Ci spynilisia zvalnieńni pa palityčnych matyvach? Voś što raskazali ŭ niekalkich dziaržaŭnych arhanizacyjach
Jašče ŭ studzieni Alaksandr Łukašenka ziaviŭ, što supracoŭnikaŭ, jakija zaśviacilisia na pratestach, treba nie zvalniać, a davać im šaniec. Ale jak situacyja vyhladaje nasamreč? «Naša Niva» pacikaviłasia, ci spyniłasia chvala zvalnieńniaŭ niełajalnych režymu Łukašenki na Hrodzienščynie.
«Hrodna-Azot»
Pradpryjemstva ŭ 2020 hodzie było adnym z samych pratesnych u krainie, tamu zvalnieńni pa palityčnych matyvach praciahvajucca navat praź piać hadoŭ paśla vybaraŭ.
Čałaviek, znajomy ź situacyjaj u zavodakiravańni, kaža, što nie tak daŭno zvalniali tych, kaho adšukali siarod udzielnikaŭ adnaho z pratesnych maršaŭ, i čałavieka z kamandy Viktara Babaryki.
Adnak, pavodle słoŭ krynicy, kolkaść takich zvalnieńniaŭ apošnim časam nievialikaja. Surazmoŭca źviazvaje heta pierš za ŭsio z tym, što mnohich niełajalnych za piać hadoŭ užo daŭno zvolnili.
Raniej na zavodzie aktyŭna vyśviatlali, u kaho z supracoŭnikaŭ jość karta palaka. Ciapier hetym mienš zajmajucca. Za najaŭnaść karty palaka z pracy nie zvalniajuć, ale novy kantrakt nie padpišuć.
Pry pryjomie na pracu, jak i raniej, pravodzicca pravierka. Kali jość minimalnyja začepki pa linii 2020 hoda, to na pracu, prynamsi ŭ administracyjnuju častku zavoda, nie voźmuć.
Što tyčycca zvyčajnych rabočych na hałaŭnym zavodzie i daččynych pradpryjemstvach, to ŭzrovień patrabavańniaŭ krychu nižejšy. Viadoma pra vypadki, kali na pracy pakidajuć tych, kaho, naprykład, sudzili za raspaŭsiud ekstremisckich materyjałaŭ.
Kali inšych «hrachoŭ», akramia karty palaka, niama, to na niekatoryja vakansii ludziej prymajuć.
HrDU imia Janki Kupały
U Hrodzienskim dziaržaŭnym univiersitecie taksama praciahvajuć zvalniać — dakładniej, nie praciahvać kantrakty — niedastatkova łajalnym vykładčykam.
Sa słoŭ čałavieka, znajomaha ź situacyjaj, hetuju praktyku nie spyniajuć navat niahledziačy na niedachop vykładčykaŭ.
Krynicy viadoma adrazu pra niekalki kaleh, jakija nie vyjduć na pracu z 1 vieraśnia z-za taho, što im nie praciahnuli kantrakt z-za palityčnych pryčyn.
Surazmoŭca adznačaje, što ciapier, kab zastacca na pracy, niedastatkova prosta nie vysoŭvacca i nie vykazvacca suprać ułady ci administracyi ŭstanovy. Treba jaje hučna padtrymlivać.
Peŭnaj katehoryi supracoŭnikaŭ kantrakt padpisvajuć tolki na hod, kab trymać ich «u tonusie».
«Hrodnaabłhaz»
Vyjaŭlać niełajalnych supracoŭnikaŭ praciahvajuć i ŭ «Hrodnaabłhazie». Choć za stolki hadoŭ užo amal nie zastałosia ludziej, na jakich možna adšukać kampramat.
U arhanizacyi jość śpiecyjalnyja supracoŭniki, jakija pilna sočać za pavodzinami rabotnikaŭ — nakolki aktyŭna tyja prymajuć udzieł u roznych praŭładnych mierapryjemstvach, što pościać u sacyjalnych sietkach.
Kali čałaviek «niedastatkova patryjatyčny», to pry padaŭžeńni kantraktu mohuć uźniknuć dadatkovyja pytańni.
Surazmoŭca z kartaj palaka, jaki niadaŭna ŭładkavaŭsia na pracu kiroŭcam, raspavioŭ, što dla bolšaści dziaržaŭnych pradpryjemstvaŭ najaŭnaść karty palaka nie była pieraškodaj jaho ŭziać. Adnak kali razmova idzie pra ŭładkavańnie ŭ orhany ŭłady ci siłavyja struktury, to tam kazali, što biez admovy ad karty nie prymuć.
-
«U 2020-m chtości prystaviŭ nož da horła kiroŭcy, a chtości puknuŭ». Lidar «Drazdoŭ» vielmi dziŭna pakajaŭsia za 2020 hod
-
Hurtu «Drazdy», jaki źbiraŭsia kidać scenu praz zabaronu vystupać u bujnych haradach, dazvolili abłasnyja centry. Ale nie Minsk
-
U Homieli zavočna asudzili Andreja Stryžaka, Alaksieja Lavončyka i Sašu Źvieravu
Ciapier čytajuć
Paśla pajezdki za miežy ES tajamniča źnik Anatol Kotaŭ, byłaja pravaja ruka Paŭła Łatuški46
Kamientary