BiełTA: Raŭnavažny kurs rubla ŭstalujecca praz 1-2 tydni

Situacyja na valutnym rynku ŭ Biełarusi praciahvaje zastavacca niavyznačanaj: valuty niama ŭ abmieńnikach, jaje składana kupić pradpryjemstvam na biržy, isnuje množnaść kursaŭ. Vidavočna, što ŭ hetaj situacyi biez pryniaćcia surjoznych mier nie abyścisia.

«Śpiecyjalisty u bankaŭskich kołach čakajuć u bližejšy čas pryniaćcia mier, jakija daduć mahčymaść pavialičyć abjom pradavajemaj na biržy valuty. Pry hetym havorka nie idzie ab pavieličeńni normy abaviazkovaha prodažu valutnaj vyručki i padobnych instrumientach. Sutnaść — u admienie nieabhruntavanych ilhot, jakija majuć šerah biełaruskich subjektaŭ haspadarańnia. Zamiežnych inviestaraŭ hetyja źmieny nie zakranuć. U vyniku raŭnavažny kurs moža ŭstalavacca ŭžo praz 1–2 tydni», — paviedamiła karespandentu BiełTA krynica ŭ bankaŭskich kołach.

Nacyjanalny bank pakul nie ŭdzielničaje ŭ tarhach na valutnym rynku i ličyć, što rynak sam pavinien vyznačyć raŭnavažny abmienny kurs rubla da košyka zamiežnych valut.

***

Tym časam stała viadoma, što Minharvykankam prosić bujnych eksparcioraŭ stalicy terminova padać infarmacyju ab stanie valutnych srodkaŭ na rachunkach. Adpaviedny list byŭ razasłany 7 krasavika administracyjami rajonaŭ horada sa spasyłkaj na vykanańnie daručeńnia staršyni Minskaha harvykankama.

BiełaPAN maje kopiju lista, razasłanaha administracyjaj Savieckaha rajona z pamietkaj «terminova».

Zhodna ź im, pradpryjemstvy pavinny byli padać infarmacyju ab najaŭnaści valutnych srodkaŭ na rachunkach da 17.00 7 krasavika.

Jak prakamientavali hety dakumient BiełaPAN va ŭpraŭleńni ekanomiki administracyi Savieckaha rajona Minska, «list razasłany bujnym eksparcioram ŭ metach vykanańnia daručeńnia staršyni Minharvykankama Mikałaja Ładućki». Pry hetym śpiecyjalist adznačyŭ, što nie viedaje mety hetaha daručeńnia. «Ale heta nie značyć, što jany (arhanizacyi. — BiełaPAN.) abaviazany padać takuju infarmacyju. Niekatoryja šluć adkaz, a niekatoryja admaŭlajucca», — skazaŭ supracoŭnik administracyi.

Atrymać kamientaryj u Minharvykankamie pa hetym pytańni pakul nie ŭdałosia.

Va ŭpraŭleńni infarmacyi Nacyjanalnaha banka BiełaPAN zajavili, što im nieviadomy pryčyny takoha rasparadžeńnia staličnych uładaŭ.

Na dumku adnaho z ekśpiertaŭ bankaŭskaj śfiery, mahčyma, kiraŭnictva Minharvykankama raspracoŭvaje niejki miechanizm pieraraźmierkavańnia valuty pamiž pradpryjemstvami. Jak viadoma, u suviazi ź niestabilnaj situacyjaj na valutnym rynku i množnaściu kursaŭ valut najbujniejšyja pradpryjemstvy-eksparciory nie śpiašajucca pradavać valutu navat na mižbankaŭskim rynku, dzie kurs dołara ZŠA pieravyšaje aficyjny na 10–30%. Takim čynam, pradpryjemstvy-imparciory sutyknulisia z prablemaj, kali jany nie mohuć zadavolić svaje patreby ŭ valucie.

Kiraŭnik Asacyjacyi małoha i siaredniaha pradprymalnictva Siarhiej Bałykin ličyć, što «hetyja dziejańni ŭładaŭ niepasredna supiarečać duchu i litary prezidenckaj dyrektyvy № 4». «Jany śviedčać, što situacyja na valutnym rynku vielmi niaprostaja, tamu dziaržava pravodzić „invientaryzacyju“ valutnych rachunkaŭ. Heta faktyčna sproba pravieści analiz, sabrać infarmacyju. Ale ŭ hetym ničoha strašnaha niama», — adznačyŭ kiraŭnik asacyjacyi.

Bałykin źviartaje ŭvahu na tuju akaličnaść, što ŭ pradpryjemstvaŭ jość poŭnaje prava admovicca padavać takuju infarmacyju, «tym bolš što dyrektyva prezidenta № 4 praduhledžvaje skaračeńnie kolkaści ŭsialakaha kštałtu spravazdač».

• 0
• 0
• 0
• 0
• 0
• 0
• 0
• 0