U Biełaruś nie mohuć pieraličvać alimienty z Rasii. I rašyć prablemu pakul nie ŭdajecca
Abmiežavańnie na pieravody hrošaj za miežy Rasii zakranuła i biełaruskich baćkoŭ, jakija čakajuć alimienty.
Alimienty z Rasii apošnija hady nie mohuć pieraličać na biełaruskija bankaŭskija rachunki. Prablemu ŭźniali na pasiadžeńni deputataŭ Pałaty pradstaŭnikoŭ 14 maja.
«Rasijskaj Fiederacyjaj u zakanadaŭstva ab supraćdziejańni lehalizacyi dachodaŭ [atrymanych złačynnym šlacham] i finansavańni teraryzmu ŭniesiena ahulnaja zabarona na toje, kab hrašovyja srodki, jakija pastupajuć na rachunki sudovych prystavaŭ Rasijskaj Federacyi, pieraličalisia kudyści za miežy Rasijskaj Fiederacyi naŭprost», — patłumačyŭ ministr justycyi Jaŭhien Kavalenka.
Hetyja źmieny ŭstupili ŭ siłu ŭ studzieni 2023 hoda.
Prablema mienavita ź pieravodam hrošaj u Biełaruś, a nie ich spahnańniem z daŭžnikoŭ, padkreśliŭ čynoŭnik.
Jon dadaŭ, što Miniustam Rasii padrychtavany adpaviedny prajekt fiederalnaha zakona, kab źmianić situacyju na karyść biełaruskich atrymalnikaŭ alimientaŭ. Ale kali źmieny prymuć, nieviadoma.
Prablemu čynoŭniki ŭzdymali i letaś, źviazvalisia z rasijskim Miniustam, ale rašyć jaje za hety čas tak i nie ŭdałosia. Tady namieśnica ministra justycyi Natalla Filipava kazała, što, kab atrymać alimienty, niekatoryja biełarusy jeduć u bližejšyja rehijony Rasii, naprykład u Smalenskuju vobłaść, i tam adkryvajuć bankaŭskija rachunki.
Padobnym čynam dziejničajuć i biełaruskija pradpryjemstvy, kab atrymać hrošy ad rasijskich daŭžnikoŭ, — adkryvajuć rachunki na terytoryi Rasii. «Pa linii Ministerstva pramysłovaści, «Biełnaftachima» hety ałharytm užo adpracavany», — adznačyŭ Kavalenka na niadaŭnim pasiadžeńni.
Kamientary