych rabot.
Paśla napadu Rasii na Ukrainu ŭ lutym 2022 hoda Łanavienka publikavaŭ fota z akupavanych terytoryj. Jon pisaŭ, što zajmajecca zboram i raźmierkavańniem humanitarnaj dapamohi, źviartaŭ uvahu «Fłahštok». Na fota były desantnik paziravaŭ z bajavoj zbrojaj na fonie rasijskaj vajskovaj techniki ź dziaržaŭnaj simvolikaj Biełarusi.
Kali hod tamu Łanavienka pryjazdžaŭ na adpačynak u Biełaruś, nijakich pytańniaŭ da jaho z boku miascovych siłavikoŭ nie było, choć pavodle dziejnych zakonaŭ jany nibyta pavinny pieraśledavać za najomnictva, i da 2020 hoda tak časam i rabili navat u dačynieńni da ŭdzielnikaŭ prarasijskich farmavańniaŭ. Sam Łanavienka kazaŭ, što razumieje, što parušaje biełaruski zakon, i hatovy za heta adkazać.
«Kali ja jašče raz nadumaju pryjechać, pytańni ŭ lubym vypadku buduć zadavać. Heta ich praca. Ja tolki za. Tym bolš u mianie takaja padrychtoŭka. Śpiecsłužby abaviazanyja mianie trymać u pole zroku. Ja viedaju, što majo sumleńnie čystaje, dziejničaju pa zakliku sumleńnia», — skazaŭ jon.
Niezaležnyja ŚMI sprabavali ŭ toj čas zdabyć niejki ŭciamny kamientar siłavikoŭ pa hetym pytańni, ale hetaha nie ŭdałosia.
Pavodle biełaruskaha zakanadaŭstva za samavolny ŭdzieł va ŭzbrojenym kanflikcie na terytoryi inšaj dziaržavy praduhledžanaja kryminalnaja adkaznaść — artykuły 133 i 361-3 KK. Hetymi artykułami ŭłady i prapahanda časta pahražajuć kalinoŭcam i inšym dobraachvotnikam, što vajujuć na baku Ukrainy, ale čamuści nie zhadvajuć ich, kali havorka zachodzić pra «DNR».
Byłyja siłaviki i kryminalniki. Što za biełarusy vajujuć va Ukrainie na baku Rasii
«Usiu miascovuju ŭładu pastavili hetyja rasijanie». Stali viadomyja novyja padrabiaznaści, jak u Akciabrskim nie dali pachavać rasijskaha vajskoŭca
«Biełarusy, jakija doma, čakajcie nas». Były roznarabočy z Łuninieččyny vajuje za Rasiju — uziaŭ pazyŭny «Bulba»
Kamientary