Sytuacyja katastrafičnaja

Sytuacyja katastrafičnaja

Valancina Tamilčyk, namieśnik dyrektara śvinahadoŭčaha kompleksu «Zachodni», Bieraściejski rajon:

«Sytuacyja sa zbožžam i karmami katastrafičnaja. Žabinkoŭski kambikormavy zavod staić. U čaćvier u Ministerstvie było pasiedžańnie, na jakim vyrašyli vydzielić valutnyja kredyty dla vialikich haspadarak, choć čas užo ŭpuščany. Nichto nam prosta tak hrošaj nie daje. Dajuć u kredyt: rublovy pad 90% hadavych — i my ličym hetyja ŭmovy kabalnymi. Ciapier niby dajuć i valutny pad 15% hadavych. Kałhasy zdajuć zbožža dziaržavie pa 20000, a my kuplajem hetaje zbožža ŭžo pa 30000. Voś i vychodzić, što za paŭhady majem niedachop abarotnych srodkaŭ — 182 miljardy.

Raniej zbožža najbolš zakupali ŭ Rasiei, ale sioleta tam nieŭradžaj, tamu asnoŭnaja nadzieja — na Ŭkrainu, ale j kantrakty, zaklučanyja z Ukrainaj, nie vykonvajucca: u ich tam vybary nieŭzabavie buduć, i pierad vybarami ŭviali zabaronu na adhruzku. Inšaja prablema — toje, što tak i nie admianili PDV na ŭkrainskaje zbožža, i tamu my płacim zvyš cany (a ciapier tannuju pšanicu kuplajem DAF pa canie 90 dalaraŭ za tonu, a jačmień — pa 85—87 dalaraŭ) jašče 15%. PDV abiacajuć-abiacajuć źniać, ale tak i nie źniali. Viasnoju na naradzie ŭ Ivanavie nam skazali: «Kali buduć iści bujnyja partyi zbožža, PDV na ich buduć zdymać, i hetaje rašeńnie budzie prymać asabista Alaksandar Ryhoravič». Ale jakija ž ciapier vialikija partyi, skul? Zbožža ščyniajem patrochu, šukajem, što tolki možam i dzie tolki možam: siońnia voś vyrašyli kupić u adnym miescy 20 t, u druhim — 15 t. Navat pa 6 t biarem! Choć ad hetaha stolki maroki, bo nam niavyhadna pracavać z małymi partyjami: naš kompleks u dzień spažyvaje 100 t! Krytyčnaja sytuacyja i ź białkovymi dabaŭkami: na zakupku sojevaha šrotu, rybnaj muki niama valuty.

Vyžyvajem pakul na svajoj kukuruzie, my — kukuruzianaja haspadarka, i majem sioleta niedzie 1,5 tysiačy tonaŭ kukuruzianaj muki. Jaje j miašajem patrochu sa zbožžam i vitaminnymi kancentratami (bałazie našy navučylisia rabić niakiepskija kancentraty na zavodach u Drahičynie, Puchavičach i aršanskim «Ekamole»). Tamu i stabilizavali dzionnyja pryvahi (ciapier majem 446 h u dzień na adkormie, a kab vy paraŭnali: letaś było ŭ hety čas 518 h, pazaletaś — 576 h u dzień). Ale niedzie pad pieršaje čysło kukuruzu dajadajem. I što tady?

Damovaŭ na pastaŭku zbožža zaklučyli na 93 tysiačy ton, hetaha nam chapiła b na 3 hady, ale prablema ŭ tym, što damovy časta nie vykonvajucca.

My ŭvieś čas šukajem vyjścia, šukajem lubych varyjantaŭ paratunku: my nia majem prava nie pratrymacca. My — selekcyjna-hibrydny centar, ad nas zaležyć taksama praca inšych haspadarak vobłaści, my na ŭsiu vobłaść pastaŭlajem knyroŭ i plemśvinak. Budziem rabić usio, kab nia źmienšyć absiemianieńnia. Mabyć, pryjdziecca zdavać pradukcyju mienšaju vahoj. Što rabić, kali my ŭžo piaty miesiac kormimsia tolki na 80% racyjonu. Ale j heta tolki dziakujučy supernamahańniam dyrektara j supracoŭnikaŭ i dziakujučy našaj firmovaj kukuruzie. A jość ža ŭ vobłaści haspadarki, dzie śvińniam davali ŭ asobnyja miesiacy tolki pa 50% ad patrebnaha.

Jasna, što małych parasiatak starajemsia karmić lepš: jany ž jak małyja dzieci, jak ža ich nie pakormiš. U toj ža čas na adkormie padśvinkam dajem mienš, čym treba. Vykormlivajem tolki da 95—105 kh, a nie da 118 kh, jak možna było b pavodle technalohii.

My pieražyli 95-y j 96-y hady. U 95-m sytuacyja była padobnaja, ale pačynałasia heta sa studzienia, a sioleta — ad samaha leta.

My žyviem tym žyćciom, što i ŭsia kraina. Ciapier hałoŭnaje, kab zimu pieražyć ź ciapłom, i tamu my zrabili ŭsio, kab raźličycca za haz. Ale zapazyčanaści pa elektryčnaści rastuć.

Małym kompleksam praściej: kali haspadarka maje 12000 śviniej i 7000 ha ziamli, dyk jana zbolšaha moža siabie zabiaśpiečyć, a na nas — my ciapier majem 53800, nam musova minimum 30000 t zbožža ŭ hod — treba, kab pracavaŭ ceły rajon. A my ž u rajonie nie adny, jość jašče kompleksy, dzie byčkoŭ hadujuć».

Zapisaŭ Barys Tumar