«Adbityja nyrki — samaje lohkaje». Z-błohier «Trynaccaty» zajaviŭ, jak jaho katavali ŭ SIZA z-za kanfliktu z «Achmatam»

Jahor Huzienka, viadomy jak Z-błohier «Trynaccaty», raskazaŭ, što jaho katavali ŭ SIZA paśla zatrymańnia ŭ Staŭrapolskim krai. I ŭ hetym jon abvinavačvaje čačenski śpiecyjalny atrad «Achmat».

Na kanał Huzienki ŭ telehramie padpisany amal 300 tysiač čałaviek. Jon atrymaŭ viadomaść jak aktyŭny prychilnik vajny suprać Ukrainy. Adnačasova «Trynaccaty» časam vostra krytykuje rasijskija ŭłady za toje, što jany drenna viaduć vajnu. Sam Huzienka, jak ličycca, udzielničaŭ u vajnie z 2014 hoda.

5 kastryčnika błohiera žorstka zatrymali na śviatkavańni Dnia horada ŭ Novapaŭłaŭsku Staŭrapolskaha kraju. Jaho vinavacili ŭ napadzie na palicejskaha, adnak da suda sprava nie dajšła: Huzienka padpisaŭ kantrakt ź Ministerstvam abarony i pajechaŭ na vajnu suprać Ukrainy ŭ, jak jon zajaŭlaje, adno z šturmavych padraździaleńniaŭ. Paśla hetaha «Trynaccaty» praciahnuŭ vieści błoh.

U adnym z apošnich pastoŭ Huzienka abrynuŭsia z krytykaj na śpiecyjalny atrad «Achmat» i zajaviŭ, što ŭ SIZA jaho katavali pa zakazie čačenskich kamandziraŭ.

«Biada była ŭ tym, što načalnik FSIN Staŭrapolskaha kraju, kudy ja trapiŭ u turmu, hienierał Anzor Iryschanaŭ — były načalnik FSIN pa Čačenskaj respublicy. Tamu ŭ SIZA horada Piacihorska ja adčuŭ na sabie ŭsie «pryjemnaści» katavańniaŭ i izalataraŭ, adbityja nyrki heta samaje lohkaje, što sa mnoj adbyłosia», — zajaviŭ Huzienka.

Katavańni jon patłumačyŭ daŭnim kanfliktam z čačencami. «Trynaccaty» niekali aktyŭna krytykavaŭ byłych najmitaŭ PVK «Vahnier», jakija pierajšli ŭ «Achmat». Paśla hetaha, jak śćviardžaje Huzienka i jaho prychilniki, čačency razharnuli maštabnuju kampaniju pa dyskredytacyi «Trynaccataha», u tym liku prapanoŭvali inšym błohieram hrošy za reposty kampramatu.

«I voś hetaja kupka «achmataŭcaŭ», kali mianie zakryli, adpraviłasia pomścić na poŭnuju katušku», — ličyć Huzienka.

Jon zajaviŭ, što čačenskija padraździaleńni dla jaho — nie sajuźniki. I pa sutnaści abvinavaciŭ čačenskich vajennych u zdradzie.

«Nazyvajcie ich kim zaŭhodna sajuźnikami, ale asabista ja ich takimi nie liču. Na heta ŭ mianie jość šmat pryčyn, pryčyn, jakija ja całkam adčuŭ na sabie, znachodziačysia ŭ turmie. Prajšoŭšy praz zdradu, katavańni i zabyćcio. Tolki bajaźliŭcy i zdradniki mohuć adyhryvacca na čałavieku, jakoha zapierli ŭ kletcy, čym, ułasna, jany i zajmalisia», — napisaŭ Z-błohier.

Jon dadaŭ, što dla jaho naviečna zastanucca hierojami Juryj Budanaŭ, jakoha sudzili za zachop i zabojstva 18-hadovaj čačenki padčas Druhoj čačenskaj vajny, i Alaksiej Jarmołaŭ — carski hienierał, jaki dałučyŭ Čačenskuju respubliku da Rasijskaj impieryi.

• 1
• 0
• 25
• 6
• 2
• 1
• 1
• 0