«Vkontaktie» sabrała Płošču

Na zaklik supołki «Revalucyja praz sacyjalnuju sietku» adhuknulisia niekalki socień ludziej.

19.43

Akcyja zaviaršyłasia. Udzielniki razychodziacca z płoščy.

19.38

Jaŭsiejeŭ, Hryščanka i jašče niekalki śpiecnazaŭcaŭ i «cyvilnych» nablizilisia da koła moładzi, jakaja śpiavała. Milicyjanty pieramaŭlalisia pa telefonach, paśla

dastali miehafon, adnak zvykła skazać pra toje, što "akcyja niesankcyjanavanaja" nie paśpieli. U toj momant udzielniki akcyi skončyli śpiavać i prosta razyšlisia pa płoščy. Ščylnaje koła raspałasia

19.34

Niechta zaśpiavaŭ «Try čarapachi» N.R.M., moładź padchapiła.

19.29

Ludzi ŭtvaryli koła ŭ centry płoščy. U im — čałaviek stałaha vieku śpiavaje bardaŭskija pieśni pad hitaru. Moładź słuchaje. Siarod milicyjantaŭ zaŭvažanyja namieśnik kiraŭnika HUVD Minharvykankama Ihar Jaŭsiejeŭ i major Maksim Hryščanka.

19.26

Adzin z udzielnikaŭ akcyi paviedamiŭ, što heta ŭžo druhaja sproba minskaj moładzi sabracca na zaklik supołki «Revalucyja praz sacyjalnyja sietki». Na pieršuju sustreču tydzień tamu pryjšło kala piacidziesiaci čałaviek. Udzielnik akcyi raskazaŭ karespandentu «NN», što daviedaŭsia pra akcyju praz «Vkontaktie». Na jaho dumku, na płošču pryjšła apalityčnaja moładź, jakaja rasčaravałasia ŭ apazicyi i jaje mietadach, ale choča vykazać svaju niazhodu z uładaj.

Ci mohuć takija akcyi być paśpiachovymi? Surazmoŭca pryvioŭ prykład Fejsbuk-revalucyi ŭ Jehipcie. Kolki musić sabracca ludziej, kab situacyja ŭ krainie źmianiłasia? «Ludziej musić być stolki, kab jany zaniali praśpiekt ad płoščy Niezaležnaści da płoščy Pieramohi», — ličyć udzielnik akcyi.

19.23

Ludzi — a ich sabrałasia kala čatyrochsot čałaviek — pačali hučna plaskać u ładki. pačulisia radasnyja vokličy. Situacyja nienapružanaja, niekatoryja prosta adpačyvajuć, hulajuć u fryśbi. Vakoł natoŭpu jeździć hrupa ravarystaŭ, i jaje vitajuć vopleskami.

19.10

Udzielnikaŭ užo kala trochsot. Chtości siadzić na prystupkach Pałacu prafsajuzaŭ, chtości prosta na płoščy. Niama ni łozunhaŭ, ni simvoliki. U centry płoščy ŭdzielniki stajać davoli ščylna, minaki musiać ich abychodzić, niekatoryja cikaviacca, što adbyvajecca.

A 19.00

na Kastryčnickaj sabrałasia kala sotni maładych ludziej. Bolšaść ich na voka nie majuć i 25-cihadoŭ. Jany stajać nievialikimi hrupkami i pa adnym.

Prysutničaje taksama śpiecnaz i supracoŭniki ŭ cyvilnym. Ludzi jašče padychodziać. Akcyja maŭklivaj salidarnaści maje praciahnucca da 19.30.

* * *

Siońnia, a 19-j na Kastryčnickaj płoščy ŭ Minsku majuć sabracca aktyvisty supołki «Vkontaktie» «Revalucyja praz sacyjalnuju sietku». Ideja supołki ŭ tym, kab prychilniki demakratyčnych pieramien štotydzień u vyznačany čas źbiralisia na hałoŭnaj płoščy svajho horada. «Prosta špacyrujcie, stojcie — prosta znachodźciesia tam. Nie treba nijakich ściahoŭ i transparantaŭ, nie treba nijakaj simvoliki», — pišuć arhanizatary. — Pieršyja sustrečy — moža być mała ludziej, ale z kožnym dniom nas budzie rabicca ŭsio bolej!»

Niadaŭna maderatarami hetaj supołki cikaviłasia KDB.

• 0
• 0
• 0
• 0
• 0
• 0
• 0
• 0