«Miesiac biez pracy — daražej». Ci možna zapłacić $5 tysiač i atrymać ofier?

Kali koratka, jon «pajšoŭ na ŭhodu» z karjernym kansultantam: toj abiacaŭ dapamohu ŭ pošukach pracy, a ŭzamien chacieŭ 50% ad pieršaha zarobku svajho klijenta abo $5 tysiač — kali kandydat admovicca ad prapanovy (a jon taki admoviŭsia). U vyniku aŭtar vyrašyŭ prarekłamavać pasłuhi taho samaha kansultanta «ŭ lik zapazyčanaści», a taksama abviaściŭ zbor srodkaŭ, kab raźličycca za dapamohu ŭ pošuku pracy, na jakuju jon tak i nie vyjšaŭ.

Zaviazałasia cikavaja dyskusija ab «pradaŭcach ofieraŭ». A ci možna voś tak, asabliva nie napružvajučysia, za $5 tysiač harantavana atrymać pracu?

Što kažuć ejčary/kansultanty

Heta doraha, bo rynak stahnuje

HRD i karjerny kansultant Iryna Višnieŭskaja kaža, što «nichto z takich śpiecyjalistaŭ nie harantuje kandydatu ofier».

— Asnoŭnaje napaŭnieńnie pasłuhi pa karjernamu kansultavańniu — heta zrabić pryhožaje reziume + supravadžalny list, uziać na siabie pošuk i padbor adpaviednych vakansij, adhuknucca ad imia kandydata, «nataskać» jaho na toje, kab jon prajšoŭ usie sumoŭi.

To bok pa fakcie — heta pasłuhi dla «lanivych». A taki ich košt hruntujecca na tym, što rynak zaraz stahnuje, vakansij mała, kandydataŭ šmat — voś na ich niaŭdačach i strachach i možna canu zahnuć.

Žurnalisty paprasili Irynu ahučyć rascenki. Samyja vysokija, kankretyzavała jana, — u rajonie 4-5 tysiač jeŭra. Ale taksama jany mohuć być pryviazany da pracentaŭ ad hadavoha dachodu kandydata abo adnaho miesiačnaha zarobku.

«Dla top-pazicyj suma moža dachodzić da 10-15 tysiač jeŭra».

HRD z dośviedam 15+ hadoŭ u prafiesii Anastasija*, kaža, što adnojčy sustreła takoha karjernaha kansultanta — na sumoŭi.

— Jana pierakonvała mianie, što jaje kandydaty «zaŭsiody» pracaŭładkoŭvajucca ŭ tyja kampanii, kudy chočuć trapić. Ale jana taksama zaŭvažyła, što ofier nie harantuje — a tolki dapamahaje zrabić reziume, vyjści na rekrutara z kampanii i padrychtavacca da intervju.

Anastasija kaža, što kansultanty mohuć pracavać nie tolki na siabie, ale i na jurasobu — naprykład, kampaniju, jakaja dapamahaje z pracaŭładkavańniem u Štatach abo ŭ Jeŭropie (ich zaraz niamała). Kožny kansultant tam viadzie pa 4-5 klijentaŭ adnačasova. Płacić kandydat, chacia časam i kampanija hatovaja vypłacić za toje, što im dapamahli znajści redkaha śpiecyjalista.

«Mahčyma, kansultanty viedajuć, što ŭ kampanii adkryty peŭnyja [niepubličnyja] vakansii»

Julija* tłumačyć, što na rynku jość niekalki typaŭ śpiecyjalistaŭ: adny zajmajucca prafaryjentacyjaj i raźvićciom; druhija dapamahajuć z kankretnymi techničnymi zadačami pa pošuku pracy.

— Jość i takija karjernyja kansultanty, jakija dapamahajuć z pošukam pracy «pad kluč»: rychtujuć cover letters, składajuć niekalki reziume pad roznyja pazicyi, zapaŭniajuć LinkedIn, da jakoha kandydaty dajuć dostup. A jość jašče tyja, chto i padajecca za kandydataŭ, i rassyłaje za ich reziume — i heta kaštuje daražej.

Julija vykazała mierkavańnie, što śpiecyjalisty, jakija «handlujuć ofierami», mohuć mieć taksama suviazi ŭ bujnych kampanijach.

— Mahčyma, jany viedajuć, što ŭ kampanii adkryty peŭnyja [niepubličnyja] vakansii.

Što kažuć kandydaty

Pahavaryli z tymi, chto karystaŭsia pasłuhami karjernych kansultantaŭ.

Palepšyli CV za 500 jeŭra. «Kali nie atrymajecca znajści pracu, razhledžu poŭny pakiet»

Dźmitryj — kiraŭnik adździeła prodažaŭ, u IT — 15 hadoŭ. Zaraz žyvie ŭ Ispanii i šukaje pracu ŭ miascovaj abo jeŭrapiejskaj kampanii.

— Paŭhoda ja šukaŭ sam, ale na 200 adpraŭlenych CV — usiaho kala 10 zaprašeńniaŭ na intervju. Paśla čaho vyrašyŭ źviarnucca ŭ śpiecyjalizavanuju kampaniju.

Dźmitryj kaža, što ŭziaŭ «minimalny pakiet» koštam krychu mienš za 500 jeŭra. U jaho ŭvachodzić siesija pra karjernaje bačańnie — «što baču ja sam i što bačać jany na asnovie majho CV», dźvie siesii pa palapšeńniu CV, adna siesija pa palapšeńniu profilu ŭ LinkedIn i adna siesija-treniroŭka pierad intervju.

— Prajšło paru tydniaŭ, jak ja staŭ rassyłać abnoŭlenaje CV i padpraviŭ usio ŭ LinkedIn tak, kab čaściej źjaŭlacca ŭ pošuku ŭ rekrutaraŭ. Tamu ciažka skazać abjektyŭna nakolki niešta źmianiłasia/dapamahło: u LinkedIn pakul nivodny rekrutar nie pahrukaŭsia, u adkaz na adpraŭlenyja CV pakul taksama atrymlivaju admovy.

Dźmitryj pryznajecca, što na praciahu bližejšych 4-5 miesiacaŭ praciahnie šukać pracu «ź ich karekciroŭkami», i kali nie atrymajecca — razhledzić pakiet «pad kluč».

Poŭny pakiet

Dźmitryj dasłaŭ padrabiaznaści. Pakiet nazyvajecca «Supravadžeńnie da ofiera» i kaštuje kala 3,3 tysiač jeŭra «+5% hadavoha akładu/mahčyma rasterminoŭka». Pry hetym udakładniajecca, što «druhaja apłata tolki paśla atrymańnia ofiera i vychadu na pracu». Raźličany jon na 7 miesiacaŭ. Što ŭvachodzić u pakiet:

• «usie pasłuhi» kampanii, jakaja dapamahaje z pošukam pracy;
• «asabisty mientar, jaki viadzie kiejs [klijenta] i adkazvaje za stratehiju»;
• zborka reziume, LinkedIn i cover letter pa mižnarodnych standartach;
• nieabmiežavany pošuk vakansij, vodhuki, nietvork u LinkedIn i viadzieńnie statystyki;
• indyvidualny płan, pavyšeńnie ŭzroŭniu anhlijskaj i treniroŭka na intensivach;
• padrychtoŭka da kožnaha intervju i dapamoha ŭ pošuku mientara dla treniroŭki chard skiłoŭ.

Dźmitryj kaža, što kampaniju jamu paraili znajomyja, košty ŭ jaje — «nižej za siaredni».

Dali biaspłatnuju paradu, tamu što «dla mianie heta zanadta doraha»

Siarhiej* —.Net-raspracoŭščyk. Pierajšoŭ u IT ź inšaj śfiery «nie ŭ samy lepšy čas — u 2022 hodzie».

— Pakul ja šukaŭ pieršuju pracu paśla kursaŭ, što tolki nie sprabavaŭ: bačyŭ na devby artykuł pra toje, jak inšy džun paabiacaŭ dva hady addavać 30% zarpłaty tamu, chto ŭładkuje jaho na pracu — i paŭtaryŭ u siabie ŭ LinkedIn (ale ŭ inšaj farmuloŭcy — paabiacaŭ 2 poŭnyja zarobki). Pisaŭ sam karjernym śpiecyjalistam, jakich mnie raili kamientatary pad maimi pastami.

Adzin z karjernych kansultantaŭ jakraz adkazaŭ, što jaho pasłuhi dla mianie zanadta darahija dy i nie voźmiecca, tamu što ja «navat nie midł», a jamu patrebny harantavany kiejs.

Tak što jon prosta paraiŭ, kudy ruchacca dalej i za kim sačyć u LinkedIn (za što dziakuj — ja tak i znajšoŭ stažyroŭku ŭ IT-kampanii).

Siarhiej kaža, što nie ŭdakładniaŭ rascenki na pasłuhi taho karjernaha kansultanta. I ŭ cełym razumieje, čamu jamu admovili tady.

— Mnie zdajecca, lepš padyjšli b «łoŭcy ofieraŭ». Jany daŭno ŭ hetych «vodach», viedajuć, na što klujuć pracadaŭcy.

«Hrošy niemałyja, ale kožny miesiac biez pracy — heta minus navat bólšaja suma»

Alina* — frontend-raspracoŭščyca. Jany z mužam pierajechali ŭ Jeŭropu, tamu što jamu prapanavali miesca ŭ miascovaj kampanii. A jana da taho momantu «apošni raz pracu šukała hadoŭ 7 tamu».

— Mnie paraili čałavieka — jon dapamahaje skłaści reziume, tłumačyć, što treba napisać u LinkedIn, kab ciabie zaŭvažyli rekrutary. My stelefanavalisia na 2 hadziny — heta kaštavała $60. Potym ja jašče dapracavała svajo reziume z ChatGPT, pasłała kansultantu — jon skazaŭ: «Narmalna».

Ale Alina pakul nie asabliva prasunułasia ŭ svaich pošukach.

Kaleha muža parekamiendavaŭ joj znajomaha, jaki dapamahaje pracaŭładkoŭvacca ŭ Jeŭropie — nie tolki «ŭpakoŭvaje» reziume i LinkedIn, ale i šukaje pracadaŭcaŭ. «U jaho šyrokija suviazi», kaža dziaŭčyna. Heta kaštuje 5 tysiač jeŭra. «Hrošy niemałyja, ale, jak skazaŭ toj kaleha, kožny miesiac biez pracy — heta minus navat bólšaja suma».

Tym nie mienš Alina pakul nie hatovaja vieści taki dyjałoh. Jana praciahvaje pracavać addalena na kampaniju ź Biełarusi i «u cichim režymie» šukać novuju pracu.

*Imiony śpikieraŭ źmienienyja pa ich žadańni.

• 0
• 0
• 0
• 0
• 0
• 0
• 0
• 0