Stała viadoma, kali i dzie FSB zavierbavała topavaha supracoŭnika SBU
Učora stała viadoma, što SBU vykryła ŭ svaich ža šerahach rasijskaha ahienta — kiraŭnika štaba Antyterarystyčnaha centra. Zatrymlivaŭ jaho asabista kiraŭnik SBU Vasil Maluk, jaki nazvaŭ heta zatrymańnie histaryčnym. Historyja ŭžo stała adnym z najbujniejšych špijonskich skandałaŭ va Ukrainie za apošnija hady.
Jak daviedałasia «Ahientstvo», dla viarboŭki zatrymanaha napiaredadni kiraŭnika štaba Antyterarystyčnaha centra Słužby biaśpieki Ukrainy Dźmitryja Kaziury FSB pasyłała ŭ Vienu hrupu z dvuch čałaviek. Pra heta śviedčać źviestki pamiežnaj słužby Rasii.
Pra zatrymańnie rasijskaha špijona SBU paviedamiła napiaredadni. Śpiecsłužba apublikavała ŭ svaim pres-relizie fatahrafii zatrymanaha, pa jakich ukrainskija ŚMI ŭstanavili, što havorka idzie pra Kaziuru. Pavodle źviestak SBU, jon byŭ zavierbavany ŭ 2018 hodzie ŭ Vienie, jaho kurataram byŭ aficer FSB Juryj Šatałaŭ.
Pavodle ŭciečak baz źviestak, Juryj Šatałaŭ — 48-hadovy ŭradženiec Ivanava, jaki žyvie ŭ Maskoŭskim rajonie Jasienieva (tut ža znachodzicca štab-kvatera Słužby zamiežnaj vyviedki). U adnoj z zapisnoj knižak jaho numar telefona zapisany jak «Šatałaŭ Juryj SłužFSB».
Šatałaŭ sapraŭdy lataŭ u Vienu ŭ 2018 hodzie, śviedčać źviestki z uciečki pamiežnaj słužby. Jaho rejs u Aŭstryju adbyŭsia 15 sakavika 2018 hoda, a nazad jon vylecieŭ praz try dni.
Jaho spadarožnikam u hetaj pajezdcy byŭ supracoŭnik upraŭleńnia FSB pa Uljanaŭskaj vobłaści Dźmitryj Arefjeŭ (jon taksama palacieŭ u Vienu 15 sakavika i prylacieŭ nazad u Rasiju praz try dni, pry hetym abodva razy Arefjeŭ prachodziŭ miažu prykładna ŭ adzin čas z Šatałavym).
Na ŭnutranych rejsach Šatałaŭ prynamsi adzin raz (u červieni 2020 hoda) lataŭ razam z Alaksandram Sojmam, jaki ŭ 2021 hodzie byŭ namieśnikam načalnika pieršaha adździeła śledčaha ŭpraŭleńnia FSB, pisaŭ «Prajekt». Heta syn pałkoŭnika FSB u zapasie Vasila Sojmy.
Va ŭciečkach taksama možna znajści dźvie inšyja zamiežnyja pajezdki Šatałava. Uletku 2019 hoda jon lataŭ u Polšču, a ŭ lipieni 2022 hoda — u Stambuł, jaki paśla pačatku poŭnamaštabnaj vajny va Ukrainie staŭ vykonvać rolu pierasadačnaha vuzła dla tych, chto lacić z Rasii ŭ inšyja krainy. U hetych pajezdkach za miažu Šatałava taksama supravadžali inšyja supracoŭniki FSB, śviedčać źviestki pamiežnaj słužby.
Zatrymańnie Kaziury pravodziŭ asabista kiraŭnik SBU Vasil Maluk, jaki nazvaŭ heta «histaryčnaj śpiecapieracyjaj, uličvajučy ŭzrovień ahienta, jaho prafiesijnuju padrychtoŭku i toj maštab škody, jaki jon patencyjna moh by nanieści».
Pavodle źviestak ukrainskaj śpiecsłužby, Rasija patrabavała ad čalcoŭ ahienturnaj sietki źbirać i pieradavać źviestki ŭ śfiery abarony. U SBU raspaviali, što doŭhi čas praz vykrytaha ahienta Kijeŭ pieradavaŭ Maskvie dezynfarmacyju. Kaziury vystavili abvinavačvańnie pa artykule ab dziaržzdradzie, jamu pahražaje pažyćciovaje pazbaŭleńnie voli.
Ciapier čytajuć
Jak być maładym baćkam u 66 hadoŭ, pra maru i pra novy albom — u hutarcy ź lehiendaju fołku Ivanam Kirčukom1
Jak być maładym baćkam u 66 hadoŭ, pra maru i pra novy albom — u hutarcy ź lehiendaju fołku Ivanam Kirčukom
Historyja ŭ EHU — heta histfak vašaj mary. Jeŭrapiejski dypłom z navučańniem na biełaruskaj movie pry intensiŭnym vyvučeńni anhlijskaj. I poŭnaja svaboda11
Historyja ŭ EHU — heta histfak vašaj mary. Jeŭrapiejski dypłom z navučańniem na biełaruskaj movie pry intensiŭnym vyvučeńni anhlijskaj. I poŭnaja svaboda1
«Vajna ŭsio śpiša». Biełaruskim udzielnikam hiej-prajda ŭ Vilni pahražali raspravaj ad imia biełaruskich vajaroŭ za vykarystańnie bieła-čyrvona-biełaha ściaha219219
Kamientary