Палітвязень Мікалай Дзядок атрымаў дадаткова год і тры дні зняволення
Суд Ленінскага раёна Магілёва 26 лютага прызнаў палітвязня Мікалая Дзядка, які знаходзіцца ў турме, вінаватым у злосным парушэнні рэжыму і прыгаварыў яго да аднаго года і трох дзён пазбаўлення волі.
Нагадаем, 25—26 лютага ў магілёўскай турме № 4 разглядалася справа асуджанага за злоснае хуліганства анархіста Мікалая Дзядка. Яму інкрымінавалася злоснае парушэнне рэжыму (артыкул 411 КК). Тэрмін зняволення Дзядка заканчваўся 3 сакавіка, аднак прызнанне судом яго вінаватасці ў новым злачынстве адтэрмінавала выхад на волю.
«Мікалай будзе адназначна падаваць касацыйную скаргу, і пакуль прыгавор не набудзе моц, ён будзе знаходзіцца ў турме, а потым яго этапуюць у калонію строгага рэжыму», — паведаміла жонка Дзядка Валерыя Хоціна.
Паводле яе слоў, суддзя Шведаў прадэманстраваў адкрытасць і ўсебаковасць у даследаванні матэрыялаў справы. «Я не магу сказаць, што ў мяне ёсць нейкія прэтэнзіі да суддзі наконт таго, што ён нешта недарасследаваў, не паспрабаваў высветліць нейкія акалічнасці. Іншая рэч, што ў мяне ёсць прэтэнзіі наконт вынясення прыгавору. Наш адвакат зачытваў патрабаванні закона, па якіх гэты 411-ты артыкул не варта прымяняць да тых нязначных эпізодаў, і тым больш і іх колькасць варта было зменшыць — лічыць за адзін год, а не амаль за два з паловай гады, як гэта было зроблена пры правядзенні праверкі», — сказала жонка асуджанага анархіста.
Яна лічыць несправядлівым тое, што суд даў максімальнае пакаранне за 16 эпізодаў парушэння рэжыму, якія ставяцца ў віну мужу, лічачы іх на працягу двух з паловай гадоў.
Зазначым, што суд праходзіў у закрытай установе, таму трапіць на пасяджэнне журналісты не маглі.
Нагадаем, Дзядок быў узяты пад варту 3 верасня 2010 года. 27 мая 2011 года суд Заводскага раёна Мінска прыгаварыў яго да чатырох з паловай гадоў зняволення ў калоніі строгага рэжыму на падставе ч. 2 арт. 339 КК (злоснае хуліганства). 5 снежня 2012 года пастановай суда ўмовы адбывання пакарання Дзядку былі замененыя на больш жорсткія, і Мікалая перавялі з калоніі № 17 Шклова ў турму № 4 Магілёва.
Як лічаць праваабаронцы, падставай для прыгавору Дзядку стаў яго ўдзел у мірнай дэманстрацыі пратэсту каля Міністэрства абароны супраць сумесных руска-беларускіх ваенных вучэнняў.
Цяпер чытаюць
«Лукашэнка проста не ведае». Ябацьку, які выкладаў у тыкток відэа пра булінг дачкі, пасадзілі на паўтара месяца9
Каментары