Jon zajaviŭ, što budzie zmahacca inšymi mietadami.
Viciebski aktyvist Kansiervatyŭna-chryścijanskaj partyi - BNF Siarhiej Kavalenka, jaki adbyvaje pakarańnie ŭ mahiloŭskaj kałonii №19, spyniŭ haładoŭku, paviedamiła BiełaPAN jaho žonka.
Pa słovach Aleny Kavalenki, 24 maja Siarhieja naviedaŭ advakat.
"Advakat skazaŭ, što haładoŭku Siarhiej spyniŭ, budzie zmahacca inšymi mietadami. Zaraz jon znachodzicca ŭ karancinie, jamu vydali śpiecvopratku. Miedycynskaje abśledavańnie nie pravodziłasia. Advakat skazaŭ, što pačuvajecca Siarhiej bolš-mienš", - raspaviała žonka apazicyjaniera.
Jana taksama paviedamiła, što advakat rychtuje nahladnuju skarhu ŭ Viciebski abłasny sud na prysud Kavalenki.
***
Nahadajem, što 18 maja Viciebski abłasny sud adchiliŭ kasacyjnuju skarhu aktyvista Kansiervatyŭna-chryścijanskaj partyi — BNF Siarhieja Kavalenki na prysud suda Pieršamajskaha rajona Viciebska.
27 lutaha sud Pieršamajskaha rajona pad staršynstvam Aleny Žuk pryznaŭ Kavalenku vinavatym va ŭchileńni ad adbyćcia pakarańnia ŭ vyhladzie abmiežavańnia voli (art. 415 KK). Havorka idzie ab pakarańni, vyniesienym apazicyjanieru ŭ mai 2010 hoda za vyviešvańnie bieł-čyrvona-biełaha ściaha na hałoŭnaj navahodniaj jołcy Viciebska, — try hady pazbaŭleńnia voli ŭmoŭna. Kavalenka byŭ zatrymany 19 śniežnia 2011 hoda i z tych časoŭ znachodzicca ŭ źniavoleńni.
Razhlad kasacyjnaj skarhi ŭ abłasnym sudzie pačaŭsia 10 krasavika. Tady sudovaja kalehija Viciebskaha abłasnoha suda pryniała rašeńnie nakiravać Kavalenku na kompleksnuju psichijatryčnuju ekśpiertyzu va ŭmovach stacyjanara. U vyniku apazicyjanier byŭ nakiravany ŭ RNPC psichičnaha zdaroŭja ŭ Navinkach, dzie amal na praciahu miesiaca pravodzili ekśpiertyzu jaho psichičnaha zdaroŭja. Ekśpierty pryznali jaho psichična zdarovym. Ekśpiertyza była pryznačanaja ŭ suviazi z haładoŭkaj, jakuju Kavalenka trymaŭ bolš za dva miesiacy ŭ znak pratestu suprać svajho aryštu i padčas jakoj jon straciŭ amal pałovu ŭłasnaha vahi.
13 krasavika, znachodziačysia ŭ RNPC, Kavalenka haładoŭku spyniŭ. 8 maja, paśla pieravodu z Navinak nazad, u viciebski śledčy izalatar № 2, apazicyjanier adnaviŭ akcyju pratestu.
Kamientary