U Rasii śviatar, jaki padazrajecca ŭ sprobie zhvałtavańnia dziaŭčyny, adpraviŭsia na vajnu va Ukrainu
Jekaciarynburhski mitrapalit vykazaŭ nadzieju, što ijerej Sidaraŭ «nie budzie siadzieć u štabie, a na poli boju pryniasie pakajańnie praz samaachviarnaść i ratny podźvih».
Śviatar Jekaciarynburhskaj jeparchii Daniił Sidaraŭ, jakoha padazrajuć u sprobie zhvałtavańnia 19-hadovaj dziaŭčyny, adpraviŭsia na vajnu va Ukrainie. Pra heta ŭ svaim telehram-kanale paviedamiŭ mitrapalit Jekaciarynburhski i Vierchaturski Jaŭhien, piša «Novaja hazieta. Jeŭropa»
«Ijerej Daniił Sidaraŭ, biezumoŭna, bolš nikoli nie zmoža nieści śviatarskaje słužeńnie, ale hetaja trahična sapsavanaja staronka jaho žyćcia — nie apošniaja. Jon zdoleŭ pierakanaŭča i ščyra paprasić prabačeńnia ŭ pakryŭdžanych im ludziej i atrymaŭ ich prabačeńnie», — napisaŭ mitrapalit.
Pavodle jaho słoŭ, Sidaraŭ užo prystupiŭ da «słužeńnia Radzimie i jaje abarony» ŭ roli šarahoŭca desantna-šturmavoha ŭzvoda. Mitrapalit vykazaŭ nadzieju, što ijerej «nie budzie siadzieć u štabie, a na poli boju pryniasie plon pakajańnia praz samaachviarnaść i ratny podźvih».
«U adpaviednaści z paradkam, vyznačanym prezidentam, i pa zahadzie svajho sumleńnia, jon adpraviŭsia na miesca niasieńnia vajennaj słužby. I ja ŭ malitvach addaju jaho ŭ ruki Miłasernaha Hospada», — dadaŭ Jaŭhien.
U dačynieńni da Sidarava była raspačata kryminalnaja sprava pa fakcie zamachu na hvałtoŭnyja dziejańni seksualnaha charaktaru (č. 3 art. 30, č. 1 art. 132 KK).
Pa viersii śledstva, 10 listapada 26-hadovy śviatar pieraśledavaŭ dziaŭčynu, kali taja viartałasia dadomu. La padjezda mužčyna nie davaŭ joj zajści ŭ dom, pavaliŭ na ziamlu i masturbavaŭ — heta było zafiksavana na kamieru videadamafona.
Sidarava zatrymali 25 listapada. U toj ža dzień sud abraŭ jamu mieru strymańnia ŭ vyhladzie zabarony peŭnych dziejańniaŭ. Jekaciarynburhskaja jeparchija adchiliła śviatara ad słužeńnia i vyvieła jaho za štat. Danyja pra jaho byli vydalenyja z aficyjnaha sajta jeparchii.
Śviatar z 2020 hoda zajmaŭ pasadu sakratara-refierenta mitrapalita Jekaciarynburhskaha i Vierchaturskaha Jaŭhiena (Kulbierha), a taksama byŭ štatnym klirykam chrama ŭ honar sašeścia śviatoha ducha «Vialiki Złatavust».
U Sidarava jość žonka Kaciaryna i dzicia. Žančyna prysutničała na pasiadžeńni suda pa pytańni miery strymańnia, dzie vystupiła ŭ padtrymku muža. Paśla hetaha jana raspłakałasia ŭ kalidory i admoviłasia razmaŭlać z presaj.
Ciapier čytajuć
U milicejskim konkursie pryhažości pieramahła amapaŭka, jakaja ŭ 2020 hodie razhaniała pratesty35
Kamientary
A kali vyžyvie, to vierniecca i praciahnie hvałcić