Kiraŭnik pierachodnaha ŭrada Siryi Achmied aš-Šaraa i prezident Turcyi Redžep Taip Erdahan abmiarkujuć abaronny pakt, u ramkach jakoha Ankara zmoža raźmiaścić svaje bazy na terytoryi paŭdniovaha susieda, paviedamili čatyry krynicy ahienctva Reuters u siryjskich śpiecsłužbach.
Sustreča dvuch lidaraŭ prachodzić 4 lutaha. Sa słoŭ surazmoŭcaŭ Reuters, havorka pojdzie pra dźvie tureckija bazy ŭ pustynnym rajonie na ŭschodzie Siryi, viadomym jak Badyja. Raniej praŭradavaja hazieta Türkiye paviedamlała, što Ankara płanuje raźmiaścić tam da 50 źniščalnikaŭ F-16.
Akramia hetaha, Turcyja atrymaje dazvoł na vykarystańnie pavietranaj prastory Siryi ŭ vajskovych metach i voźmie na siabie abaviazacielstva ab dapamozie ŭ vypadku ŭźniknieńnia źniešnich pahroz.
Aficyjny pradstaŭnik kiraŭnika pierachodnaha ŭrada paviedamiŭ ahienctvu, što aš-Šaraa abmiarkuje «padrychtoŭku Turcyjaj novaj siryjskaj armii» — raniejšaja była raspuščanaja paśla źviaržeńnia režymu Bašara Asada naprykancy minułaha hoda, — a taksama «novyja śfiery supracoŭnictva», nie ŭdakładniŭšy, jakija mienavita.
Pry hetym u Turcyi, jakaja ŭvachodzić u NATA, užo jość vajskovyja bazy ŭ rajonie siryjskich pravincyj Alepa i Idlib.
Raniej krynicy vydańnia Bloomberg kazali, što Turcyja, jakaja padtrymała paŭstancaŭ padčas niadaŭniaj revalucyi, vystupaje suprać zachavańnia rasijskich baz u Siryi, a novaja administracyja pamiataje, što Pucin dapamoh Asadu nie sastupić u vajnie, jakaja pačałasia paśla «arabskaj viasny», i da apošniaha sprabavaŭ vyratavać jahony režym. Tamu naŭrad ci Kreml moža raźličvać na stanoŭčaje raźviazańnie pytańnia ab zachavańni im dźviuch vajskovych baz u Siryi: avijabazy ŭ Chmiejmimie i marskoj bazy ŭ Tartusie.
Novyja ŭłady Siryi patrabujuć ad Rasii vydać Bašara Asada
Novyja ŭłady Siryi pahadzilisia adnavić adnosiny z Rasijaj. Ale tolki paśla pryznańnia pamyłak i vypłaty kampiensacyi
U port Tartusa pryjšli rasijskija karabli. Rasija vyvodzić vojski ź Siryi?
Siryjski port Tartus razarvaŭ 49-hadovy inviestkantrakt z Rasijaj
ZŠA źmiakčyli niekatoryja sankcyi suprać Siryi
Kamientary